انصدمت صدمة عمري من شفتها ، بالبدايه شبهت عليها بس بعدين عرفتها ، الزمن ماخذ منها هواي
عرفتها اي طبعآ اعرفها هاي مرة عمي وام رشيد ابن عمي اللي بسببه اني عايشه بجحيم
گلبي وگع بين رجليه وكرار گاعد قريب مني گاعد هو وليث
حجا الولد اسمه قيصر ،، عمتي اخت ابويه وعايشه عدنا من اربع اسنين
يقدمها لعيالي حتى يعرفوها
عمي حاتم حجا - اي هاي مرة المرحوم ابو رشيد وام المرحوم رشيد
كرار باوع عليه وعيونه كلها غضب شايطه ،
احجي عمه
أهل الخير اني أختكم ودايسه بساطكم ، صوتها متغير گوة تحجي ، اريد الأمان حتى احجي
ردها عمي ابو غسان
- انتي حرمه ومو من عادتنا نعادي حرمه ، الج الأمان يابه نسمعج
فتحت القطعه البيضه بيدها طلعت الكتاب وحطت ايدها تحلف كرار دار وجها گال استغفر الله وكلهم گالو استغفر الله بس هي ما وگفت
اقسم بهذا كتاب الله كل حرف احجي هو الحقيقه اللي شهدتها بنفسي
من ايّام يلا سمعت عم رشيد ابو هاشم مسافر خارج العراق ، وسمعت السبب اللي خلاه ياخذ عائلته ويطلع
وسمعت باللي صاير وَيَا بنته وگالو هي دخيله يم ناس أهل حموله حموها وسترو عليها
ابوها قبل طعن بيه وبغلط مني ، وابني رشيد هو اللي كسر بختها بأمر مني
كلها ضجت بوجها وهي تبجي واني ابجي ،
كملي
ابو كريم بنت اخوك طفله ، واني دزيت ابني وهو سكران حتى ياخذ شرفها ،، حتى في يوم من الايام يگلون لأبوها بتك مو شريفه مثل ماهو خابر اخوتي ويگل لأبني أمك مو شريفه
اني جنت بالطرمه اراقب الوضع لأبني ، وادري محد بالبيت من اجينا
اني الوحيده اللي سمعت صرخاتها بنص هوسة الطلق والعرك البره اللي صار بالصدفه
انقتل ابني بنفس الساعه ، وگدام عيني
بقت تبجي ،، اني صار عندي مرض خبيث وگصو رجلي ، وحوبة هاي البنيه لسه وياي ما تخليني ارتاح حتى واني ع فراش الموت
اريد تسامحيني
بركان غضب وآلم بداخلي ، انفجر بلحضه غضب ، الله ليسااااامحج
الله ياخذج وره ابنج ولا يغفرلكم
ضيعتوني وضيعتو كلشي حلو بحياتي ،، شرفي وسمعتي واهلي ومستقبلي وحتى الانسان الاحبه هم ضاع وياي
بقيت اردد الله ليسامحج ، الله ليسامحج كرار وليث وگفو يمي ، ليث لمني بحضنه حتى يطلعني لان كرار صاح بيه صوووووتج
