جانو كلهم گاعدين بالصاله وگف بوجهي غسان ، وين تردين- اريد اروح وَيَا اهلي ، الله عليك خليني اروح ،
- ولج بابا يموتوج
- ميخالف ، خلي يموتوني ،امه گامت بوجهي ويدفعوني ارجع واني مفرفحه روحي ، بس اشوفهم ولو اخر مرة
دخل كرار وجها بي الف كلمه عتب والقهر مبين بعيونه ، كلش يحب اهلي
راحو مو ؟
ما رد بس خزرني خزره كأنو يلومني ع كل هذا ، خزرته گعدتني بالگاع ، ابجي بكل حرگتي مثل الطفل والغصه بعدها بگلبي
گومتني حوراء دخلت جوة للغرفه واجتني أزهار ، شبيج تخبلتي ،؟
وين يا أهل تحجين عنهم ؟ لج اهلج تبرو منج وللأبد ، وبس يشوفوج يكتلوج
- هزيت راسي لا ابويه ميسويها ،
- شوفي انتي مريضه بالگعده اللي صارت ع مود ليث ، وع دوسة البيت حگينا اهلج بيها ، وفصل بس هم بالمقابل رادوج
ابو غسان طلب الج الأمان ، ومحد انطاه ، عرفهم يقتلوج
فگالهم البنيه تبقى بحمايتي ، زوجج هاليومين يطلگ ، وبعدها تلزمين عده لان الرجال داخل عليج ،،
- بس اني اريد اهلي ، خلي يقتلوني ميخالف ،
- لا عيب علينا ننطيج للموت ، گدام العشاير
اني غريبه وعيشتي بينكم صعبه ، شتحجون ؟ لو اموت ما ابقى هنا
الظاهر الكلام واصل لبو غسان ، لان وره يومين فعلآ اجت ورقة طلاگي وهو عرض عليه يا اما تبقين هنا معززه مكرمه ، لو تردين تگعدين ابيت اخويه ابو رشا ماعنده احد بس مرته وبنته بالبيت
اروح هناك ، يمكن اهون من هنا ،، بكيفك عمو
- دام بكيفي تبقين هنا وهاي گدامج الولد أحذرهم من طبت البيت ع راحتهم ، الا ان تكملين العده ، گبال عيني أمن عليج اكثر
وانتي بحسبة بنتي
- عمو انت مو گلت تحلفين ، ليش ما حلفت ورحت وياهم ،،
- بابا شنو هالدموع الما تخلص ، ما قبلو ولله گتلهم تحلف ودافعت عنج باليرضا الله
- وهسه اهلي وين شالو ؟
- راح يسافرون لمصر ، بين ما يكملون إجراءات تخصهم ع مود هاشم واختج يدرسون هناك
تخبلت ، شكو اكثر من هيج ، اني هم بتهم ، حرام هيج يسوون بيه ولله حرام
عمو فدوه خابر ابويه يرجعلي ، ولله أبوس رجله ، والقرءان مظلومه
عمو الله يخليك
فدوه عمو
عمو ولله راح اموت ، ولله ،، أريدهم ولله اريدهم ، ليش يرحون بدوني ليش ؟