جانت احلى دنيا عشتها امي وابوية فدوة لعينهم روحي من الدنيا واخوتي الي اغلى من روحي حياتنا شكد ماكول حلوة قليل تربية امي وابوية معتمدة على صداقتنا اكثر من ما هي تربية وعدهم اهم شي الدرااااااسة ادهم حبيبي اخوية الجبير هلسنة اخيرة طب عام وايهم ابو المصايب فرفوشي العائلة ثالث طب اسنان واني فديتني هلسنة سادس وماادراك ماالسادس من جنا صغار واحنا نصارع ع الدراسة .
عدنا الغيرة بلدراسة مستباحة وهي الدافع الاساسي لمستوانا بلمدرسة امي حبيبتي حنية الدنيا بيها ربة بيت وماكو اطيب منها الا ابوية فعلا ابوية اطيب منها ابوية انسان راقي بمعنى الكلمة مقاول والحمدلله العيشة تمام التمام ابوية عندة عمارة بيها شقق ماجرها لاطباء ومحامين ومحلات 3 جوة ومشتري لكل واحد بينا بيت وعايشين كلنا ابيت ادهم لان بي ملحق مشتمل صغير .
بلبيت الكل يصيحلي عسولة محد يصيحلي عسل حنطاوية وعيوني ملونة وشعرررري طويل يخبل عقلي كله بي النهار كله ادهن واغسل بي من كل عقلي اذا توكع شعراية انقهر وبعدين كله وكع من القهر اخوتي شكار وبياض طالعين ع امي والمفروض اني اطلع عليها ....
يومية اخوتي يوصلوني للمدرسة لان جنت اخاف اروح وحدي ظروف البلد تعيسة مرة طلعت وحدي لان جانت مروة صديقتي غايبة وايهم وادهم جانو طالعين من الصبح وية ابوية بشغل جان محتاجهم ومأمنين اني ومروة نروح .
اضطريت اروح وحدي لحكني ابو ماطور شلون حظ معثر هلكد مركضت انجبحت اني عبالي غير شي تفكيري منحرف طلع الافندي يريد يبوك جنطتي هي مال مدرسة شتريد منها تقرة مثلا .وانكرد وجهي كردة اخت الجذب تخبلت تشوهت عبالك واحد ساطرني بكيبل فمن يومها اخوتي مسوين دورية عليه واحد يوديني وواحد يجيبني واذا ماكو احد يوديني يغيبوني بيومها ومروة صديقة طفولتي كلها للاعدادية سوة .وياية وياية نروح ونرجع سوة بنت ام اسعد جيرانه عايشة هي وامها وابوها كبار بلعمر واخوها اسعد ابو محمد بلمشتمل الي تابع للبيت اسعد اخوها متزوج بنت خالته وعنده 3 جهال جنت ادز عليهم العب بيهم وادزهم لامهم وعمتهم مروتي تجي وياهم ...
المهم جنا قريب نص السنة وحياتنا الحمدلله عيشة هنة ماكو اي تعكير للمزاج حتى نوبات جنت احس حياتنا بليدة من هلكد مارتيبة روتينية ومتفاهمين كلش ...عزة يمكن اني حسدت نفسي ....لا لا اكيد كله قدر ومكتوب كلشي بيد ربي واله بيها حكمة.
ادهم جان العاقل الي يسمع الكلام وبأقتناع من ابوية لان ابوية جان كلش يحترمه بس ايهم الخبل اصغر ب3 سنوات من ادهم واني جنت الصغيرة فديتني.ابوية قرر يدز ادهم يكمل دراسته برة والحمدلله ادهم جان كدها ومينخاف عليه وملتزم دينيا جان الحنين حبيبي فدوة لعينه جان البيت كله بركبته مع العلم دراسته كلش صعبة بس مجان يقصر بكلشي مسواك زايدة ناكصة امي بس تكول ادهم يركض .
ايهم جان اصدقائه وبس ماعنده التزام بأحد ماعرف شلون طلع طب اسنان بلقدرة جان من صديقه يدك الباب ينسى الامة كلها والعطلة مكضيها كلها سفرات وونسات وياهم وهمة نايمين براسه والصرف كله عليه.
ادهم كمل الكلية وخلص اوراقه وسافر وبيوم الي راح صار عزة امي حيل تأذت وضلينا اسبوع نبجي فراكه ابد موسهل بس الي جان مصبرنه ابوية وجنة نحجي وياه يومية كاميرا ونطمئن عليه وفاتت الايام خلصت السادس ومعدلي طلعلي صيدلة والحمدلله جانت امنيتي خابرت ادهم وبشرته الدنيا طارت من الفرحة وياية ابوية سوالي حفلة بيناتنا ...ابوية جان الوحيد لاهله وعنده ولد عمام بس علاقته بيهم محدودة يادوب بلمناسبات واسم الله بالاحزان .
امي ابوها وامها متوفيين عدها اخ طالع قبل الاحداث لهولندا ومقبل يرجع والاحداث زيدت السالفة فاستقر هناك وتزوج وحدة هولندية دائما يدزلنا صورهم وصار عندة طفلين وعدها اخت وحدة متزوجة عايشة بامريكا طلعت بالاحداث لان رجلها جان مترجم وخافت عليه وعدها سلوان بعمري وريم واحمد توأم عمرهم 10 سنوات من طلعوا.
