لم تكن امي(لبوة الاسد)

البارت الثاني

_البارت الثاني_
........................
‏"في بعض الأحيان تتعبُ الروح مِن الهرب،
العالمُ صغيرٌ لدرجة أنكَ لا تدري أين تفر بِجلدك."
_كارلوس زافون.
.........................
هدى _ظليت قريب الساعتين ادرس سليم لحد مكملت وطبيت بالفراش اشرح بيه احزاني..
كعدت ثاني يوم موقته الساعه على ال٦ الصبح بسرعه طلعت غسلت وحضرت الريوك وراها كعدت خواتي واخويه سليم امي وعمتي نايمات..
هاجر وقمر وسليم يروحون سويه للمدرسة لانو كلهم ابتدائي وبنفس المكان يداومون..
بابا كعد حته يطلع لشغله صاير هل فتره تكسي يشتغل  بعد ماجان يشتغل أعمال حره شافني ابتسم بوجهي..
ضياء_هاا باباتي البارحة من رجعت مشفتج..؟
رديت بحزن واني اذكر البارحه،، اي بابا مو جنت نعسانه فنمت من وكت..
يلا حبدل حته اروح المدرسه..
رد،، اي بابا روحي الله يوفقج..
بس لحضه!!
.. نعم؟؟
شبيج بابا ليش تمشين بالكوه متعوره لو شنو..
رديت،، هاا لا اقصد اي يعني من جنت اشتغل ضربت رجلي بالميز واذتني هيج..
رد،، انتبهي بعد والشغل مطاير تره واذا تحتاجين طبيب كوليلي..
.. هزيت راسي بمعنى اي..
بدلت وأخذت جنطي طلعت اتمشه بالشارع وحاطه ايديه بجيوبي صافنه على الشارع والجهال..
وصلت للمدرسة شفت صديقتي جميلة وشكلها مدري شلونه حواجبها تاتو وصابغه شعرها بالرغم عمرها بس ١٥ بس تصرف بأكبر من عمرها حته جسمها متروس ولا عبالك طالبه متوسطة وكله تحجي عيوني وعمري..
علاقتي بيها على كد السلام وسوالف الدراسة ومرات تجيني للبيت حته أقريها واشرح الها الي مفاهمته ولا مره تعمقت بعلاقتي بيها لو سألتها عن حياتها الشخصيه..
مشت الايام واجت امتحانات اخير السنه وامي صارت بيها مابيها تذب عليه الشغل أشكال وألوان حته  مادرس ومرات تخليني اقري اخويه وخواتي وانظف المطبخ يلا اروح لغرفتي وهاي اقره بس كم كلمه وانام جفي من التعب..
ماعرف الصراحه شلون نجحت وصرت صف ثاني متوسط بابا فرح لنجاحنه اني واخواني وانطه فلوس لأمي تشتري النه غراض بمناسبه نجاحنه..
كيفنه كلنه اني وخواتي وهيه اخذت اخويه سليم وعمتي وطلعوا للسوك من الضهر لليل يلا اجو.. بحيث اول مطبوا ركضنه عليهم ناخذ غراضنه ونتفرج شنو اشترت النه..
احلام _لو تعرفون شنو اشتريت الكم احلى الملابس والاغراض..
قمر _صدك ماما يلا نطيتي أشيائي..
هاجر _ياااي ماما واخيرا راح نلبس شغلات جديده..
احلام _اي يلا امشن لغرفتي انطيكم ملابسكم و غراضكم..
راحن خواتي لغرفه امي واني هم طبيت وياهم باوعت عليه امي وحجت..
احلام_شو طبيتي انتي هم.. يااا بس لا عبالج اشتريت الج شي؟؟
رديت،، اي لعد ليش..!!
ردت بضحكه،، يمكن نسيتج لاا اوكفي اي صح خلصت الفلوس ومجبتلج شي..
رديت،، ليش بابا مو نطاج فلوس على عددنه وكلج اشتري النه غراض علمود نجاحنه
ردت،، اي صح بس الصراحه معجبني اجيب شي لحضره جنابج ..
رديت،، يعني شنو؟؟
تقدمت عليه وجرتني من ايدي وطلعتني بره الغرفه
ردت،، يعني كل شي ماكو الج بح وهسه بره يلا
رديت والدمعه بطرف عيني،، زين ليش؟
ردت،،هيج بكيفي..
