حسام و كنزة

27

اب حسام :ايا بركاك من الهدرة الزايدة التمسخير مانيش قاعد للعب نتاعك السامط
بابا: ايه.... عمك عندو الحق بركاك من الجياحة راك كبير
رحيم: والله مني نكدب والله غير نورهان مرتي و ريحان بنتي.....تزوجنا في كندا بالخفية عليكم وواحد مكان يعرف غير حسام
شافو كامل عند حسام
حسام: ايه صح... رحيم و نورهان متزوجين عندهم 8 سنين و ريحان بنتهم
بابا: يا ساقط يا خامج تتزوج بلا ماتقولي اه 8 سنين وانت تكدب عليا و انا راقد على وذنيا
فففففف بابا مريض بالقلب و راني خايفة عليه رحت نجري جبت دواه... احتياطا لاي طارئ
اب حسام: تلاح راح يضرب نورهان....يا خامجة يا قح.... انا مداير فيك كونفيونس نقول بنتي راي تقرا ونتي متزوجة وعايشة خياتك اه ياربي اه
رحيم : نتوما لي خليتونا نديروا هاد الشيء.... نهار جيت وخطبتك في نورهان... قلتلي لالا.... مانمدلكش بنتي خايف لاديرلها كيما دارت اختك لولدي....... في جرت كنزة منعتونا. يعني ماحسيتوش بينا... انا قلبي تقطع.... وهي تاني..... ماخممتوش فينا ماقلتوش هادوك يحبو بعضاهم لازم نعطيوهم فرصة لازم نجمعوهم مع بعضاهم ... نتوما انانيين تخممو غير في رواحكم... . انا حبيت نورهان وهي تاني..... وخوها زوجنا ودورك عندنا طفلة....
حسام: بابا اليوم ماجيناش باش نديرو مساكل..... جينا باش نحلوهم.... علابالي بلي غلطنا كي خبينا عليكم مي ماخليتولناش حل واحد اخر......
بابا: اسكتو عليا والله ماتحشمو..... رحيم ولدي... انا هكدا ربيتك.... انا هكدا قريتك... اهدر..... انا ربيتك وكبرتك.... باش تولي راجل ماشي طحان......
ماما: اه ياربي علاش عليك يا ولدي ....علاش تحرقلي في قلبي
ام حسام شافت مع بنتها قالتلها: خسارة تربيتي فيك وطاحت داخت..... نضت انا نجري جبت كاس ما و قرعة ريحة و بديت نفيق فيها..... شفتها بدات تفيق رحت جبت لاباراي نتاع لا طانسيو ونتاع السكر.... قستهملها لقيت لاطانسيو نتاعها هابطة.... رحت درتلها شوي ملح فالماء وجبتلها تشرب....... قعدو شوي من بعد مشو
بابا حاوز رحيم من الدار...... وانا طلعت لبيتي مازلت مشوكيا من لي صرا .....

تكيت على سريري و مازلت ماستوعبتش لي صرا قبيل لتحت..... دخلت ماما لبيتي تبكي
انا: فففف ماما سايي ماتبكيش
ماما: اه يابنتي راو قهرني.... 8 سنين يابنتي وهو متزوج وماخممش حتى يقوللي .....
انا: ماما سايي هوما غلطو.... وحنا لازم نصلحو هاد الغلطة..... رحيم خويا و ريحان بنتو و نورهان مرتو... لازم نسامحوهم و نبداو من جديد
ماما: اه يابنتي لوكان جا في يدي راني سامحتو اليوم قبل غدوة..... مي الله غالب.... باباك قال بلي ماعندوش ولد اسمو رحيم
انا: ماما دورك نهبط عند بابا نعطيه دوه ونحكي معاه............. هبطت لقيتو قاعد فالصالون حا راسو بين يديه ويبكي...... اه ياربي.... بابا يبكي.... بابا لي طول عمرو.... يمسحلنا في دموعنا.....اليوم... راو يبكي.... رحت نجري عندو قعدت عند رجليه و نبكي
انا: بابا على وجه ربي ماتبكيش..... راني مانحملش نشوف دموعك
بابا: اه راو قهرني.... ولدي قهرني.... ولدي تزوج من ورا ضهري.....
