مالكة الفؤاد (نور على باب الفؤاد ٢)

الفصل التاسع والعشرون

جلست مالكه على طرف فراش نجوى تفتح ذلك المجلد ببطىء شديد بينما ترتفع دقات قلبها خوفا .. تدعو ربها بأن يكون ذلك هو دليل برائه اخاها ..
اخيرا استجمعت قواها وبدأت فى قراءه اول ورقه .. حسنا تلك هى مذكرات نور .. حمدا لله ..
ارتفع رنين هاتفها بأسم نبيل .. اااه لقد نسيته تماما وبالفعل تأخرت عليه .. حسنا لا بد لها من النزول الآن وستقرأ تلك المذكرات فيما بعد ..
اجابت على نبيل قائله : نبيل اسفه انى اتأخرت حنزل حالا
نبيل : لا براحتك قلت بس اشوفك لقيتى الحاجات ولا اكلم هبه اسألها
مالكه : اه اه لقيتها عشر دقايق بالظبط وحكون عندك
نبيل : تمام خدى وقتك
فتحت مالكه حقيبتها الخاصه بعد ان انهت المكالمه مع نبيل كى تضع تلك المذكرات بحوزتها لكنها سقطت منها ارضا .. انحنت هى لالتقاطها فلاحظت بعض الصفحات من الجهه الاخرى ..
اعتقدت فى البدايه انها ملاحظات خاصه بنور لكن بمجرد قرائتها لعده اسطر علمت ان تلك الكلمات لنجوى ..
(صدمه انك تكتشف ان الشخص اللى انت ساعدته وآمنت بيه وصدقته يطلع بيكرهك وان هو السبب فى كل حاجه بتحصلك وانه عض ايدك اللى اتمدتله بالخير والحب من اول يوم .. وصدمه ان الكائن الجميل المسالم البرىء يطلع قاتل وكمان بيخطط انه يخلص منك ومن عيلتك بس عشان الفلوس .. كل ده عادى جدا وبيحصل  ... بس اللى مش عادى انك متحاسبهوش على غدره ده وعشان كده انا قررت انى انتقم وارجع حقى وحق اولادى ..
من اول يوم قريت فيه المذكرات وفهمت انها سبب اللى بيحصلى روحت عملت تحاليل وعرفت ايه هى الماده اللى كانت بتحطهالى ووصلتنى للمرحله اللى كنت فيها دى وعشان كده قررت احاربها بنفس سلاحها ..
بقالها فتره عندها اكتئاب حاد وحاولت تنتحر بس كانت بدأت تتحسن الفتره اللى فاتت بعد ماراحت لدكتورها النفساني واكيد بعد كتابتها للمذكرات دى اتحسنت اكتر  .. بس عادى جدا ان الاكتئاب يرجع تانى وبطريقتى انا حيبقى ملهوش علاج غير الموت ... )
فغرت مالكه فاها غير مصدقه ماتقرأه اتلك الكلمات المخيفه تنبع من نجوى .. لم تستطع الانتظار او التفكير فاكملت القراءه بأعين تتسع اكثر واكثر مع كل حرف ..
(عرفت حنتقم منها ازاى لما واحده صاحبتى دكتوره صيدلانيه حكتلى عن نوع اعشاب معينه بتستخدمها فى الصيدليه لبعض تركيبات الادويه وفجأه لقت كميات كتيره منها بتنقص لحد مااكتشفت ان المساعد بتاعها بيبيعها لبعض الشباب اللى بيتعاطوا المخدرات ..
الموضوع لفت انتباهى وسألتها ليه هى بتسبب الإدمان.. فقالتلى ان جرعتها الزياده بتسبب الهلاوس والهذيان وكمان الارق .. بس خطورتها فى انها ممكن تكون ماده سامه لو اُستخدمت بكميات كبيره ..
عشان كده محظور تداولها خصوصا انها مش بتبان كمواد مخدره فى الكشف الطبى او التشريح لانها ببساطه بتترسب فى قاع العين وصعب انه حد يقدر يعرف ان الشخص ده متعاطى للاعشاب دى ..
ومن هنا جاتلى الفكره اللى حنفذها وخصوصا ان نور عندها تاريخ مرضى للاكتئاب والهلاوس فمحدش حيحس بحاجه غريبه بتحصل ..
عرفت اوصل للاعشاب دى وبدأت احطلها جرعات قليله فى الاكل او العصير بتاعها وفعلا بدأ جنانها يطلع تانى وعلى طول عندها ارق ولو نامت تقوم مفزوعه .. زودت الجرعات على مراحل وبدأت اخليها تصدق الهلاوس اللى بتشوفها وان معتز عاوز يقتلها زى ماقتلته ...
كانت خست خالص ومع قله النوم والهلاوس والاحساس بالذنب كل ده خلاها عاوزه تنتحر تانى ..
فضلت منتظره بفارغ الصبر انها تنتحر تانى والمرادى مش حخلى حد يلحقها بس للاسف كانت بتفكر فى الموضوع كتير بس من غير تنفيذ ..
لحد ماجه اليوم ده ..
انى صحيت على صوت عالى جاى من اوضتها هى واحمد .. قربت منهم من غير ماحد يحس وسمعت كل حاجه ..
احمد عرف .. اعترفتله بكل حاجه .. كسرت قلبه بعد كل اللى انا عملته ده عشان ميتصدمش ..
بس انا مش حديها فرصه تعيش يوم تانى بعد مادمرت ابنى ..
استنيت اما احمد خرج ودخلتلها الاوضه كانت منهاره من العياط بس انا كنت محضرالها كوبايه ليمون وحطالها جرعه اكبر من كل مره ..
اقنعتها تشربها عشان تهدى وبعد.كده لقيتها مش متوازنه ومش مركزه فاقترحت عليها تروح ورا احمد الشركه وتحاول تهديه .. كانت زى الغرقان اللى بيحاول يتعلق بقشه ومفيش دقايق كانت راكبه العربيه وهى مش شايفه قدامها تقريبا ..
بعديها بساعات احمد كلمنى قالى انها عملت حادثه وساعتها بس ارتاحت .. ارتاحت انى جبت حقى وحق اولادى منها وجهزت كل حاجه استعدادا انى استقبل خبر موتها بس الخبر ده مجاش ..
والنار بدأت تقيد فيا من تانى لما احمد قالى انها بدأت تتحسن.. والنار زادت اكتر وانا شايفاها داخله البيت وهو ساندها ولا كأن حاجه حصلت .. معقول بعد كل ده سامحها ؟
ده السؤال اللى فضلت ايام وليالى اسأله خصوصا وانا بشوفه بيعاملها معامله جافه بس لسه مطلقهاش رغم انه كان ياحبيبى متدمر نفسيا لدرجه انه كره بنته والبيت وكل حاجه ..
وحالتها هى اتحسنت كأنها واحده تانيه .. مفيش اى اثر لهلاوس او ارق او اكتئاب او ميول للانتحار رغم معاملته ليها ..
وعشان كده فكرت انها تموت بطريقه تانيه خالص وهى انى اشوف حد من اللى هى اذتهم ينتقم منها وبعد تفكير ملقتش غير عمر ...)