حسام و كنزة

23

فاتو سنين من حياتي مافيهمش حاجة مهمة.....نقرا... ونبراتيكي فالسبيطار... بالمختصر المفيد حياتي مملة .............................................
بعد 3 سنين :
اليوم نتخرج من الجامعة بعد تعب و خدمة نتاع 7 سنين..... اليوم راني فرحانة ههههه ممكن هدا هو النهار الوحيد لي فرحت فيه بعد انفصالي على حسام ..........دارلي بابا عشاء عرض فيه لافامي نتاعنا و حبابنا...... جاو كامل يكثر خيرهم و فرحولي.... حنا قاعدين نحكيو و نضحكو... حتى هدر عمي : اليوم مناسبة سعيدة لكل العايلة.. كنزة فرحتنا و هزتلنا ريوسنا.... وانا اليوم الفرحة نحب نردها فرحتين.... ونحب نخطب بنتك كنزة لولدي هيثم وادا راك موافق مكلاه نطولو فالحكاية و نديرو الخطبة هاد السمانة...............
انا جاتني صدمة كبيرة مكنتش متوقعتها ....هه هداك ماو خاصني... انا معطيتش لحكايه اهمية كبيرة و كملنا نحكيو كلي ماسمعتوش واش قال... .............................. كنت نحكي مع مرت عمي.... نشوف في عمتي لويزة(هاديك لي لقيتها في بيتي ادا تشفاو)
جات سلمت عليا وقالتلي: مبروك يا الزينة نتاع عمتك فرحتيني
ضحكت معاها وقلتلها: يبارك فيك عمتو هيهيهيهيه .........................
حطو لعشاء تلمينا كامل على الطابلة الكبيرة نحكيو و ناكلو حتى قاطعنا بابا: مجيد خويا نتا قبيل خطبت بنتي مني وانا عطيتك و السمانة لجاية ادا تحب ارواحو لبسو الخاتم لعروستكم ....................................
انا كنت ناكل... الماكلة حبستلي اووووو بابا هبل واش راو يقول.... اه ياربي والله ماو ناقصني........ سهرة كاملة وانا قاعدة من فوق قلبي... نستنا فيهم يروحو باش نحكي مع بابا......... طلعت لبيتي وقلت لختي كي يروحو كامل تجي تعيطلي
تكيت في بيتي نخزر للسقف و نخمم.....جات اختي قالتلي بلي روحو كامل...... هبطت عند بابا نجري دخلت لصالون كان يحكي مع ماما
انا: بابا واش هاد الحكاية كيفاش تقول لعمي بلي راك قابل
بابا: ايه راني قابل... علاش نتي عندك مشكل
انا: ايه بابا مانيش موافقة.. مانيش باغية نزوج دوركا
بابا: لالا ماشي على رايك... درت غلطة وقت وافقت على حسام.. نتي كنتي صغيره و ماكنتيش واعية واش راكي ديري وكان لازم عليا انا نمنعك
ودورك انا لي راح نخيرلك لي تكملي حياتك معاه وهو هيثم ولد عمك و مانحبش نسمع من عندك حتى كلمة انا سايي قررت و والله ياكنزة ادا عارضتيني والله لاكي بنتي ولا نعرفك و ونتبرى منك لاخر يوم في حياتي
انا: بابا مي انا
بابا: كنزة ماتناقشينيش انا سايي قررت ياك خليتك درتي رايك المرة لي فاتت وشفنا النتيجة... رجعتي مطلقة قبل حتى ماتتزوجي و ديري عرس ..........................................
شفت عند بابا... مانقدرش نخسرو قلتلوا كيما تحب.. وطلعت لبيتي حطيت راسي على مخدتي و بديت نبكي... مانيش مصدقة بلي راح نكون لواحد بلا حسام ...................................................
اليوم راح يجيو دار عمي باش يلبسولي الخاتم و يتفاهمو على الشرط...................... نضت الصباح قلقانة دوشت و رحت عند الماشطة... كل شيء كان عكس خطبتي مع حسام..... حتى الجو اليوم يخلع.... الغبابر و الرعد مع انو رانا في جويلية.... خليت للماشطة الحرية... مشطتلي كيما حبت و حتى الماكياج كيما حبت..... في خطبتني مع حسام كنت مركزة مع كل حاجه دارتهالي الماشطة الاني كنت حابة حسام يشوفني ازين وحدة.... مي اليوم ماوش هامني...دارتلي شعري كورلي و لماتو على شكل شينيون ومكياج قاوي..... روحت للدار لقيتها داخلة بعضاها... ماما و خالتي يطبخو والبنات يعدلوا فالحالة... طلعت طول لبيتي.... لبست روبا حمراء و ضهرها دونتال و طالون نوار ....قعدت نتفكر في خطبتي مع حسام كيفاش كنت فرحانة و متوترة.... مي دوركا جاتني عادي....... نسمع فصوت الطاكسيات طليت لقيتهم و صلوا...... نسمع في مرت عمي تزغرت..................... جات ماما قالتلي هيا اهبطي لعندهمرحت للكوزينة هزيت صينية القهوة و دخلت عندهم كانوا مخلطين لانو مكانش برانية.... عطيتلهم القهوة و جيت راح نقعد قدام ماما ساعا قاللي عمي: بنتي روحي اقعدي قدام راجلك...... رحت قعدت قدام هيثم.... حاكمة في دموعي بالسيف..... مانيش متقبلة انو يكون عندي راجل بلا حسام ......................................
وقفنا باش يلبسلي الخاتم.... هو دخل الخاتم في صبعي و حسيت نار و لهبت في قلبي دموعي هبطو وحدهم بلا مانحس.... اه ياربي راح نكون لواحد اخر.... قلبي تحرق نحس فيه يوجع فيا و بقوة..... قرصتني ماما.... مسحت دموعي..... و تبسمت بألم...... يعني صح... مايحس بالجمرة غير لي يعفس عليها..........
قعدو يحكيو و يضحكو وانا مانيش معاهم انا نخمم غير في حسام حبيبي..... علابالي بلي هادي تعتبر خيانة ل هيثم مي الله غالب <القلب و ما يريد>