عيونك هي وطن التجأ اليه من تعب الحياة
كرار
******
تمنيتها تطلب روحي ولا هذا الطلب ،، هاشم يمي شگله وين عايفك ورايح
واني اريد اروح لأخته
هاشم تگدر تبقى بمكاني هسه اجيك فد نص ساعه ،،
- ماشي بس مو تتأخر مااعرف الأسعار
- لتبيع
طلعت من يمه واني متخبل ، ليش تخليني بهالموقف ليش من گد ما بالي مشغول ومتردد اروح لو لا
شنو تخبلت تطلب مني اروح لبيتهم ،، وشلون بهاشم
واني بعدني گدام الأسواق مال عمي اريد أعبر الشارع حتى اجيب الدراجه حسيت انضربت قوي وگعت ع الشارع
ما تأذيت هواي بس ايدي صارت حيل توجعني
دراجة ضربتني ع الشارع وايدي صار عندي بيها رضوض
عزلت الأسواق وگتله يلا هاشم نروح للبيت
اجينه بسيارته عفت الدراجه بس سويجها عندي ، الطريق كله اني عيوني صارت دم من القهر وهاشم يحاول يعرف شعندي
معقوله اني هيج نذل ، زين هي شلون تخليني بهالموقف
هاي حوبة هاشم ،، الله لطف ما رحت جان ما سامحت نفسي ابد
من وصلت للبيت سبحت وشديت ايدي ردت انام بس مااكدر شويه ودزتلي
الحمدالله ع سلامتك سوده بوجهي خوما تأذيت ، كله بسببي مو
عرفت هاشم كايللهم
شلون تخليني بهيج موقف ، لا اگدر اعوفج ولا اگدر اجيج تخبلت ضيعت طريقي
- اسفه حبيبي الله ياخذني ان شاءالله لو صاير بيك شي ، ؟ اموت نفسي ، ايدك شلونها
- الصبح اروح للدكتور ليضل بالج
الصبح امي دگت مناحه من شافت ايدي مااكدر احركها وياسه الليل كله ما خلتني انام كل شويه وسألت شلون صرت
طلعت روحي من الالم والضوجه فول عندي
رحت للمستشفى جبسو ايدي وأنطوني علاج كال اسبوع وافتحه لان هي رض مو كسر
بيومها خابرتني من اجت من المدرسه اني الضوجه عندي تقره الف
- ياسمين من الأخير شگد عمرج
- 16
- لعد شنو زغيره ، اگلج خاف لان بالثاني عبالج انتي بعمرهم تره جماعتج اعداديه بس انتي راسبه اذكرج خاف ناسيه
- شنو هالحجي كرار
- ياسه خلي نزوج مو طلعت روحي ولله تدرين شجاي يصير بيه لو لا
- كل عقلك انت ؟ هسه اني بيا حال وانت تريد تزوج ، تفكر بنفسك وبس
- بلا حجي فارغ تتندمين عليه ، مقدر وضعج والضرف اللي انتي بي بس ياسه هاي المشكله اذا انحلت ان شاءالله اني أتقدملج بعد مااكدر اعيش عذاب ضمير اكثر من هذا وشلعان گلب
