مالكة الفؤاد (نور على باب الفؤاد ٢)

الفصل الواحد والثلاثون

انتظر رئيس النيابه حتى انتهى احمد من سرد ماحدث قبل ان يقول : وفين بطاقه نور
سلمه احمد اثبات شخصيه نور لينظر رئيس النيابه اليها مطولا ثم ينظر الى مالكه قبل ان يقول موجها كلماته الى احدى العساكر : اتحفظلى عليها يابنى ..
هب احمد واقفا من مكانه معترضا على مايحدث لكن استوقفه رئيس النيابه قائلا بهدوء : ايه بقى اللى يثبت انها مش نور ..
احمد بغضب وهو يرى نظرات الهلع والخوف تملأ وجه زوجته : يعنى ايه .. ايه اللى يثبت .. انا معايا شهاده وفاه نور .. اهى اتفضل ..
نظر رئيس النيابه الى الورقه المقدمه اليه من قبل احمد قبل ان يُجيب : وايه بردو اللى يثبت ان اللى اتدفنت هى نور
احمد وقد احمر وجهه من الغضب : هو ايه اللى ايه اللى يثبت .. بقولك نور ماتت دى مالكه مراتى
مالكه بذعر : اه والله انا مش نور انا معملتش حاجه خليهم يسيبونى يااحمد ..
قالت جملتها الاخيره وهى تنظر الى احمد برجاء والذى انقض بدوره على ذلك العسكرى يحمى زوجته منه ..
هب رئيس النيابه واقفا قبل ان يقول بلهجه صارمه : انت نسيت انت فين سيبه حالا قبل ماتتحبس انت كمان ..
رجته مالكه كى يترك ذلك المجند المغلوب على امره فامتثل لقولها .. عندئذ امر رئيس النيابه بانصراف العسكرى تاركاً مالكه التى شحب وجهها بشده ..
رئيس النيابه بلهجه جاده : لولا انى متفهم حالتك كان حيبقى ليا تصرف تانى ... عموما انت محتاج محامى للمدام ..
احمد محاولا كتم غضبه : انا مش فاهم انتوا بتعملوا كده ليه ده احنا اللى جايين برجلنا وانا مش حمشى من هنا من غير مراتى ..
رئيس النيابه : بهدوء يااستاذ احمد لو سمحت حضرتك تطلب المحامى على مانستوجب الاستاذه نسألها على شويه اسأله ..
وجه كلماته الى مالكه مُكملاً : تحبى اطلبك ليمون
حاولت مالكه تماسك اعصابها قبل ان تُجيبه : لا انا كويسه
رئيس النيابه : تحبى نبدأ التحقيق
مالكه بآليه شديده : اتفضل
رئيس النيابه : اللى فهمته انك اخت المتهم عمر
مالكه : اه
رئيس النيابه : كنتى عارفه بموضوع المذكرات
مالكه : لسه عارفاها من قريب
رئيس النيابه بجديه : يعنى مش انتى اللى كتبتيها ..
نظرت اليه مالكه بحده قبل ان تُجيبه : لا طبعاً مش انا
رئيس النيابه : وليه لا .. انتى من حقك تخافى على اخوكى .. ممكن تكونى كتبتيها عشان تبرأيه وتثبتى التهمه على حد تانى ..
احمد مقاطعا : لا نور هى اللى قالتلى بنفسها قبل ماتموت ان فى مذكرات ..
رئيس النيابه بجديه موجها كلماته الى احمد : استاذ احمد حضرتك بتحضر التحقيق بشكل ودى وانا سايبك بس عشان تبقى مطمن انما مينفعش حضرتك تدخل او تجاوب بدلها يااما هضطر اخرجك بره ..
اومأ احمد برأسه متأففاً قبل ان يستكمل رئيس النيابه استكمال تحقيقه مع مالكه ..
بعد اقل من ربع الساعه كان المحامى الخاص بأحمد يقف ماثلا امام مكتب النيابه ..
وبعد الكثير من المناقشات والمناورات بينه وبين رئيس النيابه نجح فى اخراج مالكه بكفاله حتى يتم انتهاء التحقيق والتأكد من صحه شخصيتها بالاضافه الى اصدار أمر بمنعها من السفر خارج البلاد الى حين انتهاء القضيه ..
لكن قبل مغادرتها تم اخذ عينات من الحمض النووى الخاص بها وبصمات اصابعها وايضاً طلب رئيس النيابه وثيقتى زواج احمد من مالكه ونور ..
عقب مغادرتهم استدعى رئيس النيابه الظابط المسؤول عن القضيه والذى مثل امامه سريعاً ..
رئيس النيابه : انا عاوزك تعمل تحليل dna لمالكه وعمر .. وتحليل تانى لمالكه وغرام بنت احمد
ظابط الشرطه : انت فعلاً شاكك انها ممكن تكون نور
رئيس النيابه بترو : شغلنا مفهوش شاكك ومش شاكك .. احنا كل حاجه بنصدقها لازم ادله وبراهين عليها ..
ظابط الشرطه : طيب لو طلعت اخت عمر حنعمل بردو ت..
رئيس النيابه مقاطعاً : لازم بردو تحليل غرام معاها مايمكن نور تبقى اخت عمر واحنا منعرفش
ظابط الشرطه : ازاى ماهو شهادات الميلاد بت...
رئيس النيابه مقاطعا : ملناش دعوه بشهادات الميلاد حتى لو جبتلى امهم نفسها تقول انهم مش اخوات .. قولتلك احنا مهمتنا اثبات الحقائق بالادله والبراهين
ظابط الشرطه : طيب لو مطلعتش ام غرام يبقى كده هى مش نور وتبقى مالكه ..
رئيس النيابه : لا كده ياحضره الظابط احنا نفينا انها مش نور بس لسه مأثبتناش انها مالكه
قطب الظابط مابين حاجبيه محاولا الاستيعاب : مش فاهم يعنى ايه
رئيس النيابه : يعنى احنا اخدنا الفيش بتاعها عشان يتقارن بالفيش والتشبيه اللى عملته لما اتخرجت ووقت مااشتغلت .. وده حيأكدلنا اذا كانت مالكه ولا لا ..
وكمان حيتقارن بالفيش اللى فى وثيقه زواجها باحمد سواء بتاعت مالكه او نور ..
ظابط الشرطه : اااه فهمت عشان كده حضرتك طلبت شهادات الزواج
رئيس النيابه : مش عشان كده بس .. بس الاول قولى بمناسبه الشغل .. فى ولد اسمه مذكور فى التحقيقات اعتقد اسمه خالد كان شغال معاها فى المحل .. وده بردو اللى قبضتوا على عمر لما راحله صح..
الظابط : تمام يافندم هو .. تحب نستدعيه
رئيس النيابه بشرود : اكيد.. خلينا نشوف حكايته ده كمان ..