اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
اجه محرم ، وراح تبدي القوانة
(خلي اللطم يفيدكم ، ظلوا ساكتين وابچوا ، هو الحسين ماطلع حتى تدكون وتلطمون اول شي عرفوا عليمن طلع ، همج ماتصيرلكم چارة ، و...) نفس القوانة كل سنة تنعاد ، بدءًا من هاي الفلوس لوتنطوها للفقراء احسن وامثالها...
اعزائي هاي الفئة.. خلي نحجيهن وحدة وحدة
اذا تحجون ع ان الحُسين خرج للاصلاح وع الظالم وبهذا الكلام ، ف الحُسين ماخرج ع الظالم غير بأمر إلهي ، بأمر نبوي ، ( ان لك منزلة عند الله لاتنالها الا بالشهادة) تكليفك هو الخروج ، لذلك خرج
اما اليوم ف مااتوقع اكو احد بينا متيقن وواثق ويعرف ان تكليفنا هو الخروج ايضا! لازلنا نفتش ونسأل ونستطلع الاخبار الواردة عن اهل البيت ع مالكينا لحد الآن أي رواية تكول اخرجوا ، اللي لكيناه هو انتظار وترقب الامام المهدي عج وهو اللي راح نخرج تحت رايته وهو فقط المُصلح ..( انتظروا) ( ارتقبوا) (تربصوا) ( كونوا احلاس بيوتكم) ( لاتسبقونا فتصرعكم البلية)..
اما اليوم اذا تريدني اخرج مثل الامام الحُسين ، ف جيبلي شخص مثل الامام الحُسين وگلي حتى اخرج وياه
واذا انت تكول اخرج مثل الامام الحُسين ، ف اني اكلك خو ما اخرج مثل ما سووا الائمة اللي بعده .؟ ؟ الامام السجاد ع والباقر والكاظم وكل الائمة من بعد الامام الحُسين.. مثلا ماجان اكو ظلم ؟ لو ماجان اكو ظالم ؟ لو احنه أعرف من عدهم ؟
وترا الحُسين ع خرج من شاف الدين مات! خرج حتى يحيي الدين ( ماخرجت اشرا ولابطرا ، اريد الاصلاح في امة جدي رسول الله ، أن آمر بالمعروف وأنهي عن المنكر)
انت اليوم عليمن خارج ؟ تريد تحيي الدين ؟ تريد تأمر بالمعروف وتنهي عن المنكر ؟ لو تريد حُكم لا يم الدين ولا يم اهل البيت!!!! علماني!!!!
الحُسين مو ع مزاجكم تريدوه ، الحُسين خرج لاجل الدين ، وانت تريدني اخرج واتبره حتى من الدين ، لان هو احنه شحصلنه منه!!!
لا تصير متناقض وتاخذ الامام من الجانب اللي تريده!
وصدكني اني راح اخرج من الكه شخص مثل الامام الحُسين ع اخرج وياه ، ولان ماكو هالشخص الا صاحب الزمان ، ف راح ابقى انتظره لحد ميجي وهو ياخذ حقي اما شغلة اللطم والبجي ف خلي اگلكم شغلة
يمكن اليوم انت من تگلب بالفيس وتشوف مقطع فيديو بي فد شي مؤلم ، فد ولد يطرد امه ، او فد أب يضرب ابنه ضرب قاسي.. او ليش نروح بعيد تذكرون الفيديو اللي انتشر قبل فترة للشاب محمد اللي انهان ع يد القوات الامنية.. شفتوا شلون ثارت عدكم الغيرة وتأذيتوا..لو تذكرون الطفلة فرح اللي ماتت وشكد شكد ناس بچت من شافت الفيديو وشافت قبرها..هاي وانتو متعرفوها ولا تعرفون اهلها ولا اي شي..وهيچ بجيتوا
زين شحال اللي خرج حتى آني أبقى ؟ اللي انطه طفل رضيع عمره ٦ اشهر علمود يبقى هذا الدين ، زين تخيل انت متعرف الحُسين من تسمع ان شخص يُدعى الحُسين.. يقطعون بخنصره وهو يگول للي يگطع خنصره ( ياهذا ابعد لاتسحقك الخيل) لو يجيك واحد يگلك اني ردت أقطع اوصاله بس ماكدرت! ومن تكله ليش ؟ يكلك (شغلني نور وجهه) 💔
يعني من تسمع هيج عن شخص متعرفه ، ماراح تبچي؟ ماراح تتأذه؟ ومن تسمع ان هذا الشخص مسويله مجلس عزاء ع روحه.. ماراح تروح وتلطم؟
اما اذا نرجع للروايات وكلام اهل البيت ف ( ان البكاء على الحُسين يحط الذنوب العظام) ( يابن شبيب ، ان كنت باكيًا لشيء فابكِ الحُسين) ( من بكى او ابكى واحدًا فلهُ الجنة) ( من بكى او تباكى فلهُ الجنة) (كل بكاء وجزع مكروه للعبد ، ما خلا البكاء والجزع على الحُسين بن علي)
وغيرها وغيرها.. ف ليش مانبچي ؟ شنو اليمنع؟ مستغنين عن الجنة ؟ لو ماعندنا ذنوب نريدها تنمحي؟واذا تكولون عليمن هالصرف كله والتبذير لو تنطوها للفقراء احسن ف صدكني حتى اذا انطيناهن للفقراء هم يسوون بيهن طبخ
والحمدلله.. الفقراء تنتظر جية محرم حتى تشبع ، واذا ع التبذير ، ف ع اقل منبذر بيهن بسفر لاذربيجان ، لو بعشه بمطعم يكلف ٥٠ الف واكثر ، لو جينز ماركة ب ١٠٠$ ، لو حفلة عيد ميلاد ب٢٥٠ الف!
