حسام و كنزة

26

انا:مارديتش عليهم و درت روحي ماسمعتهمش مع اني حاكمة دموعي بسيف... جرحوني بكلامهم بلبزاااف قلبي راو يتقطع من جرت كلامهم.....مي مابينتش ودرت نحكي مع امينة
انا: امينة نعول عليك دهنيلها بوماد ليدها و ديريلها بونداج.... انا راح نخرج وممكن نطول شوي وادا كان حاجة مستعجلة عيطيلي
امينة : اوك دكتورة
نورهان: فففففف اكيد رايحة مع هداك لي مايسواش..... والله تشبهو لبعضاكم ......درت باش نخرج شفت حسام شاف فيا شوفة نتاع غش... هبطت راسي و خرجت ........................................................طلعت لبيرويا لقيت هذاك الحيوان ....زعما باغي يطلب السماح..... ففففف سكتتو بكلمتين..... و حاوزتو....... نحيت قشي نتاع الخدمة...لبست قشي وخرجت...... روحت للدار طليت على بابا و ماما تغديت معاهم و رجعت لخدمتي لاني اليوم نخدم فالليل.... دخلت لبيت ريحان لقيتها راقدة و نورهان راقدة على الكرسي قدامها.... رحت جبدت كوات من الخزانة و غطيت بيها نورهان.... فاقت كي غطيتها
انا: سامحيني نورهان مكانش قصدي نفيقك
نورهان : لالا عادي...
انا: نورهان... سامحيني.. علابالي بلي... بزااف مشاكل صراولكم بسبتي... مي الله غالب والله ماني قاصدتهم
نورهان: ماعليش... حتى انا سامحيني علابالي بلي قسينا عليك ....مي نتي لي دفعتينا
انا: نورهان قداش عندك ملي رجعتو لدزاير
نورهان: عندنا 5 اشهر
انا: كيفاش حتان تزوجتو احكيلي
.......حكاتلها نورهان كل شيء... كيفاه رحلو و كيفاه تزوجت هيا وياه و كيفاه قرروا يرجعو لدزاير.......
انا: نورهان كيفاش راح تحكي لداركم على زواجك و على ريحان
نورهان: 8 سنين و انا نكذب على دارنا... تزوجت بالخفية و حتى بنتي جبتها بالخفية.... قداه من مرة وماما تبغي تطلع عندنا لكندا مي حسام دائماً يديرلها سبايب ويعطللعا فالوراقي نتاعها.... تخيلي حتى بابا كي كان يجي عندنا كان رحيم يهز بنتي و يروحو لدار واحد اخرى ....والله غير كرهت حياتي كامل كذب نبان راني ندير فالحرام... حتى كي رجعنا لدزاير... خليت بنتي مع حسام و رحيم.... واليوم راني كذبت عليهم و قلتلهم بلي راح نبات في دار حسام
انا:(والله غير شفتني مسكينة) مممم نورهان علابالك حتى حنا رجعنا نتوحشو رحيم.... رجع يطل علينا مرة في 3 اشهر.... وكي تقولو ماما علاش ماتجيش يقوللها نخدم في ولاية ****** ماعنديش الوقت..... علابالك بلي واحد ماشك بلي رحيم يكون متزوج و عندو دراري
نورهان : ايه مي حنا سايي رجعنا و غدوة بربي ان شاء الله راح نخبروهم بكل شيء.....لاني مانيش قادرة نزيد نتحمل العيشة بالخفية........
انا : ربي يكون معاكم و ان شاء الله يقدرو يتقبلو الموضوع..... وراني حابة نقولك بلي راكي غالطة مانيش انا السبة فلي راكم فيه... يعني انا مكان مادخلني...
نورهان : كنزة ربي يعيشك اسكتي.... نتي هي السبة فلي رانا فيه.... نتي لي خليتي خويا في شهر عرسكم.... بلاش سبب.... نتي لي خليتي خويا يدمر نفسيا.... يرجع مهبول.... خويا لي كان يصلي و مايديرش حاجة غالطة في سبتك رجع يشرب رجع يروح للدار سكران يا كنزة في سبتك..... في رايك ماما و بابا كي يشوفو حالة حسام هكدا راح يقبلوا عادي برحيم يجي يخطبني.... هوما خافوا لايصرالي كيما صرا لحسام علابيها ماقبلوش.....نا: ففففففف علاش ماتحبوش تفهموا بلي انا حسام خليتوا على جال قرايتي... على جال مستقبلي..... ماقدرتش نتخلا على حلمي..... خوك حطني في موقف صعب.... اضطريت نخير بين قرايتي و حب حياتي....... وهو كون جا يحبني صح كون راهو خلاني نقرا... وماوقفش في طريق نجاحي
نورهان : بلعي فمك.... حسام مستحيل يمنعك من قرايتك.... كان حاب يجربك شكون تخيري.... كان متأكد انك راح تخيريه هو. .. مي نتي حطمتيه نتي تخليتي على حسام لي حبك و خاف عليك كثر من روحو.... واش فيها ادا حبستي لقراية.... هاو خوك حبسني من لقراية.... واني معاه و ماخليتوش وراني فرحاانة معاه..... نتي في رايك شكون خلصك البارح من يدين هداك الحيوان لي كان راح يغتاصبك.... اهدري..... حسام هو لي خلصك.... كي شافك ركبتي معاه هبللل.....مقدرش يشوفك مع واحد اخر..... تبعك وشاف هداك الخامج واش كان راح يديرلك.... هو ليبعث رجالو باش يخلصوك منو..... كان خايف عليك حتى بعد كل لي درتيه فيه ..... كان راجلك مي جامي خمم يقربلك ولا يقيسك.... جامي خمم يدير معاك علاقة..... تعرفي علاش.... كان خايف يموت ولا كشما يصرالو ويخليك كان خايف من هدرة الناس عليك.... مي نتي انانية خممتي غير في روحك...... في سبتك خويا رجع يشرب.... رجع كل ليلية مع طفلة.... كل ليلية يبات مع وحدة.... برك باش ينساك.... مي ماقدرش.... 10 سنين هو يتبع في اخبارك.... كان يراقب فيك..... كان عارف بكل تحريكة تتحركيها وهو في كندا..... خويا عشقك يا كنزة.... مي نتي خسرتيه..............................
هي تحكي وانا دموعي هبطوا