كملو كلشي وطلعو ديدفنوها وابو محمد كل شوية يجر ايهم لان يريد يطلع يروح يكتل صديقه الي اسمه سنان وبلكوة يجره ..اسعد...
انت ابنها ابقى وياها باخر لحظاتها بلدنيا لحد ماندفنها نعرف نروح نأدبه...
كملنا كلشي وطلعنا للبيت وامي سودة عليه رجعناها جنازة طببناها للبيت وملخت روحي من البجي والصياح لج يمة كومي يام كلب الطيب ام الروح الحلوة وين رايحة الدنيا بلياج سودة واظلمت شيرجع النور بيها حاضنة تابوتها ونايمة عليه اجتي مروة كومتني دابدل هدومي لان يريدون ياخذوها يدفنوها رحت بدلت .ابوية جان مشتري كاع بكربلاء بوصية من امي انو نسوي مدفن لعائلتنا هناك وفعلا اندفنوا جدي وبيبتي هناك ..بدلت وطلعنا كلنا اجتي مروة وياية وابو محمد ونص اهل المنطقة واخذنا ابوية هم ويانة وطلعنا واني الطريق كله صافنة ع الشباك معقولة لا لا فدوة هسة تكوم ترجع ويانة امي بعدها مو جبيرة ومشافت اخوتي متزوجين ولا شافت جهالهم ادهم شراح يسوي من يعرف ادهم صارله 4 سنوات مشايفها..
وهي سودة عليه حست راح تروح يومية توصيني اخوتج يمة ديري بالج عليهم ووصتني بايهم ديروا بالكم عليه ولو هو طايش لحد يحسسه هو غلط ياغلط ياامي من وراه عائلتنا ادمرت ورحتي انتي شراح يسوي بروحه مادري شراح يكول لنفسه امي شبيها امي ليش راحت سكر هي عدها سكر من يومها ظلت تضغط ع روحها هواية ...
كل هذا كاعدة افكر بي ودمعة منزلت الطريق كله لحد مكالو انزلوا وصلنا نزل ايهم يركض يريد يشيلها لان ديحس بلذنب والي صار كله من وراه من ورة هذولة الي جابهم ودخلهم لبيتنا امي انتكست حالتها وابوية هم .
نزلت ومروة كايدتني امها وابوها كبار بلعمر مو حمل طريق فمجوي ويانة نزلوا التابوت واني صافنة معقولة لا عفية رجعوها ركضت ركضة جلبت بايهم ايهم نزلها نزلها الله عليك وين موديها اني مارجع بلياها نزلها هسة بس تشوفني تكوم هي كالت ماعوفج ومروة تجرجر بيه جرتني كعدتني بلكاع وراحو اخذوها واخذوا روحي وياها واني داشوفها ينزلوها وايهم حاضنها. لك ايهم صيحها هسة تكعد كللها عسل راح تتخبل ايهم يباوع عليه ويبجي وراحت الحبيبة وراحت ريحة الجنة جوة الكاع وايهم حاضن ترابها وكاعد وابوية سودة عليه مشفته مكسور بكد اليوم اباوع عليه كاعد بسيارة لان محد كدر ينزله بكرسيه واصلا محد جابله الكرسي رحت وكفت يمه ..
ابو عسل...يابة ترحميلها ترة دتحس بينا وراحت يم رب كريم..
عسل...مادري يصبر روحه لو يصبرني كعدت يمه خليت راسي بحضنة وظليت ابجي لحد ماكالو يلة نطلع كمت بست راس ابوية ورحت حضنت ايهم وبجيت بحضنه وهو يبجي بجي عبالك مرة ..
ايهم...عسل انكسر ظهري عسل اني الي موتتها ...
عسل...سديت حلكه كلتله كافي عيوني انت قدر رب العالمين وميصير نعترض على حكمة الله اني داأحجي وحسيت الهوا ضاك بيه محسيت الا وديرشون مي بوجهي وايهم يضرب بخدي ..
ايهم...عسل اكعدي ترة مداتحمل الدنيا كلها ضاكت بيه...
بس فتحت عيني حضني شربني مي وكمت ..لتخاف بعد اختك لتخاف مابيه شي جان رحت يمها مو عايفتها وحدها جوة التراب وراح نعوفها ونروح كمت كادتني مروة وصعدت كعدت يمي وايهم صعد بلسيارة الي ابوية بيها طلعنا واني محاسة باي شي شلون الي مبنجيها وراح يودوها يستأصلون كلبها ريتني بمكانج يوم وين رايحين وعايفيج جان وكت عصرية داخلين على مغربية لان زورناها وبعدين بقينا كاعدين ساعتين يلة كمنا طلعنا وصلنا جانت دنيا ليل رحت اركض سبحت وكعدت اقرالها قرأن وكعدت اصلي صلاة الوحشة وكل شوية ايهم يطب عليه واني بعالم ثاني مبقة شي مسويته ونزلت لكيت مروة وام محمد ديسوون عشا واهلها كاعدين يم ابوية وايهم وناس كومة من المنطقة رحتلهم بوستهم ..متشوفون شر واخدمكم بس بالافراح خطية ظلن لا لتكولين هيج احنة اهل شتحجين الحجية جانت امنا كلنا بحنيتها وطيبتها ودومها فاكدتنا وامي جانت دوم تواصلهم ...كملو العشا وصاحو على ايهم اخذه للعالم الي جانت موجودة وجابلي ابوية طببته بغرفتهم وداحاول اوكله لان اذا ما اخذ دواه تتخربط حالته وبلكوة اكل لكمتين ودموعه موكفت ........
