حسام و كنزة

35

.......رجليا تكسروا من الدوران...... عينيا راح يتقفلوا.......وهو ماخلاش بوتيك مادخلنالهاش......كل حاجة يشوفها قدامو يشريها...... ممكن لوكان جيت في ضروف غير هادي كنت راح نفرح ونزيد ندور و نشري...... مي راني نعسانة.... و تعبانة..... راسي راح يتكسر......
انا: حسام سايي والله تعبت
حسام : مزالو شوي حوايج نشريوهم و نروحو ....وراني عارضك للغداء
انا: حسام مانقدرش.... مستحيل يكفيني الوقت....باش نتغدا معاك.... ونروح للدار نوجد روحي .....
حسام : ممممم ماعليش الغدا نخليوه مرة اخرى..... وهيا خفي باش نكملوا بكري.....
رحنا كملنا شرينا لي بقالنا..... من بعد رحنا خيرنا الخاتم نتاع الخطبة....و داني روحت.............. دخلت للدار لقيتها داخلة بعضاها.. .. البنات يفرزوا... ويعدلوا..... وماما توجد فالغداء......شافتني ماما جات عندي هي و خوتاتي ...
ماما: على سلامتك بنتي..... وريني واش شريتو......
اختي هاجر : ربي يبارك.... والله عمروا مايتبدل حسام..... جامي لاخرجتي معاه و ماشرالكش السوق كامل ههههه
حياة: ايه عند حق.... تشفاي هداك العام تاني كي خرجو يشريو حوايج لعرسهم... واش شرالها ....الحاجة لي تتمناها جابهالها.....
انا: ههههه ايه دوركا خليوني نروح نوجد روحي ......عطيتهم الحوايج يشوفوهم وهزيت غير الروبا لي راح نلبسها
طلعت لبيتي...... رحت دوشت... و جبدت شعري..... شفت مع الساعة لقيتها 13:30 مزال الحال خلي نرقد شوي ونوض....حطيت راسي ورقدت.............................
ماما: يا خاه مزالت راقدة.... نوضي يا طفلة يعطيك الربح..... نوضي علابالك بلي الناس وصلوا ونتي راقدة
حليت عينيا نشوف في ماما واقفة عند راسي وتعيط...... هزيت راسي نشوف الساعة لقيتها 15:30 ......
انا: اععععععععع ماما راح الحال وانا مزال ماوجدتش روحي
ماما: ايه علابالك كنتي راقدة..... كيلي هدا وقت الرقاد.........
دخلت للدوش غسلت وجهي.....ورحت لبيتي..... لبست روبا بلو غوا.... و طالون نوار..... درت مكياج خفيف..... و طلقت شعري...... هبطت للكوزينة.... لقيت نورهان و حياة يوجدو فالقهوة.......
نورهان: (جات سلمت عليا الانها جات مع دارهم ) اهلا بعروستنا الزينة..... كي راكي
انا: لباس الحمد لله ونتي
نورهان : والله لباس في رحمة ربي
انا: الحمد لله.....اسمعي... شكون جا من داركم
نورهان: جات ماما وبابا و ايمان و سهام وامال وانا......
انا: ههههه ايه نتي راني نشوف فيك.... نتي بنتك وقتاش يهديك ربي وتجيبيها من داركم راني توحشتها(ريحان كانت في دار جدها )
نورهان :ايه راي هنا.... جات معانا.... والله من لي جينا وهي تحوس عليك.... تقولي غير بغيت كنزة بغيت كنزة
انا: والله حتى انا توحشتها..... اسمعي نسقسيك.... حسام مجاش ؟؟؟
نورهان :ايه مجاش-_-......يعني كي مايجيش هو عمي العربي لي يلبسلك الخاتم
انا: ههههههههه ضحكتيني والله شكون عمك العربي...