.. ابتسمت بوجهي بخبث لزمت الباب وسدتها  بوجهي واني على وكفتي اسمع صوت خواتي يطلعن بالاغراض وفرحانات وصوت ضحكتهم واصل يمي..
كعدت بالكاع وكرفصت روحي وكمت ابجي واشهك.. شنو اني وحد عن خواتي وحد عن البنات ليش سوت هيج ليش متحبني..
شنو الذنب الي ارتكبته حته اصير هيج منبوذه منها ومتحبني ادري اني بت الجوارين لو جايبتني من الشارع وهيج ممعترفه بيه..
بحيث اول مجابتني وجيت للدنيا نطتني لعمتي حياة وتكلها هدى من اليوم ورايح صارت بتج لا اريدها ولا معترفه بيها..
مرات اسمع البنات يسولفون على أمهاتهم شلون يحبوهم ويجيبولهم كل شي يتمنوا وبالامتحانات اشوف الأمهات واكفات اباب المدرسه تنتضر بناتها لو بأول يوم دوام بالمدرسه يداومون ويه جهالهم شو بس اني ولا شغله من هذني حسيت بيهن؟؟
ظليت على كعدتي هاي وصافنه بالفراغ شويه وسمعت صوت الباب مال الشارع انفتحت ودخل مازن ابن عمتي صبيحة هوه بالدوام يروح يم بيت اعمامة لانو مدرسته يمهم وتصير بعيده عليه منا بس من يخلص الدوام يرجع لبيته...
صار هواي مشايفته شكله متغير حيل وكبران صاير عده لحيه وطويل باوع عليه وحجه..
مازن_هااي شنو هدى عاش من شافج كبرانه يابه..
ابتسمت بحزن،، اي اني انته هم كبران شلونك..
رد،، بخير شو كاعده بالكاع شبيج وين البقيه؟؟
رديت،، بالغرفه كلهم..
باوع عليه بنضرات غريبه
رد،، هاا خوش اني صاعد بغرفتي واشوف امي اسلم عليها..
.. مشه من يمي ورجله طخت برجلي حسيته متقصد انو يطخني لو يمكن اني متوهمه مهتميت كلش..
رحت للمطبخ شفت عدنه كبه طلعتها كليتها وسويت فنكر هسه يجي بابا جوعان وعمتي وامي ياكلن راسي..
كملت طلعت من المطبخ شفت خواتي كل وحده لازمه بيدها شغله وفرحانه بيها اجن يمي يسولفن وياي واني الدمعه بعيوني..
صار كومه محد مشتريلي شي وحته ملابسي عبالك مال فقره واحنه حالتنه مو لهاي الدرجه..
خلفله على امي تاخذ الفلوس من بابا وماعرف وين توديهن.. اجت عمتي كعدت كبالي حاطه رجل على رجل وخزرتني مدري ليش..
صبيحة_اكولج منا وغاد من تخلصين شغل البيت روحي لبيت جدج هم نظفي متكدر عمتج وحدها على البيت كله..
وعاد انتوا كاعدين ابيتي وبلاش على الاقل استفيد منج ..
رديت،، زين شمعنه بس اني هيج تتعاملين وياي قابل بس اني كاعده ابيتج
ردت،، انجبي حيوانه اني مو كتلج متجاوبيني بس الظاهر جلدج تعلم على الكتل بس من حسن حظج اليوم مازن موجود ومالي واهسج..
احلام _عادي حبيبه شنو يعجبج تسوين سوي عاد مو بس حاطتها اكل ونوم خلي تهز طولها
بهل اثناء نزل مازن من فوك وهنه بسرعه بدلن الموجه..
صبيحه _هلا يمه..
هلا بهل طول الحلوو اكيد جوعان العشه جاهز روح تعشه
مازن _اي والله جوعان عاشت ايدج يوم
صبيحه _بعد كلبي شعدي غيرك
هدى _حجبت بكلبي،،
شكد حقيره مصدكه روحها عبالك هيه الي مسويه العشه..
كمت من يمهم ثاني يوم كالعاده كعدت من الصبح انظف البيت واحط الغده على النار واطلع لبيت جدي..
