ضياء
نزعجت من تصرف ضي
اول مره انرفض من شخص ...ماتقبل مساعدتي
فهمتها صعبه ومحافظه على كرامتها
بقيت اتابع الدعاوي ...بالي متشتت
ب١ كملت عقلي بعد مايگدر يستوعب الشغل
طلعت
حامد: ها سيدي
ضياء: اخذني لبيت ضي
حامد: ماشي
صعدت مستغرب من تصرفي ليش هيج اتصرف
اروحلها لو لا
ماافهم تصرفي المهم ساكت وراغب اروح لضي
ذكرتني بأيام طفولتي
................................................
ذكريات في زمن الماضي
................................................
تذكرت حياتي وعزة نفسي
مرت ايام احنه بالشارع بس الاكل مدبري
بقيت ساكت مابلغتهم عن روحتي لابوي
اخاف من ظافر يضربني
امي تعبت ومحد الها وحيده بهل دنيا
امي بنت عم ابوي متربيه عدهم بلاخير طردوها هي واولادها
صفينا بالشارع شهر
انواع العذاب تعذبنا
من جوع وفقر وبرد ماكو فراش
جنت عاجز فاقد الامل تتغير حياتي
صارت كل احلامي ثاني يوم نحصل اكل ناكل لو نام بدون غده وعشا
امي تحارب الدنيا لاجلنا هي تشتغل بالمحلات
تنظف الصبح ويصدقون علينا
أتألم من هذا الوضع مااقبل تشتغل
ابجي اسحبها تضربني وتسكتني
الى ان بيوم ظافر اجه يركض لامي
ظافر: يما تعاي عوفي كل شي
سعديه: شكو
ظافر: يمه تعاي لگيت بيت
سعديه: شلون
ظافر: يمه لگيت شغل وغرفه
سعديه: شنو الشغل
ظافر: احمل كراتين من سولفت قصتي لابو المحل انطاني غرفه نكعد بيها
سعديه: يما صدك تحجي
ظافر: اي والله يمه
احلى فرحه عندي من امي راح تبطل من شغلها
رحنا للغرفه فارغه وسخه وبيها ريحه لاتطاق
الغرفه بس اسمها تستر علينا
من بيتنا القصر لهذه الغرفه
استغرب من امي مامهتمه ومامقهوره
اشوف ابتسامتها تضحك وتشاقه ويانا
ماشكت ولاتتحسر كدامنا
علمتنا على الصبر والقوه والعزيمه
عشنا حياتنا بالغرفه
رفضت نترك دراستنا
اني وظافر قسمنا وقتنا دراسه وشغل
نطلع من ٤ الفجر نحمل بعدها نطلع للدوام
من نكمل الدوام نرجع لشغلنا
امي بالبيت كامت تطبخ للعمال وتاخذ اتعابها
واني وظافر نصرف على دراستنا الاكل والشرب
امي الي تاخذه من شغلها تضمه ومانعرف المن
ومن نسالها ماتجاوبنا
بقينا سنه ونص على هذا الحال
الى ان بيوم بالليل
ندكت الباب بقوه ونكسرت الباب
دخل ابوي واثنين زلم
