رؤيا

الجزء 56

بعدما دخلات رؤيا لبيتها غسلات حالتها و خرجات لبالكون گلسات عقلها فجيه و جسمها فجيه ...وخا تعيا متكذب على راسها و تنفي حقيقة انها مزال كتبغيه ...لأنه من نهار بغاتو عمرو خرج من قلبها ..والأكتر هو انه دابا رجعات شافتو واش جاب متولف على غيابو مرة أخرى ولكن معندها مدير كلشي بيناتهم سالا داك النهار بالظبط اصلا يمكن حتا زواجهم كان غلط فغلط ..هادشي كامل فكرات فيه وهي ساهية فسما ...ودكشي لاش خدات قرار انها تبعد وبلاما تگولها لحت حد حيت غادي يحاولو يوصلو عليها....محسات ايلا بعينيها داوها حتا فاقت الصباح كان الضو يالله بدا يوصل للدنيا ...دخلات لبسات حوايج سپور وخرجات برا  كتجري حدا البحر  حيت الڤيلا كانت قريبة لجيهت البحر ....خرجات كتجري ودايرا الكيت فودنيها وساهية معارف شنو كدير  محاساش بالوقت ...حتا تلوات ليها رجليها وگلسات فجنب البحر

رؤيا(سخفانة ومقصحة):تفو على زهر عندي ..حتا حاجة مامقادة فحياتي....مالي اش درت باش يطرا ليا هكا (شدات حجرا شيرات بيها للبحر)تفووو (دموعها كيسيلو محيلتها لرجليها ولا هادشي لي كتعيشو )
ياسين(جا گلس حداها حيت حتا هو كان كيجري ): (شد ليها رجليها)بشوية خليني نقادها ليك
رؤيا:غير خليني شوية ونولي مزيان
ياسين(جرها بجهد ):باراكا من قصوحية راس ...(بقا كيلوي ليها فرجليها حتا تقادات)
رؤيا(كتحاول تنوض ):صافي شكرا تقادات
ياسين(كيشوف فعنقها):فين هي سلسلة  لي كنتي دايرة فعنقك
رؤيا: حيدتها  .....لمهم انا غادي نمشي  عييت
ياسين(زاد قدامها):طريقنا وحدة ...(دار عندها)مناوياش تزيدي؟؟
رؤيا(تمات غادا موراه وساكتة)

###نرجعو شوية لور نشوفو من بعد ممشا ياسين لبارح لدارو ..مع الدخلة لقا عاصم كيتسناه

عاصم:على السلامة ..كيف داز نهارك
ياسين:ماشي من حقك تسول ونتا عارفو كيف داز
عاصم:ههههه داز زوين عارف لي كاين
ياسين(معصب ):عاصم ....خرج سوقي ..وحتا امين دوي معاه. دكشي لي كتحاولو ترجعوه مستحيل يرجع
عاصم:ياسين نتا راك صاحبي وكنعرفك مزيان ..بلا متنكر راك موحشها..وباغي ترجع معاها
ياسين:عاصم سد عليا هاد الموضوع
عاصم:ايوا حتا لاين ...راه ضروري غادي يجي نهار لي هي غادي تزوج وتبغي دير ولادها  .وحتا نتا مغاديش تبقا هكا حياتك كاملة اولا
ياسين(غادي طالع فحالو):هادشي ايلا طلقتها ديك الساعة تمشي تزوج
عاصم:هي ناوي مزال ترجعها
ياسين:مغاديش نرجعها ...محدها عايشة غادي تبقى على ذمتي
عاصم:حشومة عليك دير لديك السيدة هاد الحالة
ياسين:عاصم ..صافي سكتنا (وطلع لبيتو)

نمشيو لعند رؤيا لي مزال غادا مورا ياسين كيتمشاو غير وصلها قدام الڤيلا بغات تسلت حتا شدها

رؤيا:بغيتي تگول شي حاجة!؟
ياسين:عندي جوج حوايج نگولهم ليك
رؤيا(ربعات يديها وكتشوف فيه):لي هوما
ياسين(جرها من خصرها):ايلا كنت تخليت عليك  ومشيت ماشي خوفا من باك ..حيت انا بغيت وحسيت بالأغلاط لي درت ومبغيتش نخسر لك حياتك
رؤيا(كتحاول تشد راسها):مزيان...وشنو هي الحاجة تانية..سربي بغيت نمشي
ياسين:طلاقك عمرك تحلمي بيه
رؤيا(مشوكية):شنو...شكتگول نتا غير لبارح كنتي كتگول حاجة اخرى ..واش تسطيتي
ياسين:حسبيها كيفما بغيتي ...هدرتي گلتها ..ومحدك مزال على ذمتي غادي تصرفي على هاد الأساس ...ومكاين لا عدنان لا سي نمي
رؤيا(دفعاتو):واش حماقيتي ولا مالك ..واش انا غادي نبقا مزوجة بيك حياتي كاملة ونتا فجيه وانا فجيه...واش نتا بعقلك
ياسين(جرها عندو كيهضر جيهت وذنها):ايلا بغيتي تجي تعيشي معايا مرحبا
رؤيا (دخلات لڤيلا بلاما تگول شي حاجة )