حسام و كنزة

21

انا: كيفاش؟؟ قبل رمضان لالا مزال مانيش موجدة روحي
حسام: كنزة قالتلي ماماك بلي كلش واجد ولي ماوش واجد نوجدوه مكانش مشكل 😉
انا: مممممم مانعرف يعني قرايتي والباك كيفاش معاهم
حسام: كنزة يبالي وضحتلك القراية مكانش يعني راح تنساي حاجة اسمها قراية انا مرتي متقراش فالفاك
انا: فففففففف منك حسام ياك علابالك غير قرايتي مانسمحش فيها وانت تاني مانقدرش نسمح فيك
حسام: القرار قرارك خيري انا ولا القراية ودورك هيا نوصلك رايح عليك الحال..... طلعنا فالطاكسي قالي حسام غدوة ترديلي اذا تخيري تكملي حياتك معايا ولا تكملي تقراي
انا ماقدرتش نخير ... مانقدرش نخير بين قرايتي و حبي راني في حالة مايعلم بيها غير ربي
حل الراديوعلى اغنية كادير الجابوني نتي سبابي عيشتيني فالدوت
حي عليا كل يوم نحيا ونموت
طال الحال مبغاش عليا يفوت
أرايي وها رايي .......
قطع عليا افكاري حسام كي قالي انزلي رانا وصلنا ففففف لهاد الدرجة كنت غايسة ماحسيتش حتى بالطريق .......................................
دخلت للدار وعقلي ماوش فوق راسي جات عندي ماما باش تسقسيني على الباك لقات حالتي ماتعجبش كان في بالها قلقانة من الامتحان مي انا حكيتلها شافت عندي وقاتلي: كنزة نتي دورك كبرتي و نظن بلي تعرفي المصلحة نتاعك وين مي انا راح ننصحك نصيحة .... نتي دورك راكي متزوجة رسميا يعني ماوش مجرد خطبة كي تحبي تفسخيها نتي دورك ادا نفصلتي عليه راح تطلقي و راح يكون طلاق بدون دخول ونتي تعرفي المجتمع نتاعنا ادا مادرتيش يردك درتي و درتي انا نقولك خممي ملييح ومن بعد قرري
خرجت ماما وخلاتني غارقة.......
انا ماوش هامني كلام الناس و مراحليش فيهم يحكيو ولا يقعدو انا راح ندير الحاجة لي تريحني
هزيت الموبيل و عيطت لحسام.....

بعد 10 سنين
الدنيا سعات تحطنا بين خيارين
مهمين بزااف و تضطري انك تختاري
و بهذ الخيار قادر تخسري حوايج نتي ماتحسيش بيهم الا بعد ما يفوت الحال وتندمي فالوقت لي ماينفعش فيه الندم.......... قصتلها على افكارها الفرملية كي دخلت
دكتورة وصلنا حادث مرور لحافلة تابعة لمدرسة
انا ماسنيتهاش تكمل هدرتها و نزلت نجري.... ممكن نماطل في كل شيء الا حياة الناس
نزلت للاستعجالات نلقا الحالة داخلة بعضاها الفراملة و الطبة يتجاراو الدم في كل بلاصة عيطت للفرملية تفهمني واش صرا قاتلي: حافلة تابعة لمدرسة ابتدائية خاصة 18 تلميذ مصاب اصباتهم مايش خطيرة و السائق حالتو حرجة ... جا رئيس الاطباء قالنا نشوفو الجرحى و هو راح يدخل للعملية........
شفت طفلة راسها مجروح متكية وتبكي عندها انا: الزينة علاش راكي تبكي راو جرح خفيف... هزيتلها راسها نشوف فالجرح ماوش غارق بزاف
هي: هئهئهئهئهئه خفت بزاف
انا: ساي الزينة ماتخافيش قوليلي واش اسمك وقداش عمرك (نحكي معاها و انا نفحصلها في راسها )
هي: اسمي ريحان وعمري 7 سنين
انا: اسمك شباب بزااف ريحان (حليتلها عينيها ونشوف فيهم) دورت عند الفرملية نحكي معاها : دورك لازم نديرولها راديو و سكنار على راسها روحي شوفي ادا فارغ
و رجعت عند ريحان
انا: ريحان قوليلي كشما راو يوجع فيك بلا راسك
ريحان: لالا هئهئهئهئه راسي لي راو يوجع
انا: اوك ريحان دورك راح نديرلك برا صغيرة باش يتنحا عليك السطر
ريحان: لالا تاتا ربي يخليك ماديريليش برا نخاف انا بزاف
انا: نوعدك بلي مانوجعكش حقا قوليلي واش تحبي تولي كي تكباري (نلهي فيها بالهدرة باش ماتتوجعش كي نديرلها لبرا )
ريحان: نحب نولي طبيبة كيفك تاتا ....مانعرفش اسمك
انا: هههههه اسمي كنزة (وضربتلها لبرا)
ريحان: ايي تاتا حاجة شكتني
انا: هههههه تكون نموسة هههههه
جبت لبرا و لخيط و خيطتلها الجرح نتاعها و ديتها دير سكنار مع اني كنت متأكدة بلي مجاتهاش ضربة خطيرة
رجعتها لبلاصتها و ركبتلها سيروم كنت راح نبوسها و نروح حتى نشوف فيها عيطت: ماما بابا
درت وكانتلي صدمة