ادهم كمل 3 سنوات هناك وجان متفوق كلش ابوية كله كمل دراستك يابة وتعال لا كل يومية جاي لان يخاف عليه من الطيارة ابوية جان عندة فوبيا من الاماكن العالية حتى الحج بلكوة راح هو وامي . الحجي كلبه رهيف ومرتين راحو عمره طبعا من الملحة مالتنا يلة راحو ..
داومت كلية ومروة طلعلها هندسة سجلت خط اني وياها يوصلني ويوصلها اسعد اخوها دبرنه هلسايق لان محد جان يقبل بس الحمدلله رهمت لان ماكدر بلياها حتى بلكلية مكدرت اندمج وية احد بس ع كد الدراسة وبس وبدون فخر ...فديتني 4 مرات نخطبت بس كله لا لا لان جانت ابالي دراسة وبس ومرة جيرانه هم خطبني بس ابوية مقبل يخاف من العالم راد اعبد يمه الحجي .. مرة كلي اني اختارلج ابو بيتج يمكن بعده ملاكيه شوكت يلكاه الله اعلم .. اني جان عندي ثقة بأبوية لابعد الحدود ومحاطة ابالي الزواج ماعرف مشاعري متحركت لأي احد واحس بعدني زعطوطة... جنت اهتم بلبسي زايد يعني بلدوام تنورة كصيرة وسترة او جينز وشعري كله شعر شعر احسه جزء من شخصيتي وابوية واخوتي عايفيني ع راحتي لان ثقتهم بيه عميااء..
بيت ابو اسعد يخبلون جنت اطب واطلع براحتي كأنما ابيتنا مروة هم جانت هيج ويانا واسعد هم كلش يحب اخوتي اسعد جان جبير بالعمر يطلع مواليد61 عنده محل نجارة وحالتهم زينة يعني ممحتاجين لأحد جنا حايط ع حايط وحتى مرات من ابوية وامي يروحون زيارة او عمرة جنت ابات يمهم وايهم يبقى وحده بلبيت يعزم جماعته واني اطلع لحد ما.........
ايهم كام يجيب جماعته ويسهرون خصوصا بلعطل ابوية جان مأمن بيه لان يعرف تربيته شنو لحد ما اكتشفنا ايهم بدا يشرب وبمرحلة متطورة مرتين ابوية تعارك وياه علمود اصدقائه .ابوية من النوع مصادق اخوتي ويعرف اصدقائهم وعرف اثنين من اصدقائه اخلاقهم زفت شرب وعربدة تعرف عليهم بالجم لان اخوتي فديتهم جانو رشاقة واناقة وجمال ...
ابو عسل..ايهم يابة انت بمكان ادهم هسة ليش تأذيني جم مرة كلتلي عفتهم وكطعت علاقتي بيهم ....
ايهم...يابة والله ماكو شي مجرد صداقة جم نتدرب بي وخلص وكم مرة سهرنا سوة لتخاف يابة ابنك اني .....
ابو عسل..اني اخاف عليك الدنيا وصخة ومو مال صديق سوء يدمرك ويدمرنا ..
ايهم..والله لتخاف حبيب مجرد ونسات سهرات شتعرفني امشي بلحرام هم عندي اخت واخاف عليها من هلدنيا التعبانة ..
وبيومها ابوية مجان مرتاح لان ايهم ظل مستمر وياهم شرب وحتى حبوب جانو يحطوله حتى يجروه لطريقهم .وعد ابوية يعوفهم ....من حسوا بيه..
سنان ...صديق ايهم...لك ايهم شبيك سهرة وبس لتخاف ....
.ايهم جان مرحلة اخيرة ويتخرج واصدقائه هم جانو كليات بس لاهيتهم الدنيا لحد ما جروه لطريقهم ..
ابوية لاحظ ايهم متغير هواية ودراسته هاملها النهار كله نايم جان يساعد ابوية بشغله خصوصا بلعطل هذا كله وادهم ميدري ابوية ميقبل نكله . ايهم من ورة الحبوب تمادى وكام ميعرف شيخرط وشيصرف كام يجيب جماعته ويسهرون بلبيت واحنة موجودين مرة مرتين ابوية تعارك وياه وطرده من البيت مرة من المرات اسبوع ابوية مدخله للبيت وجان يبات برة اني اتصل بيه ميرد عليه لحد ما امي فد مرة تخبلت عليه ....
ام عسل ....يمة خابري ترة كلبي مثل النار صاير هذولة راح يضيعوه ...
جنت اخابر عليه بلا حس ابوية ولو ابوية هم جان مدمر ع فراكه بس المفروض ميعوفه لحد ماقنعته حتى نرجعه لان راح يضيع من وراهم وخصوصا هم علمود فلوسه وهم جان عنده بلمصرف بأسمه يعني راح يكتهن عليهم رحت ع اسعد توسلت بيه حتى يقنع ابوية ويرجعوه للبيت وخطية راسن قبل لان مجان متوقع من ايهم يوصل هيج مرحلة ...
اسعد ...حجي ميصير ترة راح ينجرف وياهم ويروح يسوي مصيبة بروحه وبعد ميفيد الندم الحجي كام يضرب صفنات والحجي صدك بعدين منلحك ع المصايب الي احتمال يسويها لأن الشرب والحبوب تضيع صاحبها وحتى صحته تتلف واخيراا ابوية قبل وضلينا ندور عليه علما كدر ابوية يقنعه ويرجعه للبيت كل هذا وادهم ميدري ابد محد حجاله .....
رجع وامي طاارت من الفرحة تبوس وتحضن بيه وتبجي.......
للحكاية بقية.
