بنُت المّدينةة🕊💫

بارت 39🥺

صباحو حبايبي

- واحچيلك احچيلك وبالك شارد
ومَ اگدر ازعل وانتَ بَس هالواحد ،

ديمه : نمت بغرفه جدو واني مرتاحه كلش
والضحكه ماخذه وجهي وكلبي
اريد اصعد اشوف شكل علي هسه شلونه
الفضول كام ياكلني اريد اشوفه وانزل
كمت من الفراش اريد اطلع من الغرفه
زهرة : دامج ميته عليه شكو سويتيلج هاي المشكله
ديمه : جده شبيج رايحه اشرب مي
زهرة : كتيلي اشربين مي
ييي روحي اشربي مي
ديمه : طلعت من الغرفه
امشي على كيف علمود محد يحس بيه
طلعت للمطبخ لكيت الباب مفتوحه
اكيد علي مااكو غيره
طلعت من باب المطبخ لكيته كاعد بالحديقه على الكرسي ويدخن
يمه فديت العصبي شكد حلو
اتحارش بي لو لا اتحارش بي لو لا
دخل اتحارش بي ويرتفع ضغطه
شكله حلو وهو معصب
تقدمت شويونه اخاف انلزمت وانكال
شعندك كاعد لحد الان
بس كلت هيج يمه  باوع عليه والاعصاب مبينه
رجعت خطوتين ليوره
علي : انتي الي سويتي قبل شويه من عقلج
ديمه :من كامل قوايه العقليه
علي : اهاا وشبيج بعيده تعالي تقربي واحجي
ديمه : لااا عيني شكراً
علي : والله بس الزمج الا اخليهم يقرون عليج الفاتحه
ديمه : امانه عليك ورايه عود لا تزوج
علي : ربييي اني احجي ومحروك كلبي وهي كاعده تحجي ابرود
ديمه : لاا والله هاي وصيتي اذا متت عود لاتزوج ابداً
ضل يباوع عليه عرفت راح يكوم
وصدك كام
واني زيبك ركضت دخلت للغرفه مال جدو
زهرة : شلون اليوم ماانخلص
ديمه : شفت بزونه وخفت شبيج جده
زهرة : بزونه كولي عتوي
ديمه : ناامي جده نامي
ضلت اضحك علىً سوالفنه
خليت ايدي على بطني
شفت ماما شلون خبلنا بابا
يستاهل لان يضوجني
واحنا لازم انضوجه
من كثر مااحجيت ويا نفسي وبطني دخت ونمت
مااحسيت على الدنيا

علي : رغم السوالف الي تحرك كلبي
وتحديها وتهديدها بجدي
وفضحتنا بتالليل كدام جدي والحجيه وابويه
بس اكو شي بداخلي مرتاح
خصوصاً من اشوفها تضحك لو تشاقه
ذكرتني باول ايام شوفتها
من خلت الملح بالجاي
ومشاغباتها
صح اني عصبت بس عصبيتي تروح من اشوف ضحكتها ونوب تخاف من عندي 
وطلعت للحديقه
بس كمت طكتها بركض
خلتني اموت ضحك عليها
لازمه بطنها وتركض
تمنيت تكون حامل وصدك تلزم بطنها
باوعت للسما
وناجيت ربي يحققلي امنيتي
رحت للديوان ونمت بي
ديمه : كعدت الصبح متأخره ماحسيت حتى على جدو وجده
طلعت من الغرفه وهوسه
وكومه نسوان
اليوم عرس مناف
صعدت الغرفتي
غسلت وبدلت ونزلت
للمطبخ سويت لفه وكلاص حليب
ورحت للاستقبال
لكيتهم كلهم موجودين حتى المتعجرف
صباح الخير
الكل : صباح النور
الشيخ رسن : تعاي جدي اكعدي يمي
ديمه: ييي اجيت جدو
الشيخ رسن : على كيفج بنيتي
ديمه : يمه صدقه للحنين بسته وكعدت يمه
وصار كبالي المتعجرف
باوع عليه وصغر عينه
يمه اذا يلزمني الا يوديني للنجف
الشيخ رسن : اليوم العرس مال مناف
جدي لاتطلعين من غرفتج
خليج بيها
نصير : ليش يابه خليها تتونس
الشيخ رسن: لا وليدي اخاف عليها هي مريضه
انوب تتخربط الجهال تدفعها
توكع مابيه حيل
ماشي بنيتي
ديمه : حاظر جدو
هو اني حتى مابيه حيل تعبانه
مناف اخاف ماكدر اشوفك عريس
من هسه اباركلك
الف مبروك ويارب زواجه الدهر
مناف : الله يبارك بيج بنت عمي
ويوم انشوف جهالكم
ديمه : امين يارب
ماكو دقايق ودخل قاسم ويا وداد
رايح جايبها من اهلها
قاسم : السلام عليكم
الكل : وعليكم السلام
قاسم : جدي اني رجعت وداد
طبي وداد سلمي عليهم كلهم
وداد : ادلل حبيبي
ديمه : اباوع على قاسم يموت ضحك خصوصاً من وداد كالتله حبيبي نفش ريشه ولا الملك سلطان
وهو ميجي السنبل
سلمت وداد على الكل حتى عليه ودخلت اسلم على البقيه
واني الخوف اكل كلبي
خفت هم ترجع اسويلي شي
من الخوف كلبت معدتي
ركضت للحمام علمود استفرغ
طلعت روحي واني كاعده استفرغ والكل يدك على الباب
طلعت
صار بوجهي علي
علي : شبيج ديمه
ديمه : شمرت روحي بحضنه تعبانه
علي: من شنو ابويه
قبل شويه مجان بيج شي
ديمه : معدتي كلبت
وداد : اخاف حامل
ديمه : كاعده اجاوبها وجدي جاوبها
الشيخ رسن : لالالا هو الدكتور كال معدتها متأذيه
يمكن الحليب الي شربتي موالم معدتج
ديمه : عرفت جدي هم خايف عليه من وداد
يي جدي من ورى الحليب
لعبت روحي من عنده
الشيخ رسن : علي وليدي صعدها الغرفتها وخليها تاخذ دواها
علي : حاظر جدي
ديمه : علي لزم ايدي
وصعدني على كيف للغرفه
نومني على الجربايه وانطاني الدوه وطفه الكلوب وطلع
كلش احب اهتمامه
اموت عليه من يهتم بيه ويداريني
ومن افكر اكول ليش مااكله حامل علمود يهتم بيه
اريد اهتمامه ابد ماينكطع

