سنغدوا_رفاتا_ويبقى_الأثر سنبقى_رفاقا_ويبقى_الأثر

متابعينا اليوم راح نتكلم بموضوع الروايات

سلامٌ عليكم ورحمة الله  وبركاته
متابعينا اليوم راح نتكلم بموضوع الروايات ، أتمنى من الأمهات الموجودات يركزون وينتبهون كُلش زين 💛🌱

الروايات وماأدراك مالروايات..حتى بإختيار المواضيع چان موضوع  الروايات هي الاقل عدد تصويت!
هذا يدل إنو عدد قليل منتبه ع أخطارها وتأثيرها السلبي..

هالأيام الروايات صارت منتشرة بكثرة ع مواقع التواصل قنوات ، بيجات وگروبات كُلش هواي دتنشر روايات ، طبعاً هو شي حلو واحد يقرأ ويتثقف ويستفيد ، لكن اللي ديصير هو العكس تماماً.
بدل ميستفيد القارئ ديحس انو هو بقى يراوح بمكانه أو يمكن رجع ليورة !
بس مضيعة وقت ع الخالي بَلاش!
يعني أغلبية الروايات هسه بهالطريقه صارت :
أول شي تبدي البطلة تعرّف عن نفسها ، تبدي بإسمها وعمرها وانوب توصف شكلها ، ووتنطي أدق التفاصيل ، عيوني كذا ، طولي كذا..
وبعدين تبدي تسرد روتينها اليومي ( گعدت ساعة كذا ، مشطت ، تريگت ،  اتصلت ، طلعت، داومت ، مشيت، تغديت ...إلخ)
و تذكر تفاصيل مُملة بحياتها.

ودائما تكون من عائلة غنية واهلها ع طول مسافرين والخانم باقية لوحدها تشكي من الملل والفلوس الزايده المتعرف شسوي بيها!😁

أما البطل فيكون عصبي ، ومغرور ويدخن بكثرة ، وميتحاچى وميعجبه العجَب.
ونگضي الرواية كلها ناس تعاند بناس وطلايب ومشاكل وبالأخير تنحل الأمور بقدرة قادر.
زين هسه الديقرا شنو استفاد ؟
وصلتله معلومه ؟
انحلتله فد مسألة ، توضحله فد أمر ، زادت معرفته؟
كفيلكم الله كلشي مامن وراها هذا النوع من الروايات بس مضيعة وقت + ذنووب بلاش!

ستووووب ، ح تگولون ذنوب شنو؟

إي نعم ذنوب ، خل نكون صريحين مستحيل ميذكرون بيها أشياء ممفروض تنذكر ، أشياء جريئة وقبيحة كُلش عيب انو كاتب أو كاتبة يكتبوها برواياتهم.
لازم يكون بيها اشياء تخدش الحياء ، لأن للأسف هاي صارت مطلب من القراء
مرة شفت تعليقات ع فد روايه دينية يطلبون منها انو تكتب هيج أشياء لان الرواية صارت مملة ، والكاتبة تجاوب انو الروايه دينية فمدترهم الشغله!
هي صح تكون رواية إجتماعية ودتعكس واقع ع أساس بس تتضمن كومة ألفاظ وكومة أفكار ومشاهد قبيحه ، وبذيئة وتنطي صورة سيئة عن المجتمع العراقي وعن البنية بشكل خاص.
يعني دتوصل فكرة للبنات ان البنت المثالية تكون مغرورة وعنيدة وجريئة وسافرة والرجل المثالي هو اللي يدخن ويتعصب ويضرب!

قسماً بالله اعرف بنت عمرها ١٣ سنة تگولي أني اريد شخص يدخن ويشرب (اجلكم الله) گتلها ليش؟
گالت : لأن بس الرجال صدگ هيچ يسوي وتكون عنده شخصيه!
شفتوا التأثير السلبي والتأثير ع الشباب والمراهقين؟
مثل هيچ كُتّاب شنو يريدون يوصلون يعني ، كل كاتب لازم تكون عنده رسالة وهدف من كتاباته ، زين هاي الروايات شنو هدفها؟
معقولة ماكو هدف هيچ بس مجرد ناس فاضيه أو يريدون (يطشّون) مثلاً..؟!