كرار
اليوم نروح لبيتنا الجديد لامين اخر ما تبقى من أغراضنا ورايحين
نزلنا بالبيت الجديد وأزهار استلمتنا شنو الغرفه الجبيره مو الي
- ولله سواء غرفتج او غرفة امي ماكو فرق بالنسبه لأبوي اثنينهم اله
ابويه ما حجا وهي صارت زركه من القهر
بقينا نشتغل لليل كلنا
من الصبح لليل نشتغل ما خلينا شي يعتب علينا حتى الحديقه والكراج والباب البره
وكلنا لازمين سره ع الحمامات احنه فوگ والنسوان جوة
ونمنا من التعب
الصبح بدت فقرة المسواگ من ابويه استلمني حجي ورزايل لان مااشتغل
أزهار - عود تعلم نوم الضهاري
- وانتي شيخصج
ابويه زمخ عليه لك هاي ويامن شيخصج ؟ بمثابة أمك حيوااان
- اهووووو هاي الشغله متخلص اروح اهج بالشوارع اشرفلي
امي لزمتني وتتوسل متريد اطلع من البيت
- يمه هو اني شمصبرني ع أزهار وابويه غير عيونج
- بعد عيوني يا يمه لتطلع فدوه اروحلك
ادري حياتي ميتغير بيها شي حتى لو تغير المكان ابويه مدمر نفسيتي ،، هو صح حريص عليه بس بعده بتفكير ناس قبل
طلعت صاح وراي وين مولي
- اريد اسوي نقل للمدرسه هنا
- والمن هالمدرسه هم لازم اني اصرف عليك مو ؟
- لا يابه مااريد مصرف خلي فلوسك الك
- شوفي ابنج الزفت شلون يحجي وياي واني ابوه شفتي ؟
اهووووو بدت رحمة الله من الصبح ، أول شي اني حجيت مو امي ، يعني ماكو داعي تصيح عليها
وثاني شي المدرسه مااعوفها لو ينزل الوحي يگلي عوفها هم ما اعوفها
أزهار - اي مو من شطارتك متعوفها
- الشطاره الج مخليها
طلعت واسمعها تكول وراي أدب سز درت خزرتها وطلعت روحي طالعه
بالباب استحيت اگعد لان المنطقه جديده ومااعرف اطباعهم ويمكن عيب عدهم واني روحي بگعدة الباب ،، شيگولون عليه ولا اعرف احد بالمنطقه ، عاد رجعت بدلت وطلعت اسوي النقل
شلعو گلبي ورجعوني ع المستمسكات اخذتهم بدون علم ابويه بگتهم بوگ من سيارته
ل1 الضهر يلا رجعت امشي تعبان شفت ابو هاشم جاي بسيارته فات گدامي للشارع
بقى يدگ هورن منتظر يفتحوله الباب صرت قريب منهم البنيه الزغيره فتحت الباب رفعت عيني ع البيت مو بيدي هذا طبعي هم شفت البنيه نفسها الشفتها البارحه بس هسه سويت نفسي ثگيل دنگت وفتت
