عسل...دعووو حبي انتي اكو احد ابالج لان اريد اخطبج لادهم اخوية ..صفنت..
دعاء.. شنو ...
عسل...اي والله البارحة كعدنا اني وياه نكتب وداكله مشفتلك وحدة هناك ميقبل مناك يكلي اريد تشوفيلي بنية حليوة واخلاق وتربية وطبعا من ديحجي تصيرين انتي كدامي فمكلتله بس كلت اكلج واشوفج اخاف اكو شي منا منا ..وبصراحة ورة دورة السنة مال امي نريد نستقر دعاء عائلتنا تفردشت وابوية ماله خلك ع الاقل يلتهي بجهال ادهم ويفرح امي بكبرها ..والي افتهمته ولو محد ديحجي كدامنا شغلة ايهم انحلت مسألة وقت ويطلع ان شاءالله ..وبصراحة حبي اريدج اخت الي وما الكة احسن منج شكلتي ولج صار ساعة اخرط حتى تعبت ..
دعاء...ولج دوكفي غير يشوفني بلكي معجبته ...
عسل...ههههع دزيتله صورة وجلب ..
دعاء...عزة بعيني شدزيتي ..
عسل...اييه لتخافين شبيج دزيتله صورة تتذكرين من اخذناها كلنا وحتى خالة بيها وجنتن مستورات انتي وسرى لتخافين وشافها وعجبتي وانتي هم شايفته بصورته الي علفيس والله هو حتى احلى من الصور .. ولج شكو احمريتي هو بس اني وياج اشو اني انفضحت كدامج ومخجلانة ..
دعاء... لا لج يولي تدرين هاي اول مرة انخطب بيها لان ياسر من هاي الناحية كلش مضيقها يعني حتى اذا يجون عن طريق الاهل يصرفهم ودشوفين لا طلعة ولاطبة ابد الا هو ويانة ..وهسة داأحس بفرح ع خجل ع كل المشاعر ومضطربة مداعرف افكر ..
عسل...عوفي اني افكر بمكانج اخوية يخبل خلقة واخلاق اصلا مينرفض ولج اخبلج اذا مقبلتي شوفي حبي اخوية ان شاءالله كمل ماجستير طب عام واحتمال تخصص والله مادري عندة بيت بأسمه وشكله يمة رويحتي يخبل اشكراني ع ابيضاني دكتور وعندج الحساب عبالك الطب يختارهم نظيفين ههههه ولج بس اني جلحة ترة ..حتظلين صافنة دحجي عاد داأكول لابوية يكول لأمج ولاخوج حتى نتفق على كلشي قبل ليجي ادهم ..
دعاء...اوووف والله مادري..
عسل...اوكي لعد اني عرفت اسكتي وخلي الباقي عليه ...
اخطب للعالم واني كلبي محروك حرك منك اووووف لو اكدر ادخنلي فد وحدة داشوف نار كلبي تبرد لو لا.. صبينا العشا مصار عشا صار سحوور صاحته دعاء اندار لكانه كاعدين بلمطبخ اجة وكعد بمكانه رحت جبت ابوية كعدنا تعشينا حسيت نفسي شكد تافهة هلكد مضحكت مادري شردت ابينله يمكن ردت اغطي ع شعوري بانو اني لاشئ بلنسبة اله هو ساكت يحاول ابد ميشارك خلصنا واني كمت اول وحدة لملمت المطبخ لحد ما كملو سوينا جاي عفتهم ورحت ع دوه ابوية شربته عبالي اودي لمكانه ..
ياسر..عوفي اني اودي كاعدين نتعلل من يتعب اني اخذه ..
عسل.. مجاوبته بست راس ابوية وداصعد ..
ابو عسل... وين رايحة يابة هواية دتنامين...
عسل.. لا والله يابة رايحة اخابر ادهم عاجبني احجي وياه شوية وراها انام ..يالهي ليش هيجي ديتصرف والله احسه يريد يحجي بكلبه شي ليش هلبرود عابت هلشكولات رب العالمين شكد حاط بيك حسن ..صعدت كعدت احجي وية مروة وبعدين خابرت ادهم مجاوبني يمكن مشغول كلبت شوية بلفيس دخلت سرى كعدنا نقشب متحب بيت خالتها تكول منافقين يعيبن ويوصلن حجي يعني شغله اذا صارت عد احد ثاني يوم العشيرة كلها تدري خالتي زينة بس بناتها الله ميجرعهن ..شوية دخلت دعاء اباوع عليها مستحية ولج شكو ..
دعاء..ماكو شي ..كومي سرى امي تريدج شتريد مني مو هسة جنت جوة ماعرف كالت خلي تنزل اريدها ..راحت واجتي دعاء كعدت يمي انتي شبيج فهميني...
عسل.. مابيه فدوة دعاء سدي الموضوع ماريد اتذكر اي شي ...
