حلاتك مو سهل كلما تشح تنهاب
ياسمين
*******
كرار كلش يفرح من ادزله صوري اني متأكده من حبه اليه بس بمرور الوقت تلاشت هاي الثقه
مر ع بداية علاقتنا سنه وأشهر صرت كلشي اعرف عنه ادق تفاصيله اهتم بيها
الصراحه هو مهتم اكثر ،، واحسه مبالغ بأهتمامه وحبه وهالشي يوترني اكثر من ما يفرحني ، دوم اسأل نفسي والنهايه شلون
بعد هاي الصوره كرار صار يطلب صور لشعري ، يوميه يگولي دزيلي صورة لشعرج وهو مفتوح
ادزله ويبقى يتغزل كأنو اني الوحيده بالعالم عندي هيج شعر
گتله كرار شعري يوگع عندي تساقط وهواي استخدمت علاجات بس ميفيد
هو كلش اهتم للموضوع ، مرتين جابلي علاج اله
اول مره جاب ومصار زين عليه ، بس المره الثانيه لا تحسن هواي وحسيت بفرق
واني هم كلش اهتميت بي وكأنو مصدر قوتي يم كرار شعري . لان هو يحبه اني صرت احبه بهالطريقه
مرة ردت اسوي بي مقلب ، لبست باروكه بشعر قصير اسود ودزيتله صوره شنو رأيك بستايلي الجديد ؟
- حلو حبيبي ، حتى الباروكة حلوه عليج
- هاي مو باروكه ، هذا شعري گصيته
- عود سويها صدگ وشوفي شلون اگص ايدج طايحة الحظ
- هههههههههههههه عبالي اضوجك شويه
- ادري بسوالفج ، خليج منها بايخه ،، شوفي شسويت
دزلي صورة محفضته مخلي صورتي بيها الدزيتها البارحه اللي لابسه السلسلة مالته بيها وطالعه شفتي ورگبتي بس
- هاي حتى ما مبينه اني ، شنو معناها
- هو اني محتاج بس هاي المنطقه شسوي بيج انتي
- استحي عاد
- مااستحي من زمان هسه تردين استحي ،،
هههههههه
اشاقه وياج بس اكيد مااخلي صورتج كامله ، ميصير حبيبي
- زين وين سويتها ، يم المصور
- ثول ، شنو شفتيني هيج ثور واشوف صورتج للمصور ، اني طبعتها من حاسبتنا واصلآ هي ورقه عاديه تره
- منو يستخدم الحاسبه غيرك ؟
- لج شو هواي تلحين ، حاسبة ابويه وصورتج مسحتها من يمه
- شبيك ضجت
- لحيتي هواي ، شنو قابل اني مااخاف عليج
- لا مو هيج قصدي بس جنت دا اسأل ولله
- المهم اليوم شفت شي انتي كلش تحبي ، وصيتلج عليه ،
- شنو
