تخربطت امي بأدينا معرفنا شنسويلها هذا الي جنت خايفة منه وكعت وهو ولأول مرة ورة سوالفه التعبانة انهبط وشالها وطلع راح للمستشفى شكد صيحت عليه مجان يسمعني جان خايف عليها واني هم ضليت بين ابوية الي جان يصيحني وماعرف شجاوبه وامي الي وكعت ومرحت وياها طلعت اني وعباتي ع بيت ام اسعد طلعتلي امهم خرطتلها كلشي واني ابجي واعيط ..
ام اسعد....يمة اسم الله هاي وين جانتلكم عين يمة عين وصابتكم ...
ع صياحي اجتي مروة وام محمد وابوهم كلهم يم ابوية ورحنا اني وابو محمد وكعدت اتعذر منه ع خبصتهم ويانه طلعنا ودنشوف اخذ امي بيا مستشفى الطريق كله اخابره احاول احصله حتى اعرف يامستشفى والولد يهدي بيه ويحاول يسكتني لان صرت فلم اني الي وكعت بيها وامي سودة عليه الي ماعرف شنو حالتها بلكوة يلة جاوب كام يعيط عليه كلتله بس انطيني اسم المستشفى اخذه ابومحمد حجى وياه ورجعلي التليفون ...
اسعد... صلي ع النبي وادعيلها تكوم بسلامة ..
عسل....امين ياااارب....وصلنا للمستشفى واني رجلي متشيلني احسهن خدرن من الخوف امشي بلكوة اجر بروحي جر واسعد يسأل لحد ماعرفنا امي بلطوارئ وصلنا وادور ع ايهم ماكو انسطرت وين راح وعافها شوية واجة شفته غاسل راسه يريد يصحه من السم الي جان يشربه وكت الهوسة، شافنا كلشي محجة حتى وية ابو محمد كعد بلكاع وايده ع راسه جنة ننتظر الدكتور يطلع واني هم كلشي محجيت وياه انتظرنه تقريبا ساعة ونص وكل شوية جاية ع غرفة الممرضات اريد احجي وياه يجي يفهمني ماكو المن اسأل ياربي.
طلع الدكتور كال السكر كلش صاعد عدها ولو متأخرين شوية جان خسرتوها اني الدموع موكفن وايهم عين عليه وعين ع الدكتور ولا حجيت وياه كلمة. وتوسلت بلطبيب حتى اطب اشوفها بلكوة وبلتواسيل يلة قبل طبيت سودة عليه نايمة ودمعتها على خدها كعدت يمها ربع ساعة دخلت ممرضة طلعتني كالت روحو ماكو داعي وجودكم لان اصلا محاسة عليكم والصبح عود تعالوا ،اني مقبلت اروح ابو محمد توسل راد مقبلت اطلع من المستشفى وايهم صافن عليه اجة راد يحجي منطيته مجال كعدت بلكاع وتربعت راح اسعد بس وصيته على ابوية فدوة ابو محمد ابقوا يمة لحد ماشوف جارة امي ماكدر اعوفها لتسوء حالتها....
اسعد....تدللين عسولة لتشيلين هم الحجي احنة يمه موجودين لحد ما الحجية تكوم بألف سلامة ....
عسل...امين يارب تسلم وكفاتك متنسي يحفظكم ويحفظ الحجي والحجية ويحفظ جهالك ...
اسعد....لتكولين هشكل احنة اهل لعد اذا الكم منوكف المن نوكف ...
عسل ....تسلمون يارب...كل هذا وايهم واكف ومدنج راسه رحت ع الممرضة فدوة اذا عندج جاكيت عباية لان طلعت ركض وكلشي ملابسة طلعت بلتراكسود خلف الله عليها نطتني جاكيت بهاري طويل لبسته وكعدت لفيت شعري ولفلفت روحي وكعدت وانتظر لحد ما غفيت مادري شكد نمت كعدت لكيت ايهم هم غافي ع الكرسي لمحت دكتور من بعيد،فدوة دكتور طمني حالتة امي شنو ..
الدكتور... اطمئني حالتها شوية استقرت شوية وتكدرون تشوفوها واحتمال للصبح تطلع ماعدها غير العافية...
