معنى السعاده2

26

مجاهد :
طلعت من بيتهم سمير كسر قلبي لكن كلامو صاح انا شنو الزفت الوداني اشرب امبارح افففف قررت امشي المستشفى اشوف غاده 💓واخوها حصل ليهو شنو وصلت بس لقيت مستر آدم قاعد فما حبيت اقابلو خاصه انو البياناتنا اكتر من مشاكل رجعت البيت  للاسف بديت اتعاطى وفجأه لقيت نفسي مدمن اففف حياتي كلها ذنوب من ما فقدتهم 💔مشيت بانكسار دايما بفكر انو البعمل فيهو غلط بس ما قادر اتراجع مشيت لغرفتي ورقدت حانوم الليله من غير حبه لاني حامشي صح ببس اتقلبت واتقلبت وفي النهايه استسلمت وبلعتها جات ربى وقالت :
-" انت عيان بتبلع في شنو"
دسيتها وقلت :
-"ولا شي"
-"اذا بلعت الحبوب وانت ما عيان حبوبه قالت حتمرض"
-"طيب ما تكلمي حبوبه وحاوعدك اني ما ابلعها "
-"انت امبارح كوركت فيني لما جيت بالليل "
-"ربى اطلعي برا "
-"انت كوركت فيني وانا حاكلم ليك حبوبه "
-"ما تكلمها "
-"لا حامشي اكلمها هسه "
وقامت جاريه سكيتها بهستريه لو جدي عرف حيسوي لي شنو غير انو اتوعدني امبارح بعقاب وسمير انقذني لكن هسه يحلني منو مسكت ربى وقلت ليها :
-"ان كلمت حبوبه حاضربك ...حاضربك والله "
-"خلاص بسكت ما تضربني "
اففف ما مطمن ابدا فقلت ليها :
-"اوعديني انو يكون سر "
-"طيب "
ابتسمت ومشت وانا رجعت لغرفتي واعصابي بايظه شديييد بعد ربع ساعه كدا صعب علي النوم شدييد اففف اخاطر وابلع تاني...خاطرت وبلعت تاني ورقدت الباب ...دق دق دق  واتفتح كان جدي اتلفت ليهو قال:
-"امبارح كنت وين من بدرري"
-"في واحده اخوها تعبان كدا ومشيت معاها المستشفى وحرستهم شويه وجيت قالوا انهم قرايب حازم "
-"بتكذب علي يعني "
-"لأ والله دا الحصل"
-"وبعدين "
-"بعدين ....."
-"وين مشيت شربت "
-"......"
-"اتجلدت !"
هزيت راسي بخوف
-"عارف انو الكلام البتسوي فيهو دا غلط صاح "
دنقرت راسي ودموعي اتجمعت في عيونيو لو بس يا جدي تفهم اني ما قادر كمل:
-"طيب ليي بتسوي"
-"....."
-"ما تسكت اتكلم قدام ربك حتقول شنو بعدين "
-"...."
-"انت عارف البتسويهو دا بيتيشال ليك ذنوب في ضهرك حتوديها وين "
-"جدي"
-"اها عندك عذر"
-"انت ما فاهم "
-"وشنو البيخليني ما فاهم اااا ليي بتسوي كدا اديني سبب مقنع"
مزاجي اتقلب من خوف لغضب  قلت :
-"عشان انت تسال!!"
-"بتقل ادبك فوق الغلط المسويهو"
-"ايوة خليني انت بعدين ما بتتحاسب معاي خليك في حالك وانا العاوز اسويهو بسويهو "
اداني كف وقال :
-"الكلام دا امحاو من راسك "
-"ما تتسلط علي لانو كلامي وما بتراجع منو "
-"حتخلي البتسوي فيهو دا ولا  ...."
قاطعتو:"ابيت"
طلع من الغرفه وقفلني فيها ااقنعت نفسي اني ما حاسيب الحبوب الببلعها ولا اي شي بيريحني لاني مستحيل اعيش بدونها ونمت صحيت الساعه تلاته وربع مع اذان العصر كدا اتذكرت اني ما صليت الظهر بس اتناسيت الموضوع وفتحت الغرفه وعديت الممر ولقيت جدي وربى وحبوبتي عاينت ليهم من بعيد عيني وقعت في عين جدي رجعت سرعه ومشيت لغرفتي ورقدت فتحت التلفون لقيت سمير عمل لي بلوك وقطع اي طريقه تواصل معاي كأنو كان مستني اللحظه دي ضربت ليهو وبينهي المكالمه كرهتو لانو ملجئ الوحيد وعادي عندي اني اتذلل ليهو في النهايه فتح قال:
-"عاوز شنو؟؟"
-"سمير والله ما عندي غيرك عليك الله ما تخليني"
-"مجاهد انت عارف السويتو قدر شنو قدامي انا قدام ابوي قدام جدك وحبوبتك قدام ربنا قبلهم كلهم "
-"سمير انت ما فاهم انا ما بقدر اعيش غير كدا"
-"خلاص معناها خسرتني "
-"سمير انتظر"
-.   .   .   .   .   .
اففف قفل رقدت وانا بفكر امي وابوي ما غلطو في تربيتي جدي ما مقصر معاي وانا خذلتهم كلهم خذلت كل المأمل فيني سمير صحبي كنا بنمشي المدرسه سوا وبنرجع سوا خسرتو خسرت ثقه جدي وحبوبتي خسرت البت البحبها كنا اصحاب زمان لما كنا صغار كنت بقول ليها انا حاعرسك وبتضحك ونمشي نلعب سوا لكن هسه كل دا انتهى ما فضل لي شي خسرت كل شي في حياتي انتحر احسن ...دا شنو البقول فيهو لازم يكون في امل لازم بس وين كيف ممكن ارجع كل شي لمكانو الصحيح لو امي وابوي هنا كنت وريتهم بس ياريت يفهمو قدر شنو انا محتاجهم ومحتاج يوروني اعمل شنو بقيت تايه ما عارف اسوي شنو اترزعت في السريروبقيت سرحان مع السقف صحيت من السرح واختي ربى بتهز في يدي قلت ليها بغضب:
-"عايزه شنو؟؟"
-"حتوقف الحبوب "
-"ايوة "
-"انت بتكذب علي"
-"ومنو القال ليك كدا "
اشرت على الشريط بتاع الحبوب فوق الدرج وقالت:
-"كان ناقص حبيتين بس وهسه بقوا اربعه انا حاوري ليك حبوبه وجدو "
-"وانا حادقك بس "
-"طيب ارميهم في السله "
-"امشي مني ياخ "
-"ميجو "
-"ما تقولي لي ميجو اسمي مجاهد واطلعي برا"
-"وباقي الحبوب حتبلعهم "
-"لا "
-"انت بتكذب برضو "
رقدت في سريري واتلفت منها وقلت:
-"اطلعي بس"
كشكشت حاجه وطلعت
.......الراوية......
اتلفت مجاهد  وهي مشت براحه وشالت الحبوب مع انها كشكشت بس ما اتلفت ليها طلعت سرعه ومشت لجدها وحبوبتها ...
ربى:"جديييي"
-"اهلا يا حلوه"
-"جدي ميجو بيبلع حبوب وهو ما عيان حتضروا"
-"حبوب ...اديني ليها "
شالها وقلبها واتصدم قالت:
-"شلتها بالدس منو لانو قال حيدقني "
الجد وبيحاول يخفي غضبو :
-"طيب اقعدي مع حبوبتك وانا بتصرف"
الحبوبه :"بالهداوة وكل شي بيمشي ما تنهروا او تضربوا ما حيسمع منك كدا وحيعاند اكتر"
الجد:"طيب"
نرجع لمجاهد:
اتقلبت في السرير ونفسي قهرتني ومديت يدي على الدرج ماف شي اختفت نطيت وبقيت بفتش فجاه الباب فتح بوراي اتلفتت وكان جدي ومعاهو الحبوب قال:
-"بتفتش على دي"
وانا خلاص جبان لابعد الحدود انكمشت على الارض من غير ولا كلمه جدي جا وقعد على السرير وقال :
-"مجاهد "
كانت نبرته فيها شي من الحنيه ذكرني ابوي كتير فرفعت ليو راسي ودموعي في عيوني قال :
-"مجاهد من متين بتبلع الحاجات دي "
-"........"
-"يا ولدي وريني وكلو بيعدي على خير "
رديت وقلبي اتكسر:"مافي شي بيعدي على خير ياجدي ربى بقت بتخاف مني وحبوبتي زعلانه واصحابي كلهم بعدوا مني حتى سمير لمياء رفضتني وكل الامور ماشه غلط ماف حاجه حتتصلح ومستحيل حياتي ترجع زي زمان حياتي انتهت"
-"مجاهد ما تبكي"
-"خسرت كل شي حياتي بلا معنى ماف طريقه عشان تصلح شي انا اصلا ادمنت "
-"مجاهد يا ولدي الله قادر ورحيم بعباده وربنا قال "لا تيأسو" في القرآن يعني مهما حصل بتقدر ترجع تاني قوم اقعد جنبي عشان اقدر افهم "
مشيت جنبو قال :
-"انت وريني ليك كم ؟؟"
-"تلاته شهور "
-"وكيف بديت ؟؟"
-"صحبي هو الجراني معاو"
-"نمشي المستشفى عشان....."
هنا قلبي دق خفت وقاطعتو:"لا ما عاوز امشي المستشفى "
-"مجاهد لازم تمشي عشان تتعالج "
-"لأ لأ ما ماشي"
-"خلاص طيب اقعد معاي "
-"انا خاييف"
-"لا دا ما كلام رجال "
-"جدي ما عاوز امشي المستشفى "
-"ليي ؟؟"
-"اذا في زول عرف اني بعمل كدا حيحصل لي شنو"
-"يا مجاهد انت قلت براك انك خسرت كل شي فما عندك حاجه تخسرها ارح المستشفى"
-"وسمعتك يا جدي حتخرب بين الناس"
-"مجاهد بتي ماتت وخلتك انت واختك لي ما خلت حاجه غيركم عاوزني افرط فيكم عشان سمعه "
-"طيب بس ما عاوز امشي المستشفى حاحاول اوقف براي "
-"طيب بس اذا حسيت باي شي توريني"
-"تمام "
.....