تعشينا يمهم بس منگدر ناكل من الخجل رغم الباب مسدود علينا ويانا جيرانه وأمه بس
من كملنا وطلعنا نغسل كرار جان يطلع صواني وگف وامي طخت بضهره بدون قصد هو دار عليها
- العفو ابني ماانتبهت ولله
- عادي خاله صدگ جذب فدوه الج
تعرفت ع حوراء ما مبينه اجتماعيه واصلآ عدها العكس حتى امي ما حبتها اني اكبر منها بالعمر رايحه رابع إعدادي مو مثلي ابقى نايمه بصفي ،، بس تتعامل بطريقه اكبر من عمرها
من طلعنا نريد نرجع لبيتنا امه تشكرت من امي ع فرحتها وياها رجعت باركت لهاشم مرة ثانيه
يم باب المطبخ شفت ولد اثنين بالطرمه بقو يباوعون علينا بس عرفتهم ذوله شايفه صورهم عد هاشم واصلآ مرات يجونه للبيت بس العجيب بالموضوع بقت عيونهم علينا الا ان طلعنا وجان ليث وغسان وياهم
بعد يومين تفاجأنه بخطار العصر أهل ولد صديق هاشم هو نفسه اللي شفته يم أهل كرار اسمه سيف وجايين يخطبون
والمشكله الأعظم ابويه موافق وامي موافقه
- بس اني مموافقه
- ليش شبي خوش ولد ومؤدب واجاج من الباب ، اهلي ماعدهم مشكله تزوج البنيه وهي زغيره
هاشم گال لتجبرونها مدام مموافقه بس امي بقت تلح تقريبآ اسبوع كامل هي تتوسل واني قافله بس ابد ما جبت سيرة لكرار ع الموضوع
هو خابرني وعصبي مااعرف منين سامع ، صحيح هذا الحجي السمعته
- يا حجي
- سيف خاطبج
- اي ورفضت وين المشكله ليش عصبي
- ها واني اخر من يعلم ، وين شايفج سيف ،؟
- يمكم من اجيت لبيتكم
- لتخليني اكفر وين يمنا
- شبيك كرار من طلعنا لبيتنا صادفنه هو بالطرمه وإخوتك وياه وبعد وياه ولد مااعرفه بس هم صديقكم
- جاوبيني من الأخير ، سيف يعرفج قبل ، اكو بينكم شي
تفاجأت كلام كرار يطعن بيه لو شنو
- لا مااعرفه
- لتجذبين
صرت عصبيه صدگ ، شنو اجذب دا اگولك مااعرفه شبيك كرار تخبلت
- لج بت .... استغفر الله ،، يلا ولي لا اجرم بيج
سد التليفون بوجهي ، هسه هذا كل عقله يعني ،، بقيت صافنه لا اخذ ولا انطي
بس احساس الشك بشع ، هو شك بيه لو لا مااعرف
زين هذا اذا عرف البيه شيگول ؟ حتى اليخطب يسأل خاف عندي علاقه وياه
لهاني عن الزعل منه ابن عمي كريم اللي عارض هذا الزواج ،، خفت ليكون هو يريدني
