اخوه مقبل لافصل ولاصلح ولافلوس يريدها دم ليش كسروا اخوية وشكو بطنه....
بكلبي غير اخوك عار وحرامات مخلصتكم منه ..
ياسر...ابوه للولد واخوته وعمامه قابلين بلفصل لان يعرفون ابنهم يعني لوما ضربته جان احنة طالبناهم عزة بعيني علمودي يمة الحمدلله والشكر يارب بس احنة علمود يتنازلون عن قضية ايهم ويطلع من سجنه...
عسل ..مرت ايام واحنة نلتقي ع الغدا والعشا كام يجي ع الغدا علمود ابوية عود عيب منه وبليل نكعد نتعلل وعيني عليه ابد ماداجوز مادري شبيه ودعاء طبعا من يومها انتبهت بس محجت يمكن محبت تحرجني اي غير ابطل من هاي السولة عيوني تخوني وتصفن عليه ..بين يوم ويوم اخابر ادهم اطمنه وابوية يحجي وياه ومستمره بدواه وعلاجه الطبيعي والحمدلله الوضعية مستقرة واني تحسنت الحمدلله جابلي ممرضة للبيت تضمد الجروح ميقبل اطلع يكول اخاف احد يعرفج من عدهم ويشوفوج منريد مشاكل لحد منحلها ليش مشتل هيجي مادري وهو حتى مينطيني ريك حلو بس صباح الخير والسلام وبس ..مرة صبينه غدة الظهر ابوية نام مراد والحجية جانت رايحة لبيت اختها هي وسرى ضلينة كاعدين اني وياه ودعاء تغدينا دك تليفون دعاء
راحت عليه ضليت وحدي وياه رأسن عضيت لساني وعيوني دمعت هلكد ماوجعني ماعرف ليش ارتبكت من بقينا وحدنا هو خطية فز من عطيتي ...
ياسر..خوما اكو شي ..
عسل...لابس عضيت لساني وديوجعني بلة فتحي حلكج وطلع كلينس ونطانيا مسحت حلكي لان طلع دم ..
ياسر..ليش متوترة شبيج وهو مدنج دياكل ..
عسل..شلت راسي لا ماكو شي ليش متوترة ..
ياسر...ماعرف احسج هيج..
عسل... جان يشيل راسه باوعت بعينه ومجاوبته ...
ياسر...الووو يمعودة وين رحتي...
عسل... لا بس دافكر بوضعنا وانتو شنو ذنبكم وخاف خطر عليك السالفة لغمطتها مدري شلون ...
ياسر...لتفكرين بعد بهذا الموضوع وشيلي من راسج نهائي ولتخافين من شي مدام اني موجود يحجي واني صافنة بوجهه ..ويمكن طلعتيلي الي بذات بهذيج الليلة حتى اوكف وياكم كلشي اله بيها حكمة فلتفكرين زايد كمل كام غسل وطلع واني اباوع عليه شبيه ياربي اني ليش هيج صار بيه مداتحمل احس اعصابي ترخى من اشوفه وهو عليه برود يموت يكتل كتل معقولة يحب وحدة ومجطل وياها ومعتبرني لا وجود لي مداعرف اوووف يمة افادي راح يطك كمت داشيل المواعين طبت دعاء ها ولج وين رحتي...
دعاء.. لج هاي صديقتي خابرتني ونسيت حتى الاكل لعد ياسر وين ...
عسل...كمل وطلع كعدت وياها نسولف وناكل حجيتلها كلشي وع اخوتي وع عيشتنا وحتى على بيت ام محمد زادت علاقتي بلبنات وبأمهم كلش تحبني واني هم اموت عليها وعلى حجيها من تكعد تجيب بهلامثال والقصص تونس الواحد تخلينا مندمجين وميهلج تعوفيها وتكومين ..وياسر هم كعدته حلوة وشقاه وية خواته ووية امه نوبات يتمطرك بحضنها وتلعب بشعره يعني كلش اخذوا علينا واحنة هم تعودنا عليهم هواية حتى ابوية مستغربة عليه شكد تعود وذب ميانة وية ياسر خصوصا حتى اكثر من اسعد ومن اخابر ادهم الا يحجي وياه يعني تقريبا صاروا اصدقاء وطبعا محد يبلغني اي تطور علموضوع بس يبلغ ابوية ماعرف شنو هاي تصرفاته الباردة وياية ريك حلو ماكو يادوب مسويها رسميات ومرة حجيت لدعاء لج مدا أكدر اشيل عيني عنه ماعرف يمكن مراهقة..
دعاء...لاحبي هو ياسر شخصييته كلش تبهر يمعودة تعاي شوفي صديقاتي شلون كاتلات نفسهن عليه مرة وحدة من صديقاتي صارحتني الي عبالك اليه مو اله هههه ..اني معجبة بأخوج وراح اموت عليه...
عسل.. وينها هسة صاحبتج هاي ..
دعاء... والله جانت شوية مو تمام مرة شافته ديوصلني وجلبت تعالي جيبيلي رقمه ومعليج فأني بصراحة كنسلتها ختولي..
عسل... واني هسة مثل هاي صاحبتج ..
دعاء...لا يولي هاي شبيج بس دابينلج انو هو فعلا شخصية تجذب واحتمال مو اعجاب احتمال حب ..
