عفت الباب مفتوح ووگفت يم شجرة الكاربس
معقوله خاف عليه من هاشم لو خاف ع نفسه ؟
هسه اني شبيه لو شايفني اخويه ، يمه يذبحني
رجعت اكمل شغلي وبالي مشغول بصوته ، واسأل نفسي شلون من حجا وَيَا وتين عرفت صوته ، رغم مرة وحده سامعه صوته من ضحك ع وتين وضوجها
هذا گلبي مو اني ،، گلبي اللي ميز الصوت فدوه رحتله
ثاني يوم هم جان باب بيتنا مردود واندگ اني بالطرمه وَيَا امي ننفش بالمخاديد بت جيرانه زغيره دفعته وطبت گالت امي تريد راس بصل وگرصه خبز ، عاد گمت انطيتها امي گالت گومي قفلي الباب
شفت كرار واگف هو وياه ولد صاير مقابيلي والولد داير وجها ، باوعت ع كرار وابتسمت بوجها هو عگد حاجبه ودنگ ، واندار انطاني ضهره
فشلني واستحيت من روحي قفلت الباب وطبيت
هو اكيد هسه صار يعرف بيه عندي شي اتجاها بلكي يبادر ، خلي انتظر منه شي
بقيت ايّام وأسابيع انتظر منه شي بس للأسف ماكو اي شي وبالعكس يمكن صارت عنده فكره عني مو حلوه وصار من يشوفني لو يطب للبيت لو يدير وجها وخاصه الصبح
صار اذا يريد هاشم يدگ ع التليفون عليه ميدگ الباب
اي ليش اني منو حتى يحبني ؟ منو يقبل بيه عبالك كلها الناس تعرف شبيه ، ليش هيج اسوي بنفسي
صرت بحالة ذعر مااتحملها ،، بيومها سألتني وتين شبيج
- وتين انتي كبرتي وتفهميني اذا احجيلج
- اي احجي اني مو زغيره
- وتين اني احب كرار ابن جيرانه الجدد
فتحت عيونها ولطمت ع صدرها عزااا بعينج يذبحج هاشم انتي وياه
- صخونه ، صوتج فضحتينا ،،
- بله صدگ تحجين تحبين هذا لج فد صلف وعينه مرعه ولا ينحب
- ههههههههه عزا بعينج ولج شلون عرفتي
- مبين متشوفي ماخذ الشارع فلاحه ملاجه ، اللي عدهم مريض واللي عدهم بنيان واللي يروح للمدرسه واللي تسوگ هو يشيل مكانها وما مخلي شي وراه
- وبرأيي هالشي حلو
- لا مو حلو ، 24 ساعه يضحك وفاتح حلگة وانتي هادئة وثگيله متتوالمون خلي يولي برره
- لتصيرين سخيفه منعرف شي عنه الولد ليش تحكمين اساسآ إعجاب من طرف واحد وبس ميدري بيه
- لااا ولله عوزج يدري بيج هو ،، حتى هاشم يموتج
- يمعوده خليني احبه هسه قابل شمسويه اني حتى زواجنا مستحيل
- وليش يمه مستحيل شو تحجين متأكده ؟
- ها لا مو متأكده بس ابويه مينطي لناس ميعرفهم وثاني شي اني ماازوج ابد ، غصيت بهاي كلمتي وعفت وتين وطلعت.
