ورجع ايهم وابوية اشتغل مراقب عليه ولهاه بلشغل وكرب عليه حتى ليحك راسه بعد وفعلا فترة التهى وليل نهار وية ابوية بلشغل بس الظاهر مجان يكدر بلا الحبوب وجان بلا حس ابوية يشرب وامي هم حست عليه وكالت لابوية الي مكدر يسكت وتعارك وياه بهذيج الليلة....صعب اب وام يشوفون تعبهم يضيع من ورة ناس فارغة ..وتعارك وياه بهذيج الليلة الي انكلبت بيها حياتنا كلها .
ايهم انكلب وحش لان المخدرات سطرته وبيومها جان ماخذ هواية الظاهر . ظل يصيح بوجه ابوية ويكله محد اله سلطة عليه خنكتوني هو الواحد جم مرة يعيش حياته .واحنة صافنين عليه ايهم شلون هيج صار .....هو من جان صغير يحب الونسة والطلعة وممخلي شي بنفسه بس بلحلال وبحدود المعقول لحد ماخذته رجليه لطريق مامنه رجعة وحتى بوجه امي عاط وكله لابوية حتى سهرتي راح تكون بلبيت واريد واحد يمنعني وظل يخربط بلحجي لحد مابوية سطره راشدي عيونه صارت نار لاول مرة ابوية يمد ايده على واحد من عدنة بس هو الي جابه لروحه من ورة تصرفاته التعبانة طلع من البيت بعد ما هجمه بأيده ابوية وكع تخربط وحرنا بي اني وامي ...
ام عسل....لج عسل الحكي ابوج راح من ادينا بدون وعي ركضت على بيت ام اسعد مروة طلعتلي جان وكت مغربية خطية ركض خابرت على اسعد اجة وامها وابوها ويانا بس هم كبار بلعمر صحتهم ع كدهم بقيناهم ووامي لبست عباتها وشلنا ابوية وركضنا بي للمستشفى واني ولا منتبهة على روحي طالعة بلتراكسود وشعري لافته كبه لان جنت بلبيت وممحسبين للي صار...
ابوية ضربته جلطة والثانية خفيفة بس اذته سودة عليه ولاول مرة اشوف ابوية يبجي ونزلت دمعته مسحتها يابة فدوة اروحلك هدي روحك كلشي فدوة الك وداعتك يرجعلك والندم كاتله بس لتغث نفسك ...ابوية جان يحاجيني بعيونه لان لسانه ثكل وبلكوة يحجي وامي كضتها بجي.....
ام عسل... وين جانت النا والله ممسوين شي يغضب رب العالمين وينك يمة ادهم تعال الحكنا تعال شوف شصار بينا من بعدك...
اسعد بقى برة والدكاترة داير مداير ابوية لان خبلتهم لحد مااسعد كلي كافي ترة دوختيهم .اسعد اسمه ابو محمد جنت اصيحله احتراما لعمره ...
عسل...ابو محمد فدوة اروحلك ابوية راح يروح من ادينا...
اسعد.....لا الدكاترة طمنونا على حالته لتأزمين الموضوع ترة امج مدمرة لتزيديها صيري قوية لتروح امج هم توكع بنتي خلي ابوج يكوم بسلامة ازمة وتعدي ان شاءالله ....
ظلينا يومين بلمستشفى اسعد يبات يم ابوية واني وامي نروح ونرجع ومن ارجع اطمن ادهم لان ابوية مقبل نحجيله اي شي حتى لتأثر ع دراسته وهو المفروض جان كلشي اكله حتى يجي يسوي جارة لان محد ديكدرله للافندي الي كضاها سهرات بلبيت وابوية بلمستشفى وشكد حجيت وياه اني وامي عبالك متخدر مسطور وجم مرة اسعد هم حجه وياه شكد عيب من الولد طرده وحتى راد يضربه وهو الوحيد الي وكفلنا لحد مارجعنا ابوية للبيت بس جان ع كرسي لان الجلطة ضربت الجهة اليسرة ولسانه ثكيل والدكتور خوفنا من الثانية الي ممكن تحدد حالته يكلي الراحة وعدم الانفعال منين اجيبهن ذني مادري ...لحد ما فديوم جنا كاعدين جانت بعدها عطلة ومبادية الكليات جاب جماعته وطب للصالة وسووو ذيج الكعدة جانو وياه 5 نفرات عزة اني انسطرت هذا شديسوي ركضت لغرفة امي وابوية وقفلتها علينه .
ابوية ورة مصارت هيج حالته من المغرب اطببه للغرفة وابدي اسويله علاج طبيعي والحمدلله بدت ايده تتحرك ويحجي كلمات مو كلها مفهومة امي شافتني انهبطت كلتلها يمة اجة هو واصدقائه رادت تطلعله مخليتها ...
عوفي يا امي يكمل ويولون مابينا حيل هبطات بعد كعدنا بس امي مبطلت بجي وحتى صحتها بالنازل من ورة حالة ابوية ومنا هذا المسطور الي مدنعرفله حال وامي متخبلة على حالته نطيته الدوة لابوية وهو جان بي مهدأ كعدت فركتله راسه نام بس حسيت عليه هو نايم دموعه تنزل سودة عليه ديفتهم علينا مع انه جنه نبسبس بس عرف السالفة ومجان بيده شي يسوي استمرت هاي الحالة ومن يجون كبل اطب للغرفة واقفلها واحاول اهدي امي وما اخليها تطلع من جنا نخابر ادهم حجيتله حالة ابوية بس كلتله خسر بشغله دخل بيها وتأذة بس هسة الحمدلله ومرة مرتين شافه كاميرا كام يبجي عليه بس ممقتنع بحجيي..