نورهان.:وانا وين نعرفو ههههههه قلتها هكاك.............. بقينا نضحكو..... دخلت ماما قالتلي باش ندي القهوة....... هزيت القهوة..... نمشي ونرجف......ممكن ماتكونش هادي اول مرة.... ولا حتى ثاني مرة..... مي كي يكون خطيبك الراجل لي تحبيه......راح تتوتري اكيييد......دخلت للصالون..... جات عيني على حسام..... قاعد قدام محمد...... لابس شوميز نوار و سروال كلاسيك نوار...... اااااااه يدي العقل..... هاديك اللحية....هداك الشعر.....هاديك الضحكة ....بقيت نشوف معاه و دايخة في عينيه اااااااه يا يما على عينيه...... نمشي و نشوف معاه..... حتى تقلبت رجلي...... على شعرة ما طحت...... نشوف فيهم كامل طرتقوا بالضحك.........
ماما :هههههههه سايسي روح يا بنتي هههههههههه
انا حشمت.....وجهي حمار..... رحت عطيتلهم القهوة و قعدت..... هزيت راسي نشوف في حسام..... لقيتو مهبط راسو و يضحك ............انا راح نموووت من الحشمة.... يعني هداك مكان خاصني انا اصلا كنت حاشمة و زاد كمل عليا هدا ...........................تفاهمو على الشرط.... والفاتحة بعد شهر.... والعرس راح يكون بعد شهرين........الانو ماماه قالت بلي لازم نزربوا هاد المرة.....لانعودو نبطلو كيما المرة لي فاتت..... حسيتها مزالت مصفاتش من جيهتي.......حتى خوتاتو نحس فيهم يشوفو فيا شوفة صامتة........ لبسلي حسام الخاتم.....و طلعت معاه لبيتي باش نحكي معاه
حسام: ايه احكي واش تحبي
انا: حسام اعطيني لفيديو لي صورتو....
حسام :ههههههههههههههه حبي (جا حكملي يدي وقاللي)كي نتزوجو وتولي مرتي في داري هداك النهار نعطيهولك
انا:فففففف حسام ياك قلتلي راح تعطيهولي كي نتخطبوا .....حسام اعطيني كلمة وقوللي وقتاش تعطيهولي
حسام: ممممممم نوعدك بلي الفيديو راح يكون الكادو نتاع دخلتك هههههه
انا وجهي حمااااار تمنيت الارض تتشق و تبلعني....... هربت نجري حليت الباب و هبطت لتحت...... لقيتهم راح يروحوا......... زاد هبط حسام.......انا كي شفتو هبطت راسي ماقدرتش نشوف معاه...... مي هو دارها زكارا فيا وقال لبابا......
حسام:عمي راني حاب نقوللك حاجة........
انا قلبي راح يخرج من بلاصتو.....خفت ليقول لبابا..... شفت معاه نتاع بلع فمك.....
بابا:ايه ولدي احكي راني نسمع فيك...
حسام: مممممم عمي راني حاب نقوللك من دركا... باش من بعد ماتقولوش راو مقاللناش.....انا كنزة نحبها تبطل الخدمة.... يعني انا مانحبش مرتي تخدم..... انا الحمد لله قادر نوفرلها كل شيء.......وصراحة مايساعدنيش مرتي تخدم....نهار كامل هي في وسط الرجال ....... انا راح نخليها تخمم في راحتها يعني مانيش اناني باش نحرمها من خدمتها....و هي حرة في قرارها......
بابا: ان شاء الله خير يا ولدي..... خليها تخمم و غدوة نرجعلك.......
حسام: ماعيش يا عمي.... حنا دوركا نروحو.... غدوة ان شاء الله نحكيو ..........................................
هوما خرجو.... وانا طلعت لبيتي........بدلت قشي و تكيت راح نرقد.... حتى الهدرة مانيش قادرة نهدر........هزيت موبيلي باش نشوف الساعة...... نلقا ميساج من عند حسام......كنت راح نفتحو نقراه.... حتى نلقاه عيطلي....هزيت عليه.......