عسل...تسلم دكتور رحمه الله والديك متقصرون اباوع الساعة راح يأذن الفجر اريد اصلي ماعندي حتى ربطة كمت افتر بلكي اشوف هذني الخفر خطية مقصرن بلكي كاعدات مديت راسي اشوف امي ترزلت من ممرضة اكعدي اختي لتجيبيلنه الحجي احنة دنطبلها كلسع شنو هلملحة صفنت اني بلة شلحيت اشو كاعدة طبيتلها مرة وحدة وسكتت كلت خلي اروح بلكي تنطيني مصلاية وربطة طبيت والله كاعدات اثنين حجيت وياهن مقصرن خطية وحدة منهن مرة جبيرة نطتني عبايتها كالت توضي وصلي هنا وين تروحين تصلين بلممر والله دخلت يمها توضيت وصليت الحمدلله ودعيت ربي يكوم امي بسلامة ماعندي غيرها ...ربي وين اروح وين انطي وجهي بعد امي وابوية وايهم غاسلة ايدي منه لحد ماادهم يرجع ...
طلعت لكيت ايهم كاعد ويبجي رحت يمه هو حجه وحده ...
كال عسل شلون اذا امي صار بيها شي من وراية اني شسويت بروحي وبيكم ابوية من وراية انشل وامي الله يعلم بحالها .....
باوعت عليه كلشي محجيت ساكته يحجي يحجي وحده لحد مااجة الدكتور دخل واحنة كاعدين ننتظر كال تكدرون تدخلون الوالدة الحمدلله صحت وتريدكم دخلت ركض شفتها وجهها اصفر سودة عليه رأسن سألت على ايهم وابوية طمنتها جانت الساعة تقريبا 6 الصبح طب وراية ايهم منزل عينه ويمسح بدموعه امي باوعت عليه صاحته تعال يانور عيني هو رأسن شهك شهكة ماانساها وبجة بجي مصاير ...
ام عسل... كافي ياعزيز امك اني مابيه شي لتخاف عليه بس كون انت سالم وهو ميعرف شيحجي...
دخل الدكتور يلة حجية كافي كومي خوفتيهم عليج خطية الليل كله كضوها بس بجي .
عسل... شعدنه غيرها دكتور بس كون تكوم بسلامة...
الدكتور.... اطمئنوا نزلنا السكر وصار عدها انهيار عصبي بلكوة سيطرنا على السكر تكدرون ساعة ساعتين تطلعوها ماعدها الا العافية سلامتج حجية...
ام عسل.... الله يسلمك يمة ويحفظك لشبابك ...
الدكتور....تسلمين حجية اني كتبتلها دوة تاخذوه لان اني خلص الخفر مالتي تسمحولي ...
راح الدكتور اجتي المرضة ضربت امي ابرة ...وايهم يبوس براسها وايدها وهي عينها عليه ...
ام عسل... كافي يوم اني اموت اذا صار بيكم شي ...
وهو بس دموعه تحجي واني عيوني موكفت اول مرة اشوف امي نايمة بفراش ومريضة طول عمرها شمعة وتضوي وتكتم الالم وتتحمل المرض عمرها مشتكت من شي دومها تهون علينه الوجع والالم ولا فد يوم كالت مالي خلك ماكدر اكوم مابيه حيل دومها صامدة وهذا حال كل امهاتنا العراقيات لحد ماهدها الزمن والقهر الي وكعها على غفلة فاتت ساعتين تقريبا 8 ونص دنريد نطلع اجة ابو محمد وامه ومروة حبيبتي بقت يم ابوية هي وابوها معبالهم نطلع خطية وامه بلكوة تجر بروحها مرة جبيرة وفقرات وشوية هي متروسة كايدها اسعد وتمشي بوستني وتعذرت مني...
ام اسعد ... خالة مكدرت اجي البارحة تعرفيني مابيه حيل بس اليوم لحيت ع اسعد يجيبني ...
عسل...لا خالة فدوة لعينج ينطيج الصحة والعافية مجان لازم تجين احنة هسة راح نطلعها الحمدلله صارت احسن والطبيب طمنة عليها وكال تكدرون تطلعوها جان السكر صاعد بس الحمدلله كدرو يسيطرون عليه ...
ام اسعد....يمة اسم الله سودة عليه ام ادهم منين اجتج هاي المصيبة وكامت تعدد بلمستشفى يبووووو ....
اسعد....يمة دكومي فضحتينا احنة بمستشفى يمعودة والحجية مابيها شي هسة طالعين ...
بلكوة كومها ابو محمد من الكاع وكعدها على كرسي بلممر ايهم بلا حجي كمل كلشي وجاب الدوة دنطلع اعتذر من اسعد بكلمة وحدة اني اسف ابو محمد ...
اسعد....ولا يهمك ايهم انت اخوية الصغير واحنة اهل ...
طلعنا بسيارة ايهم وبيت ام اسعد بسيارتهم ..
للحكاية بقية ....
