الفوهرر

🪦الفوهرر🪦 25

🪦الفوهرر🪦

بقلمي: أريا ستارك

⚰الموسم الأول:من دم إلى تراب⚰

أيسل: 20

#قبل_أربع_سنوات

واقفة قدام باب غرفة هي وكريس وديك لمونيكة ديال دراشتي خلات ليها هي لباب بتيليفونها حطاتو قدام مربع إلكتروني أسود كان لون أحمر ولا أخضر دورات لبواني ودفعات لباب:
<مهمتي سالات باااي بييتش>
<باي سكنك> ( كتعني انسانة موسخة)
<دراشتي كنضن لعميد براسو قالينا نديرو تور ونوريوها كل حاجة فين كاينة وعاد نديوها لعندو باش تسيني لوراق>
<لالا بلاش عيانة مع طيارة غانعس شوية عاد نمشي نشوف هاد لعميد من لي نسالي>
كريس بقا واقف شحال كيفكر واش رافا غايبغيه يخليها على خاطرها ولا يدسها صحة لعند لعميد...بتاسم جنب بمكر..
<من هنا لتمنية لعشية لعشا كيتحط غاتخرجي ديريكت من هنا حتى توصلي لكلوار عريض ودوري عاليمن غاتلقاي باب كبير فآخرو اغلبية الأوقات كيكون محلول وقيتة لماكلة>
<اوكي شكرا بزاف على ليوم>

ضار عندها غمزها وبقا كيشوف فيها شحااال:
<كنتمنى تبقاي تال التخرج...تشاو بيلااا(باي ايتها الجميلة)>
(حوار داخلي)
عارفة نوع ديال هاد دراري كيبغيو يخلعوك من اول نهار وركبو فك الرعب، ولكن معاشوش لي عشتو باش يقدرو يحكمو على حياتي...
سمعتهم قبيلة كيدويو على لغرف وقالو لجناح لي انا فيه ديال لي جاو بالمنحة وغايكون أكفس بلاصة فهاد لأكادمية، توقعت شي بيت صغير بزاف مافيهش اتات بزاف ... ولكن من لي دخلت لحت صاكي للأرض وبقيت حالة فمي... كيضحكو عليا واقلة لكان هنا اكفس جناح كير جناح ديالهم...
بطبيعة لحال على حساب طوموبيل وليخت باينة بالنسبة ليهم حيوط بلون ممل رمادي وسرير لشخص واحد، تلفازة وبلاكارات عادي ماشي شي حاجة ... وقفت قدام لكوزينة صغيرة وانا خالة فمي هادا راه سويت ماشي بيت فيه كوزينة؟!! مايمكنش مشيت نجري للحمام لقيت فيه دوش كلو زاج ... حلمي تحقق بييت بوحدي وفيه حمام وكوزينة هادي راه برطمة كبيرة فأناسي ههههه هزلت.
جاني واحد ضحك هستيري قالك اكفس بلاصة مافراسهمش بلي كنت ساكنة مع مريم فلاكاب واخة كانو عندها فلوس كانت كتخسرهم عليا فلقراية فقط أما المعيشة كانت بئيسة فحال حياتي كاملة.. حليت بلاكارات فلحمام ولقيتهم مصطوكيين بلفوطات، حليت لي تحت لحوض ولقيتو كلو برودويات ديال حمام وشعر كلشي لي تقدر تحتاج...
<غريب هادشي>
خرجت من لحمام ومشيت لبلاكارت لي على يمين سرير حليتهم كنلقا بلاكار عامر حوايج وكلشي باقي بتيكيتة، لاطاي صغر مني شوية ولكن ينفع حسن من حوايجي فصاكادو...
<هادشي واش نقدر نلبسو ولا لا>
حسيت بشي حاجة كتحرك ورايا من لي ضرت وشفت اشنو لي تار إنتباهي كنضن لأكادمية كلها سمعات غواتي...

بقيت كنغوت شحال حلقي ضرني حتى دخلات مع لباب لي خليت محلول بنت سمراء زوينة كتجري، هزات طوبة بين يديها وعنقاتو كتقول:
<ضوريتو!! فين كنتي من قبيلة وانا كنقلب علك>