رؤيا

الجزء 38

صبح صباح جديد
فاقت رؤيا لقات راسها بحدها  دخلات دوشات ولبسات عليها ،كان جو صيفي بإمتياز كيفتح الأنفس ...خرجات حدا البالكون تشم شوية الهوا .كيبانو قوة الحراس لابسين الكحل ..دخلات للبيت كتقلب على شي تيلي باش تهدر معا ماماها .ووالو ملقاتش ...حتا دخلات عليها الخدامة بالفطور
الخدامة :فطورك الالة
رؤيا(بإبتسامة):بلا ديك لالة غير رؤيا باراك
الخدامة:نخلي ليك فطورك هنا ولا فالبالكون
رؤيا :اه حطيه فالبالكون ....حگا واش مكاينش هنا شي تيلي
الخدامة :اه كانو ولكن مؤخرا سي ياسين حيدهم ...
رؤيا:اه صافي شكرا

نمشيو عند ياسين لي مشا بكري للشركة حيت ليوم غادي يتافقو على صفقة كبيرة ...بعدما سالا الاجتماع
عاصم :واش  اصحبي حماقيتي راه صفقة كبيرة هادي .مكنضنش كاين علاش يكون تغيير فالعقد ..اولا هادوك شركة كبيرة ..وتانيا غادي يفيدونا بزاف فشراكتنا معاهم
ياسين: الشروط لي حطو فالعقد ميمكنش ليا نقبل بيهم ..حتا حنا شركة كبيرة وغادي نفيدوهم بزاف داكشي لاش ختارونا ...غير تسنا نهار ولا يومين وغادي يمشي دكشي كيف بغينا
عاصم :ايه واخا
ياسين:يالله نخليك 
عاصم:فين غادي ا صحبي  لوالدة بغات تشوفك. گتليها غادي نجيبو ليوم
ياسين:غير خليها نهار اخر وندوز نشوفها .. ..رؤيا غادي تكون قنطات تما بحدها
عاصم: كيبان ليا حتا انا نمشي نضربها بشي تزويجا راه شرفت
ياسين:من ناحية شرفتي ..راك شرفتي ههههه ...
عاصم: سير فحالك سير ..مزال صغير  اش ندير بصداع الراس
ياسين:هههه يالله تهلا  نشوفك غدا 

بعدما خرج ياسين من الشركة ..توجه نيشان للدار ...دخل لقاها گالسة فالبالكون باقا كتفطر  ...
ياسين:النعاسة يلاه فقتي
رؤيا:اه ..ونتا فين كنتي ..
ياسين:مشيت للشركة كملت شي خدمة
رؤيا :اه اوكي....ياسين......ب... بغيت نهدر معا ماما
ياسين(بنفاذ صبر ): واخا ولكن بشرط
رؤيا:شنو هو
ياسين(ماد ليها حنكو )...ملقات مادير من غير انها تعالات فيه باش تبوسو ...ولكن غفلها ودار .وباستو من فمو
رؤيا(ضرباتو فصدرو):ياك گلتي غير حنكك
ياسين(كيضحك وخارج):عنقي كان كيضرني وهو يدور بحدو ..
رؤيا:يا سبحان الله
ياسين:ههه يالله هدري دغيا هاني كنتسناك

حط ليها تيلي ديالو وخرج ....كان تيلي ديالو مأمن ميقدروش يتعقبوه...دغيا دوزات نمرة
رؤيا:الو ماما
ريماس:الو بنتي ...رؤيا  ..فينك ابنتي توحشتك ...فينك نتي ابنتي اجي عندي
رؤيا :ماما انا بخير  بلا. متخافي عليا ...فين هو بابا
ريماس : مشا للشركة ابنتي ....نتي ابنتي كيف غادا. ...
رؤيا:سمحي ليا اماما حيت درت ليكم هكا ....مكنتش باغا هكا يوقع
ريماس :مديريش فبالك ابنتي ..لبنات شرحو ليا كلشي. ...راه باينة ابنتي مكنتيش باغا هاداك منصف ولكن متخيلتش يهددك ب باباك 
رؤيا:بابا لاباس عليه ياكما مقلق مني
ريماس :لا ابنتي بالعكس ... لبارح جا عندو ياسين وبقاو مدة كيهضرو 
رؤيا: كيفاش وفاش هدرو
ريماس:معرفتش بالضبط ..ولكن غير سولت سيف الدين ..گاليا متخافيش كلشي مزيان
رؤيا:اه صافي (الصمت)
ريماس:ونتي ابنتي كيف غادا مع راجلك
رؤيا(بنضرة حزن):مستحيل نسا دكشي لي دزت منو ..ميمكنش نسا محدني فهاد الحياة ...عمرني نسمح ليه
ريماس:بنتي الله يهديك حاولي تگلسي معاه وتهضرو وتفهمي منو شنو لي خلاه يدير هكاك ...اكيد غادي يكون عندو سبب قوي ...نتوما راكم مزوجين دابا ميمكنش حياتك كاملة تعيشيها معاه ونتوما مخاصمين وفبيت واحد
رؤيا:ماما صافي عافاك مبغيتش نهضر فهادشي دابا
ريماس:واخا ابنتي ...بقاي تصوني مرة مرة ...راه توحشتك راه نتب لي عندي
رؤيا:واخا اماما . حتا انا توحشتكم . دابا ندوز عندكم
ريماس :اه مرحبا ابنتي الدار دارك
رؤيا:يالله بسلامة وسلمي ليا على بابا
ريماس:يالله تهلاي فراسك ابنتي