ياسمين
********
بدت المدرسه ومرحله جديده هالسنه ثالث ،كرار قلبي هالسنه ثاني كليه ،، شما يكبر يحلى
،، امي ووتين سامعين ضحكته بالشارع ويحجون ويضحكون بس ميعرفون عليمن يضحك
اني جنت نايمه ،، بس طبعآ بدافع الفضول سئلته ليش تضحك العصر بالشارع
- وانتي شعليج بابا ، بكلشي حاطه خشمج
- شوكت اداوم
- ع الاحد
- ليش مو بده الدوام هذا الاسبوع
- اي بس ماكو محاضرات هذا الاسبوع ، ع الاحد تبدي
انتظرت الاحد بفارق الصبر حتى اشوفه ،، يدزلي صور بس مو مثل الحقيقه ،، شفته صاير احلى بهواي من قبل
- لازم حلتلك العشره هناك
- اي مدلل ، بنات عمي ابد ممقصرات وياي
- لتخليني اسبهم ولله
عفته ودرت وجهي اروح للمدرسه ليطلع هاشم
بس اسمعه حجا وراي حتى ابو جدج اسلگه
علاقتنا حلوه وشي فوگ الخيال ، مراهقين او اني مراهقه وهو شاب بس هواي منسجمين
العباره اللي دوم يرددها انتي احلى بنيه ،، واني اكوله لا احنه احلى اثنين
اعرفه صاحب غيره وطول فترة علاقتنا اللي صار سنتين وبدايه ندخل سنه ثالثه احنه ع علاقه وادري بي متعلق بيه
اللي اعرفه ابوه يريده ياخذ بت عمه وأمه تريده ياخذ بت خالته هو حاجيلي هالشي ، واساسآ اني مااگدر ادخل الحرب وياه لان هم مااگدر ارتبط بي
بس مااعرف شنو الصار وهيج سوه
اول شهرين بالدوام صادف محرم وصفر ،، وعاداتنا العراقيه الحلوه بهاي الشهرين ،،
من خلصو الشهرين بدت الأعراس ع الأبواب يوميه نسمع زفة فلان
ومن ضمن هاي الشباب ابن عمتي تزوج ، طبعآ رحنا بالعرس ومن سمع بيه كرار رايحه وبدون مااگوله مات من قهره وصار عصبي
هسه انت ليش تصيح تره مالك سلطه عليه بصفتك شنو تحاسبني
- ها اي صحيح حقج مالي عليج سلطه
من يضوج يصير كلشي بينا مو حلو عبالك تختفي كل ملامح حبنا صالحته بس ما عبالي هيج راح يسوي بيه
تفاجأت وره ما رجعنا لبيتنا وثاني يوم صادف احد داومنا بس ما شفته
من رجعت من الدوام امي مبين عليها شي نوع من الفرحه
- ها يمه شو فرحانه لازم ابويه جايبلج شي جديد
- لا ولج ،، اكو غير شغله مفرحتني
- شنو يمه حبابه
- مو هسه ، خلي احجي وَيَا أبوكم وبعدين احجيلكم
