اجة ايهم هو وابو محمد حتى يسلم ع ابوية كلتلهم نايم شكد عيب شكد استحيت ..
اسعد...لابنتي بعد احسن ينام يرتاح سلم وطلع...
ايهم... ابوية شوكت نام...
عسل... صار ساعة تقريبا حجى وية ادهم ووراها نام ..ادهم سال عليك ...
ايهم...هو شلونه...
عسل... الحمدلله سلم عليك وراد يحجي وياك عود خابره ترة كلبه صاير نار خطية وهو بغربه...
ايهم... ميخالف من يصيرلي مجال ...
عسل...اني ادري بيه ديتهرب ماله عين هو وياية ووية ابوية ميحجي هلكد..ديريد يروح لغرفته ايهم تتعشى...
ايهم... لا متعشي اريد انام ...
عسل...صعد دينام فتت من يم غرفته سمعته يبجي بشهكة ..
ايهم...يمة سامحيني يابعد عيني اني موتتج حوبتج لازم تبين بيه اني دانتظرها بلكي اموت واجي يمج دانتظر يومي لأن حياتي بلياج ماتت وياج راحت وماريدها لان انتي موبيها واكيد من تشوفيني حتحنيين عليه لان اعرف كلبج ام كلب الحنين...
عسل... عفته ورحت مابيه اسمع بعد رحت لغرفتي اريد انام مكدرت خليت ونزلت انام يم ابوية احسن خاف يريدني ولو اني كل شوية نازلتله بدلت ونزلت لكيته نايم فرشت يمه بلكاع ومددت بلكوة يلة غفيت حسيت ع صلاة الفجر كمت صليت ورجعت نمت حسيت ع كعدة ايهم كمت داسويله ريوك ملحكت عليه طلع وسد الباب وراه صحته مسمعني جانت ساعة 7الصبح رجعت لكيت ابوية كاعد شلونك ابوعسل ابتسم...
ابو عسل... صباحج عسل يااحلى بنية...
عسل... فدوة لعينة شكد يجبر بخاطري اني بطبيعتي كلش اهتم بروحي شعر ع جسم ع ترتيبات من يومي شعري نفس لونه ماحب اصبغه وكلللش سرح مابقي شي ماستعمله وناعم ودوم ريحته تخبل وجسمي ماخلي غرام يزيد لازم احركه وكوووومة العب رياضة فدائما يكولولي احلى بنية مع العلم اني سمرة وعيوني ملونه بس جذابة شويونة ..
كمت سويت ريوك وشربته دواه وكعدت افركله ايدة ورجله لان الجهة اليسره حركتها ثكيلة طلعته بلحديقة الجو حلو ورحت كملت شغلي وكل شوية اجي اكعد يمه لحد ماأجة عمو ابو اسعد الحمدلله التهى وياه لحد ماسويت الغدا وصبيتلهم اثنينهم تغدوا وراح الرجال يريد ينام خطية ..عمو تعال العصر همين ...
ابو اسعد...والله عمو اذا كدرت اجيكم كعده الحجي ولا ينمل منها...
عسل... بقينا كاعدين اني وابوية سوالف اجيبها منا الطها منا وخابرنا ادهم شوية ابوية سألني ع ايهم لان مديشوفه ديلهي روحه حاله حالنا يابة ....
مرت الايام وبلكوة تمشي ..
لحد ماصارت الاربعين حضرنا ورحنا اني كل خميس مبطلت اسويلها ثواب واقرالها سورة يس ..رحنا كملنا زيارة الامامين ورحنا للمقبرة وعبالك هسة ماتت وهسة دندفنها عبالك هسة عافتني هم تخربطت وكعت براس مروة خطية وابد معافتني كل يومية جاية هي وامها يكعدن يمي ونوبات مروة تروح تالي الليل بس جانت تستحي من ابوية من يجي ايهم يطلع كبل لغرفته هي تروح وية اخوها كملنا الاربعين ورجعنا وبدت معاناة جديدة لان لازم اقتنع امي راحت ومالها رجعه كافي بعد ..كضيتها ثوابات وقراءة قرأن ع روحها ومرتين شفتها بلحلم تكلي ديري بالج ع روحج وع ايهم مع العلم هو ابوية المريض يعني لازم توصيني بي ..وثاني حلم تكلي يمة عسل خلي سجينة جوة راسج اني كعدت مهبوطة يمة شبيها امي ليش هيج توصيني سولفت لمروة كالت امج خايفة عليج وع ايهم بس عليج اكثر ...فترة نسيت ومضل ابالي لان هو شكو الحمدلله كاعدين وساكتين وهي هم بعد ماأجتني ...
