هو انت ابن وادم غرب
بس اني احسك مالتي
بقيت اشتغل بواهس ،، من بدت علاقتنا لسه ما مطرقين لموضوع الهديه
تحمست حيل اعرف شجايبلي واتوقع ساعه ، ومرات اكول مداليا
قبل العشا دزلي اصعدي خليت الهديه ع سطحكم واني نزلت
هاشم بعده مجاي معقوله هو رجع ،، صعدت جبت العلاگة لفيتها بملابس هاشم سويت نفسي عود جايبه ملابس من غرفة هاشم امي لاگتني گالت عوفيهن اني اغسلهن
ذبيتهم بالغساله هُن والعلاگة
امي طبت للحمام تفتح المي اخذت العلاكة وانهزمت للغرفه
حسيت امي راح تلگفني اجت وراي شنو اخذتي وركضتي
- مااخذت شي
- انجبي شفتج ، ولج احسج مو طبيعيه ولله احجي شعندج
- يوم ماعندي شي وداعة عيونج ، قابل شكو
- راح اروح المي مفتوح بس مو عبالج ما منتبهتلج صايره مثل الناعور تفترين من الغرفه والسطح وتليفونج بيدج
الي گعدة وياج اني الج
راحت امي ركضت ضميت العلاكة بالكنتور حتى ما شفت شكو بيها
كعدت فرمتت تليفوني ودزيت رساله لكرار لتراسل الا اني اراسلك
امي صعبه حيل ومو من نوع تستر علينا اذا سوينا غلط ، بالعكس تحط الموقف كدام ابويه وهو هم كلش قاسي اذا غلطنا
وصيت وتين متحجي شي لأمي ، لان اعرفها وفعلآ هذا الصار امي اختصت بوتين گعده بالهول وحدهن قبل لتحجي وياي وبعدين اجتني للغرفه
اي ست ياسمين احجيلي شعندج ؟ شو احسج مو طبيعيه وها لتگولين ماعندي شي
عبالج عبرة عليه ذاك اليوم انتي ضاله لا اكل ولا شرب لمن تخربطتي ، منو محاجيج ، شصاير وياج
- ماكو شي ماما
- شوفي اذا عندج علاقه وهاي سوالف الحب احجيلي خلي اني املخج واموتج قبل ابوج واخوج
- شنو قصتج ماما ، ويني وين العلاقه هو اني خلي احجي مثل البنات حتى اسوي علاقه
- لااااا كسرتي خاطري السانج اطول من الزرافة ، ولج اعرفج كلش زين سمج بگلبج كلشي تعرفين بس مسمومه مثل عماتج
- ههه ماعندي شي واسألي وتين نروح ونرجع سوه وهذا تليفوني اذا تردين خلي يمج
- بس وتين گالت غير هذا الحجي
سحبت بوش طن هوى من الخوف گتلها شتحجي ولله اشگ حلگها
- وليش تشگين حلگها لان حجت الحقيقه
- شبيج ماما يا حقيقه قابل شعندي
- يلا مصيرها طبختج تفوح ريحتها ،، وعود ارفضي قسمه ثانيه تجيج مثل سيف ونشوف
