كرار
********
صح ترددت بالبدايه افتح الموضوع وَيَا ابويه ، لان غسان بعده ما متزوج وهو اكبر مني
بس گلت مااريد ابقى هيج گلبي معلعل ، يوميه زعل ومشاكل ، نتزوج احسن
بيوم جمعه جان والدي بالبيت فتحت وَيَا الموضوع ،، وفعلآ مثل ما توقعت بالضبط
- يابه اريد احجي وياك بموضوع
- اي بابا گول
- والكلام لغسان هم ، اخويه وأكبر مني ،، اني اريد ازوج
- اي بيها خير ، منو هاي سعيدة الحظ ،، هذا كلام غسان
ما رديت عليه لان كلامه بي لكنة استهزاء
ابويه رد ، ياخذ من بنات عمه
- يابه بنات عمي ع عيني وراسي ، بس اني اعرف بنيه وأحبها وتحبني صار سنه وأشهر تقريبآ راح يصير سنتين
- وانت شوكت لحگت تفوت للكليه حتى تحب
- غسان ، البنيه مو من الكليه
- لعد
- مو مهم منو ، المهم اني مااخذ من بنات عمي وهذا قراري قطعي
- ولله اني هم كلامي قطعي ، عندك عمام هواي ،، وعدهم هواي بنات اختار اللي تعجبك
- يابه اگلك اكو بنيه احبها وتحبني ، يعني ماكو غيرها تعجبني
- روح اخطبها وحدك اني مااخطبلك
- استغفر الله ،، يابه هذا زواج وميصير بالأجبار
- ولله هذا الموجود ، بعدك زغير ، وينك وين الحب ، تگدر تحب وتعيش وَيَا زوجتك
- مدام بنظرك مااگدر احب ، مااگدر ازوج
- بكيفك ، بس خلي ابالك الا اني جوة التراب يلا اطبب جنة غريبه لبيتي
- اسم الله ع عمرك يابه ، يلا مو لازم زواج هسه
بعد ماانفتح هذا الموضوع صرت اشوف غسان يحاول بأي طريقه يقترب مني
بطريقه عمره ممسويها
هو صار يضوج مني ، لان صيدله واشتغل الله وفقني وعندي سياره وحبيبه احبها وتحبني ومفكر ارتبط واستقر
ليث يحبني بس هو لا ابد
مرتين من ادخل للحمام اسبح قبل لا اروح للصيدليه اشوفه يلعب بتليفوني
ورمز تليفوني محد يعرفه بس حوراء اختي ، وهم ابد ماانطي الها لان بي كل خصوصياتي وَيَا ياسه
بس كل صورها مخليها برام وضامه ، اي صوره ادزها اذا عجبتني انقلها للرام واضمها
تليفوني هذا هو نفسه القديم ماانطي لأي احد كائن من يكن حتى رقمه خليته خاص بس الها
واشتريت تليفون وخط جديد