حسام:شوفي يا كنزة.... نحبك تسمعيني مليح مليح ......نحبك دوركا تهبطي عند باباك و تقوليلو بلي موافقة تبطلي خدمتك..... وماعندكش مشكل فالقعدة فالدار..... و والله لوكان ماتقوليلوش.... دوركا نجي و نعطيلو الفيديو يتفرجو... ونتي خيري....
انا: حسا... تيط..... تيط... تيط....
الكلب كوبالي في وجهي....... موش هدا لي كان يقول لبابا بلي ماوش حاب يحرمني من خدمتي.... وماوش اناني..... ففففففف.... باغي يبان قدامهم ملاك.... وانا الشيطان.... ماعليش يا حسام................. حطيت راسي عالمخدة... نغلي وحدي...... لوكان كان حسام قدامي راني كليتوا.......حسام حطني في موقف صعيييب بزااااف...... نفس الموقف لي تحطيت فيه من 10 سنين..... وقت لي خيرني بين قرايتي و هو.....انا وقتها خيرت قرايتي.... وكنت غالطة في قراري..... صح حققت حلمي... ووصلت للي كنت حاباتو..... مي ماشفتش الفرحة..... ماكنتش فرحانة في حياتي..... على هاديك مانيش راح نعاود نفس الغلطة..... صحيح راح تغيضني خدمتي كي نخليها..... مي هاد المرة انا قررت نخير حسام.... ونشوف ادا راح نلقا معاه السعادة لي راني نحوس عليها..... مع اني مانيش متأكدة.................
داتني عيني رقدت...... نضت على 20:00 .....هبطت لتحت عند ماما لقيتها توجد فالعشاء .........
ماما:واش بنتي ريحتي شوي
انا: ايه ماما شوي..... والله هاد الايامات راني نتعب فالخدمة
ماما: ربي يعاونك يا بنتي.... هاو مابقاش مامبا شهر وتتزوجي.... تحبسي الخدمة وتتهناي .....
انا: هههههه شكون قاللك بلي انا راح نسمح في خدمتي.... ياك علابالك بلي مستحيل نقدر نحبس من الخدمة
ماما:كيفاااش .....راح تعاودي نفس الغلطة لي درتيها من قبل..... راح تسمحي فالراجل لي يحبك و شاريك على جال الخدمة...... اااااااه يابنت كرشي واش درتي فيا...... راح تهبليني على جال القراية.....سمحتي فيه من قبل و عذبتيه و عذبتي روحك و عذبتي خوك معاك...... و دوركا على جال الخدمة نتاع الزمر راح تزيدي تسمحي فيه.....
انا: ماما افهميني راي الخدمة لي
قاطعتني مخلاتنيش نكمل هدرتي
ماما: شوفي يا كنزة والله والله و الله ياو ماتحبسيش الخدمة هاد المرة.... وتقبلي بشروط حسام.... والله ماكي بنتي مانعرفك.... راكي كثرتي فيها.... اووووو شوفي نورهان كيعادت بعقلها و قافزة...... مع قاللها خوك حبسي لقراية حبست.... ونتي تيبسي في راسك..... كيعاد مالقيتيش شكون يكسرهولك........... خرجت وما خلاتنيش مامبا نحكي معاها..... انا اصلا هاد المرة خيرت حسام..... ماشي كيعاد هددني..... مي مرانيش حابا نزيد نعاود نخسر..... سايي عييت من الخسارة............ رحت عند بابا كان في بيتو....... حكيت معاه و قلتلو بلي راني موافقة وراح نحبس الخدمة
بابا: كنزة هادا قرارك النهائي.... يعني راي الحكاية ماهيش تمسخير..... نحبك تخممي مليح...... و انتي
انا: لالا بابا بربي هاد المرة راح ندخل على الصح.... وفرات............ عيط بابا قالل لحسام........انا طلعت لبيتي نرتح الاني غدوة نخدم.....