انا: غلط يا بابا غلط..... وانت لازم تسامحو..... يا بابا راو 8 سنين غايب علينا يا بابا ....راو ولدك من لحمك ودمك.....
بابا: مانقدرش يا كنزة مانقدرش...
انا: ماعليش بابا سايي ريح روحك و ماتتقلقش روح دوركا ترقد و غدوة نحكيو......
ديت بابا لبيتو عطيتو دواه وغطيتو..... وانا طلعت لبيتي حطيت راسي على المخدة..... ففففف ياربي واش هاد اليوم لي فات عليا..... اليوم عرفت بلي خويا متزوج و عندو طفلة..... حسام رجع بعد 10 سنين هههه وقلبو معبي عليا......... قعدت نخمم كيفاش راح نديرو فالمصيبة لي رانا فيها....داتني عيني ورقدت......فقت الصباح..... دوشت.... ولبست قشي وخرجت لقيت بابا قاعد يفطر....قعدت فطرة معاه..... من بعد خرجت رحت لخدمتي...... وصلت لكلينيك.... طلعت بدلت قشي ....ورحت نعاين المرضى نتاعي........ ..........طلعت للبيرو نتاعي.... حليت الباب...... لقيت رحيم و نورهان يستناو فيا دخلت و قربت سلمت عليهم
انا : صباح الخير كيراكم
نورهان : صباح النور كيفاش تحبي نكونو..... ماما و بابا غضبانين عليا.... حتى حسام ماحبوش يحكيو معاه
انا: نورهان.... ماعليش...... فالاول راح يقلقو منكم ....حتى نتوما راكم حطيتوهم قدام الامر الواقع....مي نتوما ماتستسلموش و بقاو تحاولو حتان يسامحوكم
رحيم : كيفاش راو بابا.... واش قال كي خرجنا
انا: رحيم بابا راو مجرووح منك بزاااف.... البارح شفتو يبكي.... وانا راني خايفة عليه......
رحيم : اسمعي... حاولي تقنعيه باش يشوفني..... لازم نطلب منو السماح...
انا: اوك.... ندير لي نقدر عليه..... نتوما لعشية ارواحو للدار..... وبربي ان شاء الله نقدرو نقنعوهم....
نورهان: ايه وقولو لبابا و ماما تاني يجيو..... مانيش حاملة روحي وبابا و ماما غضبانين عليا (وطرتقت بالبكا)
انا:(حضنتها) سايي اختي بربي ان شاء الله ليوم تتسامحو.... و يرضاو عليك
نورهان و رحيم : ان شاء الله.... دوركا نخليوك لعشية نتلقاو
انا : اوك لعشية ان شاء الله
خرجو هوما انا رحت كملت خدمتي.... وروحت روطار كان عندي بزاف مرضى .......... دخلت للدار نلقاهم كامل تما رحيم.. نورهان.. ماما... بابا... ام حسام.... باباه.... خوتاتو... كامل تما....بابا يعيط عليهم... وماما تحاول تهدي فيه.....
بابا: بلع رب فمك.... يا طحان.... تكذب عليا وتقولي نخدم.... وانت متزوج...وفرحان.... ماخممتش فيا انا.... ما خممتش في امك كي نسمعوا واش يصرا فينا اهدر....
اب حسام : بلعي عليا فمك يا الخامجة ماكيش بنتي.... انا ماعنديش طفلة... تتزوج بالخفية....
نشوف فيهم كامل يعيطو.... نورهان تبكي و حسام يحاول يفسرلهم..... شفت بلي لازم نتدخل... و نحاول نهدي الوضع
انا: بابا.. ماما (واحد ماسمعني) بااااباااا سايييييي
شافو كامل عندي مستغربين
انا: اسكتو... احكيو بالواحد.... علاش تحكيو كامل.................. بابا اسمعني.... علابالي بلي رحيم ونورهان دارو غلطة كبيرة... بصح حنا لازم نسمعوهم.... ونخليوهم يدافعو على رواحهم..........