سارت الايام ومناف ازوج وزوجته حبابه صغيره عمرها 17 سنه
وخجوله وتسمع الكلام عكس وداد جذرياً
جنت كاعده يم جدي
على الغدة
الشيخ رسن : بنيتي ورى الغده حظري روحج نروح للدكتور
ديمه : مابيه شي جدو
الشيخ رسن : مهما يكون اريد اطمن
وعزالدين فرغ روحك لان راح تجي ويانه
علي : جدي اني اخذكم
الشيخ رسن : لاا عزالدين ياخذنا
علي : جدي شنو السالفه ترى هي مرتي
الشيخ رسن : هم كال مرتي
ترى وروح اخوي اعرف هي مرتك
واني كلتلك انت معليك بيها
علي :شنووو معليك بيها مررتي ومريضه غير اني اداريها
الشيخ رسن : جان كلت النفسك قبل متوكع وتركض بيها للدكاتره
علي: جدي بين المزوجين كلشي يصير
الشيخ رسن : واني حفيدتي غاليه عليه
ماانتظر منك تعطف عليها وتهتم بيها
علي : مااكو عطف جدي شنو هذا الحجي
الشيخ رسن :ييي وهسه شتريد
علي : اني اخذها
الشيخ رسن : واني كلت لا
كومي بنتي ارتاحي شويه
علمود متتعبين يم الدكتور
علي :ديمه انتي موافقه على الي كاعد يسوي جدي
ديمه : خفت اكول يي انوب يبطل يهتم بيه ويبعد عني
باوعت على جدي وهو نقذني
الشيخ رسن : ديمه متخالف اوامري
علي : جا مادام هيج اني اريد اخذها واطلع بيت وحد
الشيخ رسن : يي والله اسوي علينا فضل
ديمه : صعدت للغرفه
صايره كلش احب النوم
بس خليت راسي على المخده نمت
كعدت على صوت هدى مرت مناف
هدى : كومي حبيبتي جدي الشيخ يكولج بدلي علمود تروحين للدكتوره
ديمه : يي حبيبتي هسه اكوم
كمت غسلت وبدلت
ولبست عباتي
ونزلت على كيف
صار جدي بوجهي وعلي ورى
الشيخ رسن : هاا بنيتي جاهزه
ديمه : يي جدي ماعندي شي
علي : عود لاتقفلون تلفوناتكم
ديمه : حاظر
طلعنا اني وجدو وعزالدين
ورحنا للدكتوره
انتظرنه
نص ساعه ودخلت للدكتوره
اخذتلي سونار وكامت تضحك
دكتوره فرحيني وياج
الدكتوره :صارلج شكد من مزوجه
ديمه : راح يصيرلي سنه
الدكتوره : وكلتيلي بهذيج الجيه انتي طرحتي
ديمه : يي للاسف
الدكتوره : هههه ورب العالمين حب يفرحج
وانتي هسه حامل بتوم
ديمه : ضليت صافنه على مصدومه على مادري شنوو
بسرعه كمزت
عليج الله كوولي مكاعده تشاقين ويايه
الدكتوره : هههههه على كيفج
لا مكاعده اشاقه وياج
ديري بالج على اطفالج
وهما صحتهم زينه
وانتي هم صحتج زينه
وراح انطيج فيتامينات جديده
ديمه : الدكتوره تحجي واني الفرحه مشايلتني من كاعي
طلعت اريد اشوف علي اريد علي
اريد اكله اني حامل بتوم اريده يفرح مثل ماااني فرحانه
طلعت للسياره
وصعدت بيها
جدووو عز الدييين
انيييي حامل بتوووم
اني راح يصيرر. عندي ثنين جهااااال
الشيخ رسن : اللهم صل على محمد وال محمد
عزالدين : راح اصيرر. عم للثنين
ديمه : جدي لازم اكول العلي لاززم
الشيخ رسن : يصير خير بنتي
________
هلا حبايبي
لاتنسون النجمة والتعليقات الحلوه 😍