عن يا جرح روحي ما حجتلك
عمت عيني ع عيني شگد بجتلك
🥀🥀🥀🥀
من طلع عبالي راح يحاجيهن ، يتعارك وياهن ، شو هذا صعد سبح ونزل يتعشا ولا كأنو
رحت يمه ، مو بعدهن گاعدات ليش ما حاجيتهم
- روحي نامي ياسمين حتى باجر تگعدين من الصبح
- هو طبعآ اگعد من الصبح أمك متقبِّل نوم الضهاري
بخزره سريعه گال مدام امي متقبِّل نوم الضهاري اني مااحب سهر الليل
- انت شنو بعدك ضايج مني ،، ما يحجي موتني بروده
اگلك تره انت طوختها ،، جان يريد يحط اللگمه بحلگه من گتله هيج ذبها بالصينيه
شتردين
- ليش ضايج مني
- مو تعرفين ليش بعد شكو تسألين
- مو گتلك اسفه
- افتهمنا گلتي اسفه وگتلج هاي هيه بعد شتردين
- بس بعدك ضايج مني
من شفته رجع ياكل وساكت بكل برود گلت اهووو اني هم صوجي
هو خزرني ، بقيت بمكاني ما تحركت ، شفته انطعن كلش ضاج ، عرفت روحي جفصت عاد گعدت أبرر وأتوسل اسفه وبعد مااعيدها ولله
ولله هاليومين ماادري شبيه صايره مغثه
- لا مو هاليومين ، بس شفتي انطيتج مجال گلتي خلي اصعد ع رگبته وادندل رجليه
انهضمت ، لا ولله مو هيج ،
سكتني ، گومي شيلي الصينيه وجيبيلي جاي
صفنت بوجها هو جر تليفونه يباوع بيه ، ومدد رجليه ومرتاج ع التخم
رحت غسلت المواعين وصبيت جاي ، هو ع گعدته انطيته اله وهو مدنگ گال شغلي التدفئة وسدي الباب
سويتهن واجيت گعدت يمه بست كتفه ، اسفه حبيبي
دار وجها عليه صرنا وجه بوجه ، نظرات عيونه الهادئة ورموشه حلوات خلتني ارتبك
احس وجهي جمر ، نزلت عيوني وطلعت لساني بللت شفتي ، ارتبكت حيل من نظراته حتى هو ابتسم من شافني هيج ،
حطيت ايدي ع التخم ردت اگوم لزمني من ايدي ، وين ؟ بعدني ما سامحتج
- اسفه كرار ، صدگني بعد مااعيدها ، خليت وطلعت بس الارتباك عندي فول
لگيت حوراء ورود نايمات عاد اني هم جبرت نفسي نمت
والصبح گعدت من وكت بدلت وجهزت نفسي ، لان اعرف كرار مضبوط بمواعيده نزل سابح وكاشخ وعطرا سابقه
رشا وازهار محضرين الريوگ بس هو ما قبل ياكل ، طلعنا للطرمه ورجعت مستعجله للبيت اخذت علاجه وعدنا فطائر بالثلاجه وصبيت كلاص جاي وطلعت هو يدگ هورن