دعاء...لا والله كلشي نحجي ..شوفي ياسر متزوج صارله 5 سنوات تعرف عليها من اصدقائه ماعرف بت صديقه اخت صديقه مادري المهم بوكتها مجان ناوي يتزوج وع غفلة كال راح اتزوج امي كلتله اني اخطبلك مقبل كال اني اريد وحدة طبعا هي اصغر منه بكم سنة هي حلوة بس اخلاقها زفت انصدمنا بيها وبتصرفاتها زعطوطة ومتحترم احد ويومية زعلانة بس طبعا من هو موجود شوفيها شلونها ..
المهم كامت تصير مشاكل وهي من النوع اقل مشكلة تطلع زعلانة بلا متكله وطبعا الحمدلله مصار اطفال ع اساس دتراجع وهو هم مد يلح بسالفة الاطفال لان بزع من المشاكل فمراد اطفال لان لايعتمد عليها ابد النوب اطفال يكول متعرف تربيهم فماريد اطفال وخلص.. المهم كثرت المشاكل وتجاوزها علينا وع امي وطبعا من تتجاوز ع امي منسكتلها .. وجايفة كلشي متسوي بس نايمة ومن يجي تفز متبقي شي متسوي ..اخر مرة قبل 5 اشهر اجني صديقاتي اثنين من الكلية وكاعدة اني وامي وسرى وياهم بلصالة والبنات مطلعن ابد نزلت الخاتونة من فوك وهي نزلة هو طب طلعت سرى من الصالة حتى ليطب علبنات وهو ميدري منو اكو اصلا
ف سرى كلتله صديقات دعاء جوة بس شلون مزز يكطعن كلها همزين كتيلي حتى اطب ديتشاقة ولة هو من عاشر المستحيلات يسويها هي سمعته عياطها وصياحها شبينة منعجب وتباوع ع هذني الساقطات يريد يلصمها ميكدر اخذها سحل للغرفة ضربها راشدي وكعت وكعة لان مدتسكت وشفت وجهه مزورك خية وفشلت فشلة كدام البنات من ورة عياطها ضلن صافنات هاي شكو وامي متعرف تجاوبهن كلتلهن عدنا وحدة مخبلة بلبيت اختزيت كدامهن شوية وكامن طلعن كلشي مكدرت احجي لان هو صاير نار كام وداها لاهلها ومن يومها ميقبل يرجعها ولا يقبل يطلكها يكول الا هي تطلب الطلاك ماريد اخش بخطيتها وتريد ترجع ترجع وحدها واحنة مالنا علاقة عايفيهم مندخل بحياتهم ...بس امي من شافتج رادتج لياسر وحست بياسر يريدج بس يحس روحه معلك بهذيج وميريد يربطج بانسان متزوج لهذا مديتخذ قرار لحد مايرتب اموره ..ترة النهار كله يسولف بيج ويوصي امي عليج كومة حتى امي انتبهت ..مرة كلتله شبيك وليدي ماكو حجية امانة ابوها واخوها يمنا لازم نحافظ عليها ..خو مرة تذكرين من طلعنا للسوك وهي المرة الوحيدة الي طلعنا بيها فد متوتر سوة امي فلم كللها اني اطلع اجيبلهم كلشي بس ليطلعون مع العلم اني وامي وسرى دائما نطلع للسوك زين صبري عليه ياعمري والله احنة هم منفرط بيج نريد اخوية يرتاح والله 5 سنوات متمرمر وياها ولاعبة بي وبينا طوبة ومنريد حسنا يطلع وتعرفين عدنا كرايب بس يحبون يتشمتون خصوصا بنات خالاتي لان جانن رايداته بس هو مقبل وراح جابلنا هاي مدري منين ...
عسل..شسمها مرته ..
دعاء..اسمها رشا هسة زين لو لا ...
عسل ..الله كريم حبي انسي وخلينا بموضوعج راح احجي وية ابوية باجر حتى لتتفاجئين تريدين اخابر ادهم تحجين وياه قبلها ...
دعاء...لا يمة عزة شحجي اسكتي فدوة اسكتي ...
عسل...ديلة لعد حبي راح انام لان احس روحي مطفية مددت هاي شنو هلمصايب معقولة يحبني ليش هيجي يسوي بحالي اني ناقصة قهر يلة لعد راح اشتغله ع البارد مدام قهرني هلقهره وماريد اتعلق بأمل احتمال ماكو شي منه صحيح .... مرت ايام بين كر وفر وماكو شي جديد واقتربت جية ادهم وسالفة ايهم ننتظر وان شاءالله خير لان محد ديحجي اي تفاصيل .. الى ان فد يوم كاعدين العصر بلصالة اندكت الباب طلعت خالة واني والبنات وابوية كاعدين وياسر طالع كلعادة ..طبت خالة وجهه مو طبيعي طبت رشا وامها السلام عليكم .....
وعليكم السلام ....
للحكاية بقية .....
