إذا سألوك وين تعيش
دليهم ع عيوني
كرار
******
ابويه تغير وياي خاصه بعد ما طلعت معدل عالي ،، مو ذاك التغيير بس صار يشوفني كبرت
وبعد ماعنده حجه حتى شغل اشتغل واصرف ع البيت ومااقارن الوضع وَيَا خواني لان تعبت من هالشي المفروض هو يقارن مو اني
رحنا اني وهاشم اشترينا ملابس للدوام ،،،
جامعته قريبه ع جامعتي فأتفقنه يوم بسيارته ويوم بسيارتي نروح للدوام
هو رفيق دربي رغم صداقتنا صار سنه وحده عليها بس هو شخص نادرآ تلگا مثله
تخطر ع بالي لحضه يعرف بيها،، اني عندي علاقه وَيَا اخته شراح يسوي ؟
كله منها اگلها خلي نتزوج متقبِّل ،،
مر الاسبوع وبدت رحلة الدوام المتعبه ،، واختصاص صعب ومرحلة اولى الأجواء غريبه ، مااعرف ولا شخص هناك بس طبعي اجتماعي وتعرفت ع شباب وبنيه حبابه من شعبتي واول يوم جان كلش عادي
اول اسبوع بالدوام اني مااحجي وَيَا ياسه ما متوقع هي هيج تغار الهالدرجه
من تصالحنه
زرفت راسي هم اكو بنات حلوات ؟ هم تحجي وياهن ؟ هم يشاقون وياك ؟
اكيد انت شاطر وراح البنات يتلزگن بيك بحجة الدراسه
- ليش متگولين شاطر وحلو هم
- اموتك ،، ولله شيخلصك مني اذا سمعت بيك تشاقه وياهن
- ومنين تسمعين
- اسمع قابل شنو اسرار الاتحاد السوفيتي وطلعت
- هههههههههه لج اني ابو حيدر الاتحاد السوفيتي شنو ،
- خلي نشوف
- لازم خايف منج اني
- كررررارر.
- عيونه
- بنات وشقه وياهم ماكو وانتهى الموضوع
يمكن بالبدايه اقتنعت بكلامها وگلت خطيه ،، بس العلاقات بالجامعه تقريبآ تنفرض عليك ،، البنيه وياك بالشعبه مجبور تسلم عليها ومجبور تساعدها
الصراحه هواي تجمعني مواقف وَيَا زميلاتي ، واطلع وياهم ماعندي شي وياهم بس مااحجي لياسه لان اعرفها مخبله ، من دون حجي يوميه تسأل وتحلفني
الله عليك هم اكو بنات يباوعون عليك
اضحك هسه هاي شگللها ،يابه قابل شعدهم وياي اني الج وحدج حتى امي متنازله الج
مرات تعبرها وتضحك وياي ومرات لا تزعل ومبين ماعندك شي وياهن ، تضحك من اسألك
- اذا هيج دمج محروگ ، خلي اخطبج ونتزوج ، بعد أصير رجال مزوج ميدنون يمي
- مو هسه كرار
- لعد اسكتي ، مو تحاسبين ع كلشي
ياسمين
*******
من كرار داوم بالكليه صرت احسد شكو بنيه بالكليه عبالك كلهن وياه يداومن
