ضَل بالي عليك من الزعل ذاك
لا راضيتني ولا اعرف شبيك*********
بقى كرار صافن ومستغرب ردة فعلي ،
لتبجين كافي لتكفريني ، اگعدي فهميني شبيج ؟
- عوفني مااحبك ، مااريدك هي گوة
- شتخربطين انتي ، لج بابا صار سنين ننتظر هذا اليوم وهسه جايه تگليلي مااحبك مااريدك
- افهمني ولله مااريدك ، لتتقرب مني اكره حتى عطرك ، اريد انام جوه يم حوراء
هالكلمه حيل استفزته ، بقى يحجي ويغلط ، ويسب ، شلون حظ خيسه من دون الناس ، لا اني اول واحد يحب بالدنيا ، ولا اني اول اللي يتزوجون ، بس حظي دوم عاثر ، حتى اسعد لحضات حياتي طفيتيها ، انعل اليوم الأجيت بي لهنا وشفتج
شوفي لج ، يا تجرين عدل ، يا اندمج ولله ، كافي گلبي وجعني منج هواي ، مو كل حياتي تخلص صبر
- طلگني ، اني مااريدك
- فد قوندرا انتي ومترديني ،
اسمعي زين طلاگ ما اطلگ ، واذا بقيتي هيج بدون مااعرف شبيج ولله اذلج واطلع صبري وتعب عمري بيج ،اخذ ملابس سبح ورجع عاگد حاجبه ، شمر مخده بالگاع ونام حتى بدون فراش
بقيت ابجي لحد الساعه ب4 الفجر هو گعد يصلي شافني گاعده ، انطعن اكثر ، راح صلى ورجع گعد يمي ،
حبيبي احجي شعندج فهميني ، لا اريد تتأذين ، ولا تخليني اتعذب ، ولله حاس عندج شي ، تعبان ، لتعبيني اكثر
- ماعندي شي ،
- ليش وضعج هيج ، گومي اسبحي ونامي ، گمت شلت فراش الجربايه هو حط غيره ومدد ع الجربايه
رحت سبحت ورجعت هو طفى السبلت ،
بقت عيونه عليه لحد ما مشطت حسيت بي وگف وراي ، دنگ شم رگبتي من وره ، كشيت هو استغفر بنفاذ صبر ورجع مدد بمكانه وهو يلعن بيه
اني كملت ورجعت نمت بطرف الجربايه ، ما حجا شغل السبلت ودار وجها نام
اذكرت ما مصليه , عاد گمت صليت بالصلاه حيل اختنگت عبالك طابوگة ع صدري
كملت وتمددت هلكت من التفكير واللي يصير بيه ونمت ، تجيني كوابيس مزعجه بس مو هواي وعادي أبقى نايمه
گعدت ع صوت بالغرفه خفيف باوعت كرار يبدل ، بس جان يتحرك خفيف حتى لا أفز ، من شافني ابتسم ، اني صبحت عليه
ضحكت عيونه- لشوكت تبقين شالعه گلبي
باوعت الساعه ب10 ، اريد ابدل
- يلا بس استعجلي ، لان اهلج جوه
نزل هو قبلي ، بدلت ونزلت ، بالبيت جوه عادي وأتعامل وياهم طبيعي ماعندي شي تجاه اي احد
فرحت بجية اهلي ، بابا جابلي گلاده ذهب وهاشم جابلي سوار