عشق الجاسر ( مكتمله )

البارت السابع

#البارت_السابع

#عشق_الجاسر

امينه : انا هروح الم الاكل من على السفره واقول لجاسر يطلب لنا الحاجات اللي انتي قلتي عليها .

دنيا : بصوت واطي ، انا باقول يا طنط حرام الاكل اللي على سفره ده وانتي تعبتي فيه ، احنا نروح ناكله احسن ، اصل بصراحه بغض النظر عن القرف اللي جاسر بيقوله ، انما طعمه حلو قوي .

امينه : وهي تضحك ، انا هروح اعملي سندوتشين جبنه ،

اصل معدتي مش هتستحمل اكل الشطه ، وياخساره العزومه اللي باظت .

ذهبت دنيا بسرعه الى الاكل واكلت قبل أن يشاهدها جاسر ، ولكنه كان يراقبها وهو يضحك .

اتصل معتز الخولي علي جاسر الحديدي ليبلغه بأمر هام ، فقال له جاسر ان يأتي اليه ، ذهب معتز اليه .

جاسر : تعالى حماتك بتحبك .

معتز : وهي فين بس حماتي يا ما نفسي اروح لبنتها واتلم بقي .

امينه : والله لو عندي بنت لجوزهالك يا معتز .

معتز : ست الحبايب عامله ايه يا ماما امينه ، ازيك يا دنيا

دنيا: الحمد لله يا آبيه معتز .

امينه : ربنا يسعدك يا معتز .

جاسر : لو سمحتي يا ماما تعمللنا فنجانين قهوه ، انا ومعتز هنقعد في المكتب هنتكلم في شغل وذهبو إلى المكتب ، ذهبت أمينة ودنيا الي المطبخ .

دنيا : هو مفيش خدامين هنا يا طنط يساعدوكي .

امينه : لا لكن في واحده بتيجي تساعدني كل يومين وبتنضف الفيلا وتروقها .

دنيا : ومبتجبيش حد يساعدك ليه .

امينه : انا اتعودت اعمل الاكل بأيدي ، وجاسر مبعرفش ياكل غير من ايدي ، حتى كان عايز يجبلي ناس تقعد في الفيلا وتساعدني لكن انا رفضت .

دنيا : ليه طنط .

امينه : يابنتي انتي شيفاني مولده في فيلا يعني ، انا كل حياتي انا اللي بطبخ واغسل واكنس ، خلاص حياتي واتعودت عليها .

في المكتب .

جاسر : في ايه يا معتز قلقتني في التليفون ، ايه اللي حصل .

معتز : مش هتصدق اللي انا شفته النهارده .

جاسر : ماتنطق .

معتز : طارق الرويعي .

جاسر : لا ، دا انت كده هتشلني لحد ما تتكلم .

معتز : ما انا بقول اهو ، شفته النهارده خارج من شركة منار العدلي .

جاسر : بدهشه ، وايه اللي ودا طارق لمنار .

معتز : ماهو دا اللي جابني ليك جري قلت لازم تعرف .