مر ع وفاتها اكثر من شهرين وحياتنا مثل ماهي ماكو تغيير ومباقي شي للدوام وحايرة ابوية منو يبقى يمه ماكدر اعوفه وحده وماأمن ابقي احد يمه ليش يكعد ايهم ونلكه حل تعبت من المجاملات واني القهر مالي كلبي وعايفني وحدي ..لحد ماقررت اأجل السنة لحد ميجي ادهم وابوية يكوم على حيله ماكدر اعوفه وحده او اعوفه يم احد لان ابوية يستحي هواية هو الي بلكوة يخليني اساعده ..
ادهم اشهر وان شاءالله يخلص ويرجع عايشة ومصبرة على هذا الامل ولا اني جكة ابرة ابجي اعصابي فد مرة مدمرة ..
فد يوم وكت مغربيه اندكت الباب جنت كاعدة اني وابوية كملت صلاة وداقرة قرأن ولابسة الاحرام مال الصلاة باوعت ع ابوية يمكن بيت ام اسعد لان احنة محد يطب علينه من يوم وفاة الغالية وايهم مو هسة يجي رحت وافتح الباب.... عسل....منوووو بلبداية محد جاوب بعدين كلت منوو بلباب صديق ايهم سنان....اني اختي ممكن تفتحين الباب ..
عسل...منو حضرتك ..
سنان...اني وية ايهم بلشغل...
عسل... يمة اخوية كلبي وجعني مدري ليش شبيه اخويه اليوم مشفته الصبح كبل طلع يمة خاف بي شي فتحت الباب بدون حتى مافكر اخابره واشوف منو الي اجه من طرفه فتحت شوية من الباب ومديت راسي تفضل خوية خير شبيه ايهم جان يدفع الباب...
سنان... اني الي بيه مو ايهم...
عسل.. ثواني وصار بنص الطرمة واني ارجع ليورة تذكرت شكله هو الي اجة وامي تخربطت من وراه انهزمت جوة داقفل الباب جان يدفعها وركعني ليورة ظليت اصيح على بيت ام محمد بلكي احد يسمعني ويجي ركضت جبت سجينة ولكيته واكف ويبتسم ابتسامة خبيثة وابوية يصيح عليه ومديكدر يسويلي شي شفته جنه شارب يتقدم واني ارجع ليورة ..
سنان...لج مدتطلعين من بالي من يومها شفتج وسطرتيني خو التراك الي جنتي لابسته دوخني...
عسل... بلة اني بيا حال وهذا الطرن كاعد يتغزل بلتراكسود.. فدوة احسبني مثل اختك ليش هيجي تسوون فوك ماضيعتو اخوية وموتوا امي ولا عبالك شكد خرطت كلشي ميسمع ..اجة ديجر ايدي واني مثل الي ربي نطاني قوة طببت السجينة ابطنه لان اوصل لبطنه اني كصيرة وهو نخله وضربته بمزهرية بلمطبخ براسة ونومته بمكانه كل هلابداعات واعيط واصيح وبيت ام اسعد عبالك نايمين نومة اهل الكهف دفعته وكع واني رحت ركض لابوية ..ابوية بس شافني سودة عليه عباله ردتله الروح...
ابو عسل... اطلعي دكي الباب على بيت ام اسعد خلي يخابرون الشرطة اخاف احد وياه منتظره برة ويطبون يلة بايابة روحي...
عسل...طلعت اركض مثل المخبلة اني ومال الصلاة عبالك داطير ادك اباب بيت ام اسعد وماكو ايدي راحت ومحد ديسمعني تذكرت اكو سيطرة براس الشارع موبعيدة طلعت اركض بيومها ع حظي الشارع يصفر اريد احد من الجيران يطلع ماكو كلت اخاف محد يستقبلني ويخافون السيطرة احسن طلعت اركض عبالك شبح هسة يرموني والله ..اني داركض وما احس الا سيارة طلعت من الفرع بعد كلشي مشفت الا واني بلمستشفى اول مفتحت عيني وعطت يابة ابوية وين يمة سودة عليه وين عفته وحده شفت ممرضة كدامي لزمتها من صدريتها اني شكد صارلي هنا...
الممرضة.. تقريبا نص ساعة لتخافين مابيج شي..
عسل.. احس ايدي ورجلي ملفلفة وبيهم وجع نص ساعة شنو ...
الممرضة...اي نص ساعة غايبة عن الوعي...
عسل... ظليت اصيح لج ابوية شلون هلكد تعوفوني نايمة كمت وهي تكعدني عاد عطت بيها عيطة خنست خلت وطلعت سودة عليه هسة ابوية شديسوي احد طب عليه لا اجاه ايهم والمصيبة الي مددة بلمطبخ اويلي عليج عسل وع قهرج مصيبة تفك تنط مصيبة لخ وين اولي اوووف يمة راح اموت من قهر الدنيا وين رحتي عني.. راحت صاحت الدكتور وواحد وياه طلع ابو السيارة الي ضربني ...يمة فدوة لطوله شلون حسن هذا ...
للحكاية بقية ...
