Unicode
Taehyung ရဲ့ မိဘမဲ့ဂေဟာမှာနေရတဲ့နေ့ရက်တွေက အဆိုးချည်းပဲမဟုတ်ပေ။
ဂေဟာမှူး Impius ကလည်း နတ်ဆိုးကလေးမို့လို့ဆိုပြီး သူ့ကိုပစ်ပယ်မထား။ တစ်ခါတစ်လေ အဆူခံရတာကလွဲရင် ဂေဟာမှူးက သူ့ကိုတော်တော်လေးဂရုစိုက်သည်။
သို့သော်လည်း ကျန်တဲ့သူတွေကအဲ့လိုမဟုတ်။ ဂေဟာတစ်ခုတည်းတူတူနေကြတဲ့ နတ်သူငယ်တွေက သူ့ကိုကြောက်ကြသည်။ သွေးစုတ်ဖုတ်ကောင်နှင့်အသွင်ပြောင်းကောင်တွေက သူနဲ့မဆော့ချင်။ စုန်းမအငယ်လေးတွေက သူ့ကိုမုန်းသည်။ ရှိတဲ့နတ်ဆိုးက သူတစ်ယောက်တည်း။ ဂေဟာမှူးက ဂရုစိုက်သည့်တိုင် သူ့မှာတစ်ယောက်တည်းဖြစ်နေသောခံစားချက်ကို ဖျောက်ဖျက်မရ။
နတ်သားလေးကိုမတွေ့ခင်အချိန်အထိပေါ့။
Jimin။ အဲ့ဒီအမည်နာမလေးနဲ့တင် Taehyung တစ်ကိုယ်လုံးကြက်သီးတဖြန်းဖြန်းထပြီး အသက်ရှူရတာမဝသလိုဖြစ်စေသည်။
Jimin ဆိုတဲ့ အမည်နာမနဲ့ နတ်သားလေးဟာ Taehyung အတွက်အရာရာပင်။ ထိုနတ်သားလေးကြောင့်ပဲ ပြုံးရသလို ထိုနတ်သားလေးကြောင့်ပဲ စကားနူးနူးညံ့ညံ့လေးတွေပြောမိတယ်။
Jiminnieကိုသူ့ဆီကနေဘယ်သူမှလုယူသွားလို့မရသလို Jiminnieရဲ့အနားကနေလည်း သူကတစ်ဖဝါးမှခွာမှာမဟုတ်ဘူး။
အခုတော့ အရပ်ရှည်ရှည်နဲ့ နတ်ဆိုးကြီးက သူ့ကို Jimin နဲ့ဝေးရာကိုခေါ်သွားချင်တာတဲ့လား။
ဟင့်အင်း မရဘူး။ မလိုက်ချင်ဘူး။
Taehyungတစ်ယောက် ဂေဟာမှူးကိုလှမ်းကြည့်တယ်။ ဂေဟာမှူးကတော့ မျက်မှောင်ကြုံ့ရင်းနဲ့ နတ်ဆိုးကိုမျက်တောင်မခတ်ပဲကြည့်နေတယ်။
"ကျွန်တော်မလိုက်ချင်ဘူး"
အခန်းလေးဟာ တိတ်ဆိတ်မြဲ။ နတ်ဆိုးနှစ်ကောင်က အချင်းချင်းကြည့်နေကြပြီး စုန်းမတစ်ယောက်ကတော့ နားထင်ကိုပဲ လက်နဲ့ဖိနှိပ်နေတယ်။
Namjoon က နတ်ဆိုးကလေးလေးကို လျှော့တွက်မိသွားခဲ့ခြင်းပင်။ ငယ်သေးတဲ့ နတ်ဆိုးလေး မို့လို့ ငိုယိုနေလိမ့်မယ်ထင်ခဲ့တာသူ့အမှား။