كفت الفاتحة وناس رايحة جاية دتعجب ع المنطقة الي اعرفها والي ماعرفها طبت تاخذ من خاطري وتحمد بأمي واخلاقها وطيبتها ومواصلتها وية الكل ...
خلص كلشي واني خايفة من ايهم ليسوي شي ويجيبلنا مصيبة لخ حجيت وية ابوية ..
ابو عسل...لا يابة حجيت وياه وهو وعدني ميسوي شي من كلتله امك مترضى عليك ...
وادهم سودة عليه مكدرنا نضم عليه واسعد تولى مهمة يبلغه الخبر ....كطع ومخابر صارله 4 ايام ووابوية كل شوية بابا عسل شوفي اخوج دكي عليه اريد اسمع صوته ..
اخابر وميجاوب ورة يومين كتبتله جاوب لان ابوية راح يلحك امي من القهر وانت همين علينه رأسن دك كاميرا وعيونه مبين صار كووومة يبجي...
ادهم.... لج عسل اني بعيد وصار كومة مشايفها صابر على غربتي على امل اشوفكم واكحل عيني بشوفتها تدرين شكد مشتاك لحضنها ومشتاك لريحتها راح اموت من يوم الي سمعت واني حتى جامعة مرايح كليلي شسوي راح اتخبل حتى نوم مدانام ...عسل انتو سوة واحد يصبر ع الاخ اني وين انطي وجهي وحدي .......
عسل....كافي ادهم ابوية راح يموت من القهر الصار مو مو سهل علينا كلنا لعد اني شأكول من افقد ماعرف شيصير بحالي بس اشوف ابوية وانو احتمال الله ليكولها هو هم يروح مني اكوم واقوي روحي ..فدوة خوية كافي احجي ويا ترة حالته حالة كلنا مدنستوعب الي صار ابوية حالته رجعت ليورة كأنما كلشي ممسويتله فدوة اروحلك احجي وياه وصبره برجعتك وكمل وارجعلنا لان اني احس نفسي على شعراية وخلص انكسر ادهم مالي غيركم وابوية ماكدرله وحدي جانت سودة عليه وياية اني هسة وحدي ولتسالني اي شي بعد لان راح انزل التليفون لابوية واحجي وياه نزلت من غرفتي وديت التليفون لابوية وبدة شوط لاخ من القهر ابوية وادهم تكابلوا واني واكفة عيوني غوشن من البجي اسمعها واذكرها بكل مكان بلبيت وبكل حركة وبكل حجاية وكل كلمة طلعت من حلكها ...اووووف يا قهر الام من تروح الكلب ينشلع من مكانه وفراكها يكسر الظهر كملوا وابوية صاحني... ابو عسل...تعالي ادهم يريدج ...
عسل...ها حبيبي كوة ..
ادهم...هلا حبيبة ماوصيج بلحجي لحد ماأرجع راح احاول اكمل بسرعة واجي اطمئني بس ابوية امانتج عسولة عسل...شتوصيني ادهم شعندي غيره بعيوني تك راحت مادير بالي ع الخ اطمئن حبيبي بس بسرعة عيوني انت منتظرتك خلص فدوة اروحلك ...
ادهم....ان شاء الله حبيبة يلة اني اتوكل بسلامة يارويحتي عسل...مع الف سلامة مودع بالله حبيبي ..سديته منه ورحت لابوية هاحجي نتعشى لان ورانا دوة....
ابو عسل... شسوي بي بنتي عوفيني لتعبين نفسج وياية خاف تعبج يروح حرامات وداعتج احس نفسي راح الحكها .....
عسل...ليش يابة ليش وتعوفني اني وادهم وايهم يتامى منكم اثنينكم ليش يابوية فدوة اروحلك كافي حجي يتعبك ترة مالي غيرك فدوة لعينك بست راسه وكمت اسويله عشا رحت للمطبخ اكمل العوي مالتي الي مديفك مني كلما اشوف روحي وحدي متبقة دمعة تعتب عليه واغسل وارجع ..غسلت ورجعت عشيتة ولو كلشي مأكل وشربته دواه وبقيت يمه افركله ايده ورجله لحد ماغفه وكمت جانت دنيا ليل دكيت ع ايهم كال جاي وية ابو محمد لتخافين ..ظل بالي يمه لان اعرفه مراح يسكت بس مأمنه لان وية ابو محمد خطية مديعوفه ولا ديعوف الشغل كل شهر يجي وية ابوية يتحاسب مال شهر وابوية ميقصر وياه خطية صاحب عائلة جبيرة وبس هو يشتغل وايهم ابد ميدخل بلحسابات ولا اله خلك لهاي السالفة خصوصا من بعد الي صار الشغل بس يريد يطلع من البيت ..
للحكاية بقية......
