الوصيه

خوفي زاد لمن سمعتهم يجهزون موعد مشيه الزلم

بوكتهه بالليل لميت غراضي و گلت اشرد احسن حل

نزلت جوا و گلبي ما انطاني ااذي امي هيج

هي الوحيده الوكفت بعيني

صعدت و گعدت ابجي

لحد ما غفيت بمكاني بالگاع و فزيت على ايدين امي اتگعد بيه

-شني هاي الجنطه؟

باوعتلهه و حجيت

-ردت اهجن بس القطار ما وصل

ضربت صدرهه و عاطت بفزع

-يماا ولج بس لا اتسويهه صدگ؟ اموتن والله

هزيت راسي و سكتت

اتحددت جيتهم و خوفي ازداد

جان حسبالي بس يجون الزلم كأتفاق و يسألون ابوي بشكل رسمي

بس الي فاجأني انو بيومهه راح نعقد شيخ و غير يوم يصير المهر

بالليلتهه بجيت و ما اجاني حتى نوم و حسيت خسرته للأبد

قررت اودعه احسن ما اروحن بدون وداع و اصدمه

فتحت الحظر و دزيتله رساله

- انه مقدره اصرارك عليه و اريدك تعرف انو انه هم اتمنيت ننجمع سوا بس للأسف باجر راح اصيرن على ذمه واحد ثاني

دزيتهه ببجي و رجعت الحظر

صار ثاني يوم و انه ما بقى بيه حيل وجهي اصفر و كلساع اتحط مكياج و امسحه

بجيت بجي بس الله يعلم بي

طب اخوي گال اجوي و انه دمي صفر من الهبطه

شويه و ما نسمع الا صوت الطلق

ركضنه كلنه انباوع من شباك المطبخ طلعوا الولد يشوفون شكو

فتحوا الباب و صار بوجهي اشوفه من بعيد

شايل رشاشه و يصيح

- اذا ما اتصير اليه ما اتصير لغيري