ابو محمد جم مرة اجة وحجة وية ايهم الي صار شخص ثاني.. احجي وياه مرتين تعارك وياية وضربني وتعارك وية الرجال وطرده بس لخاطر ابوية يجي خطية ....
جنت اني اطلع للسوك ونوبات مروة تجي وياية كامت تخاف تجي من ورة النماذج الي جان يطببها للبيت استاذ ايهم واخوها منعها وحقهم هو اذا اني ممأمنة على روحي امي حالتها حاله بس بجي تكلي راح يضيع الولد ومنلحك عليه ومن شوفة ابوية وحالته الي مديطيب ومدنشوف غير تحسن قليييل..
مر اشهر على هاي الحالة وكت المغرب اكمل كل شغلي واعشي امي وابوية وانطيهم الدوة .امي جان مشكل عدها سكر وراثة من امها وجنت مبهرزتها وهي حبيبتي تخاف يصعد فكلش محافظة على روحها ..
اقفل الباب جنت انام يمهم بغرفتهم افرش بلكاع وانام اخاف اطلع نكعد نسولف ونخابر ادهم الي كام يسال على ايهم وانو مختفي جنت اتحجج بشغل ابوية وهو لازمة بعد وكعته وهم مجان مقتنع بس ميكدر يلح لان هو بعيد وحبيبي مبقالة شي ويرجع فمردت اشغله واخلي يرجع واحتمال ميكدر يرجع من ورة وضعية ايهم نصبر ومتأملة برجعته خير والله كريم ..
مرة دك الباب عليه كومي وين الكلاصات من ورة الباب ادليه ولا فد يوم فتحتله الباب ابد بس اصواتهم العالية والوساخة والقذارة جنت الصبح اطلع انظفهم قبل لا امي تكعد وتشوف الهوسة ويزيد قهرها جنت الصبح اطلع انظف البيت واكمل الغدة وامي تسوي لأبوية لان مياكل الا من ايدها ابوية وامي تزوجوا عن حب 4 سنوات يلة كدر يتزوجها بعد ماجان ماعندة واشتغل اشكال والوان بعد تخرجهم جانت امي وياه بلكلية وكتل نفسه عليها لحد ماكون نفسه وخطبها ..جانت امي توكله بأيدها وجنت امر ع بيت ام اسعد بين فترة وفترة وامهم ومروة هم جانو يمرونه الصبح من الافندي طالع او نايم ومن ينام ميحس ع نفسه ابد جان يكوم ياكل ويرجع ينام لو يطلع جنت احس بي كام يحس بلندم من يشوف امي تباوع عليه وتبجي وابوية الي مجان يفارك الغرفة بس جنت اطلعه بلحديقة شوية جنت اشيل واحط وابوية اسم الله عليه طويل وثكيل وجسم الرجال ثكيل جنت بلكوة اشيله واكعده ع الكرسي مالته وامي جانت تسبحه ..
مرة من المرات كلي يابة عسل طلعيني لان كمت اكره الغرفة والنوم الي دمرني حتى حركة مداتحرك شلناه اني وامي جانت شمس طالعة تخبل رحنا كعدنا بلحديقة واني وامي بلمرجوحة وطلع ايهم وشافنا دنج وطلع امي صاحته وكف بدون ميندار عبالك كاعد بفندق حتى حجي ميحجي ويانا ماعرف يمكن احساس بلندم او حتى لنرجع نحجي وياه وهو مرتاح على وضعيته.
ام عسل... فدوة اروحلك ايهم تعال نور عيني مشتاقيلك امي وابوية انت وين رايح مكانك خالي يمنا تعال حبيبي.... حسيته كام يبجي....
ايهم... عندي شغل لازم اطلع وعافنا وراح ورجعت امي دموعها عشرة عشرة .
عسل ....يمة فدوة اروحلج يجي وكت ويرجع لعقله من يشبع من هذولة الوضيعين الي يعرفهم امي جانت تباوع وتبجي مجاوبتني دموعها جانت تحجي وابوية هم حسيت عليه دمعت عينه مرت ايامنا نفس الشي منتظرين جية ادهم بس ايهم خفف جياته جان يومية صار لا كل اسبوع مرة او مرتين .
مرة اجة اسعد وابوية فاتحه انو هو يلزم شغله ابوية جان عايف الشغل بيد العالم من ورة وكعته والي صار ومديكدر يروح ويجي او حتى يحجي ابو محمد جان متردد ليروح يصادم وية ايهم بس بلنهاية قبل واني وامي حجينه وياه يلة اقتنع شكد جانت حالتهم المادية ع كدهم بس جانت عينهم مليانة وابد ميمدون ايدهم لاحد مرت الايام مثل القبلها متغير شي ومباقي شي للدوام .
لحد ما مرة جنة كاعدين بلغرفة داسوي علاج طبيعي لابوية امي غافلتني وطلعت متحملت ضحكهم وصوتهم العالي انداريت لكيتها فاتحة الباب ركضت عليها مكدرت الزمها دفعتني وطلعت خفت عليها ليصعد سكرها من تتعارك وياه طلعت لبست عبايتها وطلعت وراها داجرها صاحته ضربته ظل صافن بوجهه وكامت تلطم وتكله الله يموتنا اني وابوك حتى ترتاح وتاخذ راحتك وية هلقذارة قصدها على اصدقائه الي مجان عدهم اي احساس جانوا مسطورين اكثر من عندة هو صافن منطق كلمة طبت امي عليهم طردتهم كلهم انهزموا عبالك كبست عليهم الشرطة هو راد يحجي مكدر ينطق لحد ما امي تخربطت .......
لحكاية بقية.....
