الفكره من حبك شنو ؟ لا بي فرح لا شي حلو
غشيتني بكلمة دفو ، وطلعت أحضانك باردهثاني يوم من جية اهلي ، خابر هاشم وطلب من كرار اروح يمهم يشوفوني بس هاليومين قبل ليرجعون يم بيت عمي
بالبدايه ما قبل بس عمي گاله خلي تروح ، ميصير تمنعها من اَهلها
- ما مانعها بس اخاف عليها
ورود عوجت حلگها ، وأزهار عاكفه وجها مو عاجبها
عاد گال حضري نفسج العصر من اروح للصيدليه اخذج وياي
فرحت بس خايفه بداخلي ، ماادري ليش ، العصر حضرت نفسي وبيه طبع دائمآ اسحب ردن التشيرت ليفوگ رغم الجو بارد
جان الباب مفتوح عافته حوراء من طلعت ، لان اني مكمله تبديل ، شافني كرار من نزل ابتسم
ها هاي هيج فرحانه لان راح ترحين وتعوفيني
ابتسمت ، ليش وين عايفتك ؟
- عايفتني بالضيم
وگف يمي سحب ايدي باسها من معصمها ونزل ردن التشيرت ، والثانيه هم نفس الشي ، لطلعين اديج
- هو اني اكيد قبل لا اطلع أنزلهم ، بعدين شدعوه غرت هُن شحالهن اديه دشوف عبالك گصب يابس
- وتدرين هذا الگصب اليابس يصير منه الشكر
- صدگ ؟
- اي ولله
- لا مو اديه عوفك منهن بس صدگ الشكر من الگصب
- اي ولله ، ذني قصب سكر وهو لازم اديه ضحكت وياه
طلعنا اني وياه لبيت عمي والطريق كله هو يباوعلي واكو ابتسامه ع وجها
وصلني وصا هاشم عليه وأخذ دنيا وراح
جان الوضع غريب عليه اني جايه اشوف اهلي خطار ، ماادري ليش استحيت ، رغم ذوله اهلي وبيت عمي
دللوني واحتارو شيسوون ، ومستغربين خجلي منهم لهالدرجه ، بس اني مو بس خجلانه اذا نجي للصدگ لسه شايله بخاطري عليهم ، بس يبقون اهلي
امي هواي انقهرت عليه ، ليش هيج ضعفانه ، وجهج كله حب ، اكيد مو زينين وياج
- بالعكس زينين ، لا شردوني ولا ذلوني ، ولا ضربوني ، ابنهم عقد عليه وما لمس شعره مني ، لان اني دخيله عدهم ، وها ازيدج من الشعر بيت حلل وضعه وياي حتى لحد يأذيني بشي
- هو ابنهم من زمان كتل نفسه عليج ، مو خطبج مرتين لو نسيتي ،
- انتم اهلي وجنتو تحبوني ليش ما تقبلتو الوضع مثله
- هاي سمعه وشرف وعرف عشاير ، الصار شي جبير حيل ،
بقت تحجيلي كم قصه صايره بعرف العشاير ، والإنسان شگد ميكون زين يم هاي النقطه يختلف كلشي وانتي تعرفين هاشم شنو ميحتاج احجيلج