مالكة الفؤاد (نور على باب الفؤاد ٢)

الفصل الاخير

انتفضا على صوت هبه تقتحم عليهم الغرفه بقوه وهى تنظر اليهم بذهول بينما علامات الذعر تملأ وجهها وهى تقول :
انا مش مصدقه انتى يا ماما.. انتى يامالكه طلعتوا زيهم ..
ابتعدت مالكه عن نجوى تحاول فهم ماترمى اليه هبه : هم مين
هبه بسخريه : البنت ليندا وصاحبتها طلعوا شمال
نجوى باستغراب : يعنى ايه شمال
هبه : يعنى ياماما طلعت بتحب البنات .. ايععع وانا اللى كنت بسلم عليها بحسن نيه
مالكه غير مصدقه : مش معقول انتى بتتكلمى بجد .. واحمد كان عارف
هبه : اااه شوفتى هبلنا كانوا بيشتغلونا هم الاتنين وبيغيظونا بيها ..
تحول ذهول مالكه الى ضحكات فجأه وبدون اى مقدمات لتشاركها بها هبه ومن ثَم تلحق بهم نجوى ..

************
فى اليوم التالى تم استدعاء خالد للمثول امام النيابه لأخذ اقواله بخصوص مالكه لكن قبل ذلك .. وردت نتيجه تحاليل الحمض النووى ونتيجه الفيش الخاص بمالكه .. بعد ان امتثل الظابط المسؤول الى منزل احمد بصفه شخصيه فى اليوم السابق لأخذ عينه من لعاب غرام واستلام قسائم الزواج ....
استلم الظابط النتائج متوجها بها الى رئيس النيابه قبل استجواب خالد ..
الظابط المسؤول : صباح الخير يافندم
رئيس النيابه : ها طمنى النتائج طلعت
الظابط المسؤول : اتفضل يافندم .. النتايج اثبتت انها اخت عمر ومفيش اى علاقه بينها وبين غرام .
اما تحليل البصمات اثبت فعلا انها نفس بصماتها فى الفيش التابع للنقابه ونفس الفيش على وثيقه جوازها بأسم مالكه ..
رئيس النيابه : تمام .. وثايق الزواج اللى معاك دى بقى تعملى تحليل خطوط لخط الوثيقتين فى خانه امضاء العروس.. ويتقارنوا بخط المذكرات وخط مالكه فى امضاء المحضر امبارح ..
الظابط المسؤول : تمام يافندم تأمر بحاجه تانى
رئيس النيابه : نخلص من ده الاول وبعد كده نشوف ايه حكايه نور دى بقى .. بس استعجل النتايج ..
اه وقول للعسكرى يدخلى خالد ..
غادر ظابط الشرطه ليحل محله خالد بعد عده دقائق ..
رئيس النيابه : اسمك وسنك وعنوانك ..
اجابه خالد بتوتر : خالد .....
رئيس النيابه : ايه علاقتك بعمر
خالد بتلعثم : انا معرفهوش غير من كلام اخته عنه انما دى كانت اول مره اشوفه
رئيس النيايه : اخته اللى هى مين
خالد : مالكه سعتك
رئيس النيابه : وكان جايلك ليه بقى
خالد : كان جاى يسأل عن اخته
رئيس النيابه : وهو مكنش يعرف مكانها
خالد : معتقدش ..
رئيس النيابه : وانت بقى اللى كنت تعرفه
خالد بتوتر : يعنى
رئيس النيابه: يعنى ايه ممكن تتكلم بوضوح
خالد : بصراحه انا مكنتش متأكد انها هى عشان .. عشان غيرت وشها
رئيس النيابه : غيرته ازاى ولو غيرته انت عرفتها ازاى
خالد : مش عارف بس بس انا حسيت انها هى .. كل حركاتها كل كلامكها نفس صوتها نفس نظره عنيها .. كل حاجه كانت بتقول انها هى
رئيس النيابه : كان ايه علاقتك بيها
خالد : يعنى .. اصحاب
رئيس النيابه : مش اكتر من كده ؟
خالد : بالنسبالها معتقدش انما انا كنت بحبها
رئيس النيابه : تفتكر هى عملت كده ليه وغيرت اسمها ليه ... عشان الفلوس ؟
خالد : معرفش بس هى عمرها مااهتمت بالفلوس
رئيس النيابه : كانت بتحكيلك ايه عن اخوها
خالد : مش كلام كتير .. كانت بتحكى دايما عن طفولتهم مش اكتر
رئيس النيابه : قولت ايه لعمر بقى اما جالك
خالد : حكتله كل حاجه بصراحه وقولتله على مكانها
رئيس النيابه : مقالكش كان ناوى يعمل ايه ؟ كان حيروحلها
خالد : مقالش اى حاجه واول ماطلع من المحل اتقبض عليه ..
اكمل خالد بفزع : بس انا والله مليش علاقه بيه ولا اعرف عنه حاجه ..
رئيس النيابه : معاك صوره لمالكه ؟
خالد : اه معايا على الموبايل ..
تطلع رئيس النيابه الى تلك الصور الخاصه بمالكه واحتفظ بنسخه منها لمقارنتها بصورها فى اثبات الشخصيه الخاصه بها و تلك الصور فى الصحيفه الجنائية وملف النقابه ..
اكمل رئيس النيابه استجوابه لخالد الى ان انتهى اخيرا .. بعد تطابق اقواله مع اقوال مالكه واحمد وعمر ..