ضوگ روحك حتى تعذرني من اغار
ياسمين
هاشم صار صديق كرار وصارت بينهم تليفونات وطلعة ومرات كرار يجينا للبيت
بكل مرة اشوفه اتعلق بي اكثر ، بكل مرة أنسى نفسي وابقى بس افكر بي
صرت احسه شي مسيطر عليه ، رغم هو ما بادلني بشي ابد غير نضرات عابره وبالصدفة وهسه صار صديق هاشم حتى النظرات بعد ماكو
وحتى مالي واهس ادرس ،، اجت ابالي فكرة خلي انصب فيس وبأسم مستعار واحجي وياه
لو اخذ رقمه من تليفون هاشم واخابره
خلي اجرب فكرة الفيس واذا ما رهمت اخذ الرقم
نصبت الفيس ودورت عليه بالأصدقاء وَيَا هاشم عرفته مخلي صورته كرار ..واسم عشيرته گلبت بصفحته مابيها هواي صور اله بس اثنين
دزيتله طلب بس ماكو
العصر كلش التليفون كدامي واني اقره لزمت التليفون اشوف الساعه ب5 شفته موافق ردت احاجي سمعت امي تصيح عليه
- ها يمه ها اجيت
- وينج تعاي لمي ملابس ابوج ع الحبل نزل المغرب والدنيا مغيمه
لميت الملابس ولازم اكوي عاد خليتها لليل يلا راسلته من خلصت كلشي وتأكدت امي مراح تصيحلي بعد
من لزمته ضليت متردده أراسل لو لا ، اول مره اسويها احس روحي مسويه جريمه والخوف مسيطر عليه
- يلا قابل هو شمدري اني منو واذا سأل ع اسمي اكوله اسمي نور
وبيتنا بالاعظميه
دزيت هلو
وبقيت منتظره لل 1 وهو ما جاوب ، اشوفه فاتح بس ميرد ولا شافها
ثاني يوم الصبح من گعدت للدوام شفته مراسلني ب3 بالليل كاتب
- هلو
منو ؟
خفت ارد ،،سجلت خروج ولغيت الحساب ومسحته وقفلت التليفون من الخوف ، عبالك عرفني من يمي خجلت
بعد هالشي حاولت امنع نفسي من الغلط وگوة گوة اسحب نفسي من الخوف وكل شويه تجي ابالي فكره جديده احاجي بيها بس الخجل مسيطر عليه اني خجوله وخوافه بنفس الوكت
بيومها داومت ومن رجعت استلمتنا امي تنظيف ، الضهر ب3 اخذت الزوليه اشرها ع السطح هاي المهمه دوم عليه الزوالي وشر الزوالي براسي
**************
كرار
رجعت من الدوام تعبان لگيت حوراء تبجي
شبيج ؟
- غسان يزمخ عليه
- ليش يزمخ عليج
- ع الغده
- ميخالف اخوج وأكبر منج ،، رحت بوجهي لغسان حاجيته بأدب بعد لتصيح عليها خطيه كبرت
