ياسمين
*******
كرار لازم يشوف حياته ، اني رفضته،، بس حتى لا اجرحه گتله بيت عمي رفضو
رغم عمي وابن عمي وافقو عليه وعمي من رفضت گال لهاشم گوله اذا يريد من بناتي أتشرف ، بهالعباره
تخبلت
اخنگ نفسي بالمخده وابجي بجي مصاير ،، هذا حبيبي وتعب سنيني اني ، شلون ياخذ من بناتك
هاشم يخجل من هالموضوع ورفض اقتراح عمي
اني أريده ، ولله أريده ، احد بيكم يفهمني ،، يا ريت لو اگدر احجي البيه اله هو ويفهمني ويحتويني
لا انتم ولا بناتكم
اموت الف موته من اسمع صوته وحبه وشگد مشتاقلي ، يعاتبني ع تقصيري وياه
حظي عاثر ، ليش ما قتلت نفسي بوكت الحادث اللي صار ، الحقير مات بيومه وبقذارته ، واني بقيت لهذا اليوم
لو ادري هيج يصير وياي جان اني موتت نفسي ،،
لحد الان واني ضايعه مجنونه من السر اللي ضامته وما متحملته
قررت ابتعد نهائي عن كرار وخلي يشوف حياته خاصه بعد ما وعدني يتقدملي من يخلص الكورس الثاني
- بكل حقاره وانانيه گتله لتعب نفسك بس ولا مرة تجرأت اگله شوف حياتك بعيد عني ، بقيت اتعامل بأنانيه مااريد اخسره ولا اريد يتقرب اكثر ، ادري كلامي يسمم عافيته ، بس شنو بيدي ؟ يگدر يتحمل حقيقتي؟ ،. اني اعرفها حقيقه بس اذا سمعها بنظره اني اكبر جذابه وخاينه
- مفهمت ؟ شنو لتعب نفسك ، ليش تتوقعين اكو حياة بدونج ؟
- اي اتوقع ، كلشي اتوقع بهاي الدنيا ، يمكن احنه مو لبعض ، فدوه عوف هذا الموضوع
- مو بكيفج ، وراح اعتبر نفسي ما سمعت كلامج هذا
- كرار عوفني ،، احجي وابجي
- ياسمين ورب الكعبه راح تخبليني ، بمكان متگوليلي اوگف بوجه الدنيا حتى أصير الك ، تكولين عوفني ؟
- ما راهمه
- شنووو الما راهم ها ، شنو الما. راهم
يحجي بعصبيه واتوقع عصبيته فاقت الحد نطق بنبره هادئة ، لج لسه ولا شي شفناه وانتي تخليتي ، لسه ما شفنا شي صعب
- انت ما شفت ، بس اني شفت
- احجيلي ، اريد اشوف شنو الصعب الشفتي ، ولله اذبه جوة رجليج
- الصعب انت
اعترف بحقارتي اللي تجاوزت عصبيت كرار البارده
قصدج تذليني ياسمين ؟
- لا ما عاش اللي يذلك انت عيوني اللي اشوف طريقي بيها
- لتخليني اكفرررر ، انتي اكبر حقيره ، لج بس فهميني شسويلج ، احجي شسويلج
- عوفني كرار عوفني
صرخت وانتبهت ع نفسي نصيت صوتي ، عوفني مااريدك