عسل...ماعرف اول مرة يصير بيه هيجي ابقى اصفن بوجهه ومن يباوعلي انخرط ولج متضل عندي رجلين يعني دا أحس نفسي كلش خفيفة ...مر على كعدتنا وياهم شهرين وادهم تأجلت جيته شهر لاخ لان يريد يكمل ويستلم شهادته يلة يرجع يكول حتى مارجع بعد لهناك ..واحسهم كيفوا بوجودنا وياهم ..بعد احسن شلون اذا طلعتوا هذا حجي خالة والبنات وهو ساكت راح يجلطني زين نظرة تايهة واني الكفها معليك بس باوع مو سويت علة بزردومي ...زاد تعلقي بي ماعرف يمكن لان لابسني وقررت احجي وياه او المحله بأي شي مو راح اتخبل محد ديحس بناري حتى دعاء معرفت شتجاوبني قابل شنو الي بايدها ..نوبات يشمر حجاية نوبات ابو الهول ينطق وهو ساكت صار بس الجمعة يتغدة بلبيت اغلب الاوقات ياكل برة بس ريوكه وية امه وابوية ابد ميتريك برة حتى لو متأخر والعشا هم لازم بلبيت وكلش متابع خواته نوبات يدك عليهن باب الغرفة ويجي يكعد يسولف وياهن واني الزك ...خرب شكد لزكة ومن اشوفه بغرفه امه واطب فجأة شكد ثقيلة غير اطلع اطب وما اطلع الا هو يطلع ....
قررت ابينله او احجيله حسب الفرصة .مرة من المرات كاعدين ع العشا بليل طبعا هو اجة متأخر خابر كال شوية واجي اخاف اتأخر اكلوا عاد صبينا وكعدنا واني ميهلي اكل احس نفسي مجوعانة كلها تقريبا خلصت بعدنا اني ودعاء وخالة ابوية يتعشا ويروح ينام لان دواه بي منوم وسرى صعدت نامت بقينا نسولف ومنحس الا وهو على راسنا طب سلم وراح لغرفته سألت خالة شصار من شغلة الشيوخ مال عشيرة وشغلة ايهم لان كل مااسأل ابوية يتيهة عليه وميجاوبني ....
ام ياسر..والله يمة ياسر ديركض بيها وابو محمد هم واحتمال يكعدون لان الولد حالته تحسنت واخوه هذا الي يهدد مسكتي بسفرة هو جان رايد يطلع لجوء لالمانيا نطوا اهله وزحلكوه لان يدرون هاي السالفة بيها خوش هبرة ...دخل فسكتنا..
ياسر.. ها السلام عليكم ..
ام ياسر...وعليكم السلام شلونك يمة شعجب تأخرت..
ياسر.. والله يمة علما حاسبت العمال وعزلت وشوية صديقي مر عليه وتأخر يمي مطلع خوما أطرده ...
عسل...هو باس راس امه وراس دعاء واني بالي يمه كلت حتى لو اني ابوس راسه بس لو يصير ..
ياسر...شلونج عسل ...
عسل...يمة كلبي يمة هاااا الحمدلله بخير ...
ياسر...الحجي شلونه...
عسل... بخير الحمدلله ..خالة كامت كالت بعد ماكدر اكعد ظهري راح من الكعدة ودعاء هم راحت كالت مااحب السهر اروح العب رياضة وانام ولملمت المواعين الفارغة .. ضليت كاعدة كلت بلكي تجيني الشجاعة واجفص قصدي احجي ..
ياسر...عسل اذا خلصتي روحي اني الملم ..
عسل...لا عادي ماعندي شي ..
ياسر...ترة اني متعود ..
عسل...لان شافني كاعدة وصافنة ومدا أكل شكد عيب خرب ضميرج عسل شصارلج ...بعدين كلت كافي لو بلهدف لو بلنجف يلة عسل انطلقي هو حس عليه ...
ياسر...تريدين شي تكولين محتاجة شي كولي ..
عسل..اني سكتت ودنجت ..
ياسر...احجي اسمعج ..
عسل...اني كمت اعتعت لا بس العفو ردت احجي وياك بفد موضوع واتمنى متفهمني غلط ..
ياسر...لاعادي كولي ...
عسل...كمل ودفع ماعونه مسح حلكه وباوع عليه واني عيوني غرغرت من الرهبة والموقف الي اني بي بس اني مداأعرف ليش هيجي داتصرف يعني هو ابد ممبادلني اي مشاعر او نظرات شنو هلجرأة الي تخليني اني الي اصارحه توكلت على الله ....شوف اني اول مرة احس عندي مشاعر اتجاهك ماعرف شوكت وليش هو دنك وطلع جكارة يمة تخبل بيده بلة اني بياحال ...
ياسر....اي كملي ...
عسل..وبصراحة اني مو مراهقة او انبهار بيك وبشخصيتك صح الي سويته يخلي الكل يحترمك ويعزك بس اني زادت عندي السالفة يعني كايمة كاعدة انت كبالي من اشوفك ميهلي اوخر عيني منك ومن تتأخر اخاف موت عليك واعرف الوكت مو زين واظل الوب حتى ترجع واطمئن عليك وحتى العشا الي تحبه اني اسويه واهتم بي حتى من تجي تشوف فد شي مختلف وردتك فد يوم تسأل او تنتبه ماكو بصراحة ماعرف منين جبت هاي الجرأة وحجيت وياك هيجي اني اسفة ... طبعا احس وجهي كام يطلع منه نار ورجلي ترجف وبس افرك بأيدي سكت واني ماعرف شصار بيه تقريبا 10 دقايق كاعدين وهو ولا كلمة الفشلة الي صرت بيها ماعرف شلون تحملتها كمت داريد اطلع ....
ياسر...اكعدي خلي احجي ....
عسل....ميحتاج جوابك وصلني ....
ياسر....شنو وصلج ....
عسل....ميهم افتهمتك وخلص ممكن اروح انام...
ياسر... لا مو ممكن وطلعي وراية للحديقة بدون حجي .....
وللحكاية بقية .....
