كرار
*******
رجعت وحدي بعد ما وصلتهن ، وطالعه روحي الطريق فارغ
سمعتو شتريد ؟
تريد اخطبها ،
دگت عليه بالليل تبجي ، ارجع وياي كرار ولله امي تضغط عليه
- واني گتلج وافقي ، لو تبقين بس انتي بالدنيا مااريدج بعد ولا ارجعلج
تحسرت بدموعها اخذت روحي وياها ،، الله يسعدك بحياتك ويقسملك بنت الحلال اللي تسعدك
- مشكوره ما قصرتي
سديته منها واني أودع بروحي ،
فكرة بس هذا الليل وباجر تصير لغيري ، فزعتني ، اختنگت
متقبِّل ، اي اكيد متقبِّل
واذا قبلت ؟
وصلت للبيت قدرة الهيه ، الطريق كله اني افكر ومااعرف شلون وصلت
بقيت گاعد بالسياره .،،، گلبي وَيَا دموعها اللي ما نشفت اليوم كله
اي تستاهل ،
لا هاي حبيبتك ونور عيونك ، ولا يوم نسيتها ،، افكار متناقضه تاكل بروحي اكل گلبي يريد شي وعقلي يرفضه
فتحت أغنية صلاح حسن وبقيت گاعد بالسياره
هاي شبيك ياگلبي اشو ما ترضا تنساهم
هم هواي اذوني انت وياي وياهم
بعد يا گلبي روحلهم بين حالي ميهمك
وبكيفك اذا متروح هاي انت بقت يمك
عشرتك هاي تاليها
ولو مو حقي احجيها
بعد ما بيه طاقة اتحمل شي منها ،، مستحيل عندي طاقه اتحمل اشوفها تروح لغيري ،،
بقيت گاعد للفجر بالسياره رجعت الكشن ومددت بس تكسرت
من سمعت الأذان استغفرت وقفلت السياره دخلت للبيت سبحت وصليت ونمت
مستحيل أكون تحصيل حاصل بحياة اي شخص ، كائن من يكون
ليش رفضتني قبل ؟ وليش هسه راجعه ،
ثاني يوم شفت هوسه يمهم توقعت خطوبه وهالشي أكده هاشم ، گال ابن خالتي خطب من يمنا
واليوم العصر يعقدون
تعرفون شصار بيه!؟ ، اي اكيد
انصهرت والعرگ اخذني ، جسمي ثگل عليه ، عيوني اكو بيهم جمر يحرگني
حاولت أكون طبيعي گدام هاشم ، ونقذني ولد صديقنا من الاعداديه وگف سلم وحجا ويانا ، بس اني فاصل ، بعيد عن محور نقاشهم
استغليت فرصه التليفون دگ اعتذرت منهم ورجعت للبيت ، بحجة يمنا خطار
هو صح جان اكو خطار ، بس اني ما شفته ولا عرفت منو ،،لأول مرة عندي رغبه أكون بمكان وحدي وخالي من البشر ،