تعلمت الطبخ من ماما حياة جنت دائما اروح يمها بالختلات واتعلم منها شنو تسوي اسوي مثلها واحلام فرحانه اسويلهم اكل طيب..
صح صايره جني خدامه انظف بالبيت بس فرحت لانو راح اشوف ماما حياة كل يوم..
طبيت لبيت جدي بيتهم مابي شي نظيف لانو دائما من يجن بنات عماتي واعمامي يكربون البيت وياهم بالتنظيف..
رحت يم جدو وبيبي وفرحانه لانو كلش احبهم وهمه يحبوني..
الحجية_هاا هدى اشوفج فرحانه
رديت بأبتسامه،، طبعا افرح اذا جايه يمكم واسولف وياكم شريد بعد..
الحجي_ههه يابه متجين كل يوم منو مانعج واحنه نكيف عليج..
مد ايده لجيبه وطلع منها فلوس..
هاج بابا هديه نجاحج اشتري بيها الي يعجبج
الحجيه _ وهايه مني مناسيه تره بس انتي ماكو ومابيه اتمشه لبيتكم يمه..
كمت بستهم،، يمه ارووح فدوه لاحلى جد وجده ههههه..
جدو وبيبي دائما وبكل مناسبه ينطوني فلوس ويكولولي اشتري بيها على ذوقج لو يجيبولي قطعه ذهب كلش حنينين عليه لانو يعرفون بأمي شنو ...
بس اني الفلوس اضمها يم ماما حياة لانو احلام تاخذ الفلوس الها من تشوف عدي فلوس لو قطعه ذهب تأخذها مني لهذا كمت اضم كل شي ينطوا اليه يم ماما حياة..
حياة_واني صار فتره داخيطلج فساتين طوال وعراض كبرتي بعد يا ماما مو مال تبقين على ملابسج القديمه ادري احلام وينها عنج..
تنهدت بقهر،، ليش هيه شايفتني من كاعي حته تنتبه عليه..
حياة وهيه تغير الموضوع،، لعد يمه اني وين رحت نسيتي اني مربيتج على أيدي وكل شي يخصج لازم اني انتبهه عليه مو يابه..؟؟
الحجي_اي بابا صح وانتي هدوشه لا تضوجين من امج لمن تشوفيها ماتهتم بيكم هاي بعد ملتهيه بالبيت وهوسته شسوي..
حجيت بكلبي،، ياشغل هذا جدو اشو البيت وذابته عليه والطبخ صرت اني اسوي واخواني اني ادرسهم شحال لو تعرفون حته ضرب تضربني بله رحمه ..
الحجيه_هاا بيبي شو صفنتي خوما احد مأذيج احجي واني اربيهم..
رديت،، ههه فدوه لعمرج بيبيتي الحلوه ماكو شي بس دافكر صدك البس بعد طويل وهم اتحجب من ولد عمي وعمتي..
حياه_اي ماما اني هم داكلج تتحجبين مو بس بالشارع وكدام ولد عمومتج احسن يمه
رديت،، اي هوه هم هيج..
كامت ماما حياة تخيط رحت يمها اباوع عليها شلون تفصل القماش وتصمم القطعه عجبتني الشغله وماما هم لاحظت اهتمامي وتركيزي وياها كامت تعلمني شنو تسوي واني صرت اجيب ورقه وقلم وارسم تصاميم صح مو مضبوطه كلش بس تطلع حلوه لانو اني رسمي حلوو..
وماما بدت تشجعني وتعلمني كل يوم من اجي يمها بدت أيدي تاخذ على التصميم واسوي شغلات حلوه وماما من تكمل خياطه تاخذ القطع لمحل يبيعهن هيه متفقه وياه يصير صديق جدو
كامت تاخذ تصاميمي للولد وصدك عجبته ويخيط عليها كلش فرحت وصرت اتعب على نفسي اكثر واكثر واطور نفسي عرفت اني طالعه صدك على امي حياة بكل شي وهاي الشغلة تخليني افتخر بنفسي ههه..
جنت اصمم وانطيها لابو المحل بدون مقابل لو أجره لانو غايتي بس اتعلم واشوف قبوله للرسمه ومرات ينطي كم ملاحظه على التصميم هذا كله امي تروح اني مجنت اروح وياها..
كضيت طول العطله هيجي اخلص شغلي أبيت عمتي واروح ركض يم بيت جدو اتعلم واساعد امي..
صح اتعب حيل بس تعودت وصارت حياتي هيج تمشي..
امي هيه هيه نفس حقدها وكرها اليه بس الاختلاف صارت متضربني هاي الفتره لانو صرت ما ناقش ابد وهم لانو مازن موجود تخاف تخرب صورتها الحلوه كدامه..
ظليت افكر بكلامه هوه جدي ابو امي مزوج ٥ مرات ٣ مطلهن و٢ بعدهن وياه.. بس بابا مستحيل يسوي مثله لانو يحبنه ومفد يوم راد بعد ولد..
شويه وسمعت صوت خالي اجه اخذ امي الظاهر وراح جريت نفس طلعت من يم ابويه صارت كبالي عمتي تخوزر بيه مين اتلكاها اني منج من امي ولو انتوا صايرات ربع طبعا تضوجين عليها..
صار اسبوع وامي أبيت أهلها محد جاب سيرتها وبابا اصلا محاول يرجعها راسنه بارد والله..اصلا محسينه بفرق لانو احنه البنات عماتي ربونه واخويه الصغير كله ويانه وشغل البيت كله عليه محد احتاجها بفتره غيابها..
لحد نهايه الأسبوع طبت هيه وعمتي صبيحة كلنه تفاجأنه بيها طلعت عمتي مرجعتها وكعدت تصالح بيهم وميصير يسوي هيج ومن هل حجي وهيه مقاصده  ولخاطر الجهال وهيج لحد مقبل بابا ترجع..
بس شرط عليها متتقرب وتأذينه وهم سالفه محسن تسدها واذا رجعت عادتها يذبها عد أهلها..
صراحه خفت كلش لانو المشكله كلها صارت من ورايه واكيد امي متفوتها اليه بس العجيب ظلت حبابه وياي..
اجه موسم المدارس وصارت امي تحضر لخواتي وسليم احسن الأغراض طبعا ماعدايه اني ممحسوبه ومستحيل اني اروح واطلب منها شي لانو ماتستاهل اتوسل بيها ..
رحت لبيت جدي العصريه ويه بابا واخواني جانت هناك عمتي جنان
وابنها الجبير محمد ومحسن العكره كيف من شافني اني مهتميت اله..
جانت زوجه محمد لبنى موجوده بس نفاخه روحها على مدري شنو همه اصلا العائله نصها حقنه بقت عليها..
هيه عمتي جنان عدها ٤ ولد وبنيه وحده فاطمه صديقتي وكلش احبها بس ماشوفها دائما حسب جياتها لبيت جدو فرحت من شفتها.. حجت عمتي
جنان _شلونج هدى امج شلونها؟؟
رديت بملل لانو جابت سيره احلام،، زينين عمه مشتاقين الكم تره
ردت بضحكة،، مشتاقه النه لو لفاطمه هههه..
تدرين يا عمه كل واحد ملتهي بروحه وبيته وهاي يادوب على الفرغات اجي اشوف اهلي
فاطمه _لج ضعفانه هدهد شنو فلمج ماعدكم اكل بالثلاجة ههه..
رديت بأستهزاء،، لا حبيبتي بس امي ومرات عمتي يمنعون عليه الاكل..
ردت بصدمه،، صدك عود؟؟
رديت،،  اشاقه بس هيج حبيت اسوي رجيم
ردت،، هاا خوش..
شوكت يصير عدج تلفون حته نحجي دائما
رديت،، بطرانه انتي منو يجيببلي تلفون دخلي يذكروني بنعال قديم عود بعدين الزم التلفون
فاطمه_ههه بس اذا تكولين لخالو ميردلج طلب
رديت،، اي ادري بس هم ماريد اكلفه..
شويه وكمت يم ماما حياة ساعدتها بالمطبخ وكملت اخذتني وياها بغرفتها..
شفتها طلعت جياسه من الكنتور وجابتهن يمي..
حجيت بحيره،، شنو هذني ماما..؟؟
ردت بفرح،، ملابس للمدرسه وجنطه وقرطاسيه جديده تعرفين مظل بس سبوع للدوام وادري بيج ممشتريه شي لهسه موو!!
غرغرت عيوني بالدموع وذبيت روحي بحضنها..
حجت،، ