ضي
فتحت الباب وشردت للغرفه
ضي: عمو اجه عمو باسل ووياه رجال القاضي الي شفته الصبح
تفاحه : يمه ياقاضي شيريد راح بيها ابني
سامر: ليش يما ابنج المصخم شمسوي بعد
تفاحه: يايما ولك وينك ياحجي شوف ولدك اشتكى على اخو اخذوا راح ابنك ياحجي
سامر: يما شسالفه قاضي ياخذني قابل رئيس مخابرات اشو بسطت طنطل البيت وغراب البين
ضي: بيبي هذا القاضي الصبح بالمحكمه اجه هسه ويه عمو باسل .... شدخل ابوي بالسالفه
دخل عمو باسل للغرفه
باسل: وينكم وين صلاح
سامر: شسوي بصلاح
باسل: يمعود ابو ريسان هنا هذا قاضي ضي وشكله يريد يساعدها بالعراق كله ماكو قاضي يساعد مطلقه
ضي: يعني هسه راح يطلكني
باسل: لا طلكج واجه يبشرج... مو يشتغل عند الخلفنا يطلكج هسه
ضي: ههههههههه
باسل: گومي سوي جاي مهيل بسرعه
تفاحه : طلعي الاستكاين الزينه المذهبات والصينيه الجديده
باسل: گوم سامر وصيح صلاح
تفاحه : طلع صلاح من البيت
سامر: يما مو وكتج ابد اسكتي
تفاحه: اي ولدي صايرين مايحترموني يسكتوني ... بعد يومين هم تضربني
سامر: اهوووووووو اطلع للرجال احسن الي
طلعوا يم القاضي
رحت للمطبخ سويت جاي وطكملته
دكيت الباب طلعلي عمو باسل
اخذ الصينيه مني
باسل: البسي عبايه صيحي بيبي وتعاي ادخلوا
صافنه شكو ياربي
رحت للغرفه صحت بيبي
ضي: بيبي يردونا گومي وياي
تفاحه: يا هذا خاف يريد يخطب
ضي: المن يخطبج
تفاحه: دولي يله ولي من يمي
ضي: ماعدنا عزباء بس انتي ههههههه
تفاحه: يل مصخمه يخطبج ... روحي البسي وعدلي نفسج اغسلي وجهج لاطلعين بهذا وجهج الاصفر
ضي: يا بيبي صدك تحجين اني مزوجه
تفاحه: يطلكج ويزوجج
ضي: يا استغفر الله
لبسنا ودخلنا للاستقبال
اضحك على بيبي من شافته جبير
عبالها شاب
مدنكه ومستحيه وارجف
ضياء: شلون صرتي بنيتي
ضي: بخير
بيبي تحجي بصوت ناصي
تفاحه : يا دهر طره اذا مثل بنته شعنده جاينا
مختنكه من الضحك بيبي ادردم
ضياء: حجيه انتي بيبيتها
تفاحه: اي يايمه
ضياء: جيتي بعيد كل البعد عن قضية طلاك ضي ونوح .... اني جاي اساعدها اتبرع اسوي العمليه لضي كل مصاريف العمليه على حسابي بهذه الحاله حتى حياتها الزوجيه تستمر
تفاحه : يايمه ينطيك العافيه
صافنه وضجت دموعي نزلت
كمت
ماتحملت ابقى يمهم
................................
ضياء
ضياء: مرحبا باسل
باسل: اهلا استاذ ابو ريسان
ضياء: باسل هذه البنيه اليوم اقاربك شنو سالفتها بالضبط
باسل: هذه امها وابوها منفصلين هي ضحيتهم بيبيتها ربتها وكبرتها ..محد يخطبها رغم اخلاق حلوه ونادره ومؤدبه بس خطيه مرضها مانع زواجها ...زوجها يعرف ومااعرف شلون صار الاتفاق المهم من تزوج مايقبل بالبنيه ومايريدها ابوها مايقبل يتنازل عن حقوقها صايره لخه وخطيه هي الضحيه بين ابوها وزوجها
ضياء: وضعهم شلونه ليش مايسويلها عمليه ابوها
باسل: استاذ شتحجي عايشه وياه بنفس البيت وبالصدفه يشوفها مرات اسبوع يمر ومايدري شي عنها
ضياء: وامها
باسل: اطلكت خلصت عدتها تزوجت شمرت بتها عند بيبيتها وطعاشت ويه عماتها وبيبيتها ربتها وكبرتها
ضياء: ها لا حول ولاقوة الا بالله