بابا: مانسمعهمش.... لي مانهموش انا.... مايهمنيش
انا: بابا ماوش غير هوما لي غلطو.... حتى نتوما درتو غلطة كبيرة..... هوما قالولكم بلي يحبو بعضاهم وحابين يتزوجو.... مي نتوما وقفتو في وجه زواجهم و في وجه فرحتهم

عمي رحيم جا لعندك وخطب نورهان منك.... مي انت حاوزتو.... انت خليتو يخلص حق غلطة درتها انا..... غلطة كان لازم انا لي نتحاسب عليها..... ماشي نورهان وحسام... وانت بابا.... ياك جا عندك رحيم وقللك اخطبلي نورهان.... انت ماسمعتوش حتى وقللتلو غير هديك ماتديهاش...... .. عامين هوما صابرين.......ونتوما ماحسيتوش بيهم...... حتان تزوجو بالخفية عليكم......هوما على الاقل تزوجو..... واحد ماو قادر يحكي عليهم...... مي تخيلو لوكان هربوا وماتزوجوش..... كيفاش كنتو راح تقدروا تشوفو في وجوه الناس............ نتوما تصرفتو بأنانية .......ودوركا خليوهم هوما يحكيو لي عندهم ..............
رحيم : بابا... عمي.... علابالي بلي غلطنا كي تزوجنا بالخفية مي نتوما مخليتولناش حل اخر نتوما ضلمتونا....حاسبتونا على غلطة كنزة... وحنا معندناش فيها ذنب..... عاميين وحنا نستناو وقتاش توافقو.... حسام دار المستحيل باش يخليكم تقبلوا.... مي نتوما وقفتوا في وجوهنا.......حطمتولنا احلامنا
نورهان: ايه رحيم عندو حق..... انا مكنتش راح نقبل نتزوج بيه بلا موافقتكم.... مي حسام قنعني و وقف معايا و مع سعادتي...
انا: سامحوهم وخليونا نفتحو صفحة جديدة.... هوما ماغضبوش ربي... تزوجو على سنة الله و رسوله..... سامحوهم وخليو القلوب تصفا وغمزت لرحيم........
ناض هو ونورهان باسو يد بابا.... عنقهم لزوج ويقوللهم: سامحتكم.....زادو راحو عند ماما و باباها وماماها....... تعانقو وتسامحو...... وكملنا العشية نحكيو ونضحكو ....... كان ناقصنا حسام حبيبي..... والله القعدة بلا بيه سامطة....................
ام حسام: انا نقوللكم الصراحة..... صح تسامحنا و صفينا القلوب.... مي انا مازال قلبي مصفاش من ناحية كنزة....... لاني عمري مراح ننسالها واش دارت لولدي..... وكيفاش خدعاتو..... مي ملازمش نخليو نورهان و رحيم خلصو ثمن غلطتها
..........انا نحكي في قلبي : واش من غلطة درت حسستوني كيشغل.... قتلت حسام..... ففففففف راني ماغلطتش..... خيرت قرايتي..... صح ندمت.... مي مانعتبرهاش غلطة اصلا خوتاتو لي من الصباح هوما يشوفو فيا بواحد الشوفات و يرميو فالهدرة... وترولي اعصابي .....
كنت راح نرد عليها..... مي محبيتش نرجع نوتر الوضع...... سكتت و بلعتها
ماما: ايه وين راي حفيدتي حبيت نشوفها
نورهان : هههههه راي مع خالها دورك نعيطلو يجيبها .............عيطت لحسام قالتلو يجيب ريحان..........................................قعدنا نحكيو حطينا لعشاء تعشينا..... من بعد حطينا حويج السهرية.... لاتاي.... قهوة... مكسرات... قاطو وكملنا نحكيو......... دق دق الباب خرج رحيم حل...... شوي ودخل هو ومعاه حسام هاز ريحان......... ترماو كامل يبوسو و يحضنو في ريحان..... وانا نشوف عند حسام بسرقة... حبيت نشبع عينيا بشوفتو ......