حكايات اهلنا

قصة للترفيه 😊

راح اكتب هاي القصة بالعاميه لأن تصير احلى
اكو رجال متزوج وحده متاكل كدامه ابد تحط الأكل كدامه وتكعد مقابيله وما تمد ايدها
يسألها ليش ما تاكلين. تجاوبه جواب غريب ومضحك
تكول انا ما اشتهي لأن فخذ زرزور يغديني ويعشيني وريكني ويزيد
يصفن بوجها زوجها وهو ممصدك لأن زوجته سمينه مو نحيله
هو ميحجي ولا يرد بس الفضول كتله يكول بينه وبين نفسه هاي يمته تاكل
المهم
لا يوم لا يومين وكلما يسألها تجاوبه بنفس الجواب
فد يوم راد يشوفها لأن زوجته تسمن ما تضعف وهي ما تاكل غير فخذ الزرزور 😂 المسكينة
كالللها باجر اتأخر بالشغل فلا تسوين غده احتمال اتغده
كالت : خوش
ثاني يوم طلع للشغل علساس بس هو اخذله فره ورجع بسكته راد يتختل ويشوف حقيقة النسرة العنده الي ما تاكل هههههههه
بس تقرب من البيت شم ريحة طبخ
كال بينه وبين نفسه: مبين دا تطبخ الغده اليه تنتظر رجعتي 😊
اكو فتحه بالبيت تطل عالمطبخ باوع من عدها بدون ماتدري ولا تشوفه وجان يشوفها تطبخ وتحضر اكل مال عشر نفرات
كال بنفسه: احتمال جايها خطار خل اشوف
المهم خلصت الخاتون جان تحط الأكل كله وتنسف بي الاكل دسم وكلشي طيب مخليته عالسفرة وهي اشتغلت مثل الناسفه 😄
هو من شاف هيج سوة نفسه علساس توه جاي البيت فقبل لا يدفع الباب سوه نفسه يكح بمجرد سمعته رأساً ضمت الأكل سلمت عليه وكالتله شعجب فلان راجع من وكت
كال:فلانه انا راجع جوعان كلش واريدلي لكمه اكلها
كامت هي وصبتله غده
كال: والله مرتي معدله اكلها جاهز مجهز
كالت: توقعت راح ترجع
كاللها: مو كلبج دليلج يله فلانه تعي تغدي وياي
كالت: ما اشتهي
كاللها بسخريه: بس لا اكلتي فخذ الزرزور كله
كالتله: يمعود شدعوه هو فخذ الزرزور يغديني ويعشيني ويريكني
كاللها: اي مبين من الأكل الطبختيه مال عشر نفرات وكعدتي تاكلين بي عبالك طاكتج مجاعه دكومي من يمي روحي كملي بلعج هههه
سألها ليش ماتاكلين كدامي
كالت: لأن انا اكل هواي وما اشبع بسرعه فأستحي منك من تشوفني اكل هواي خاف تكول ما شايفه
كال: اكلي براحتج وبعد لا تجذبين عليه بسالفة فخذ الزرزور

* الزرزور يعني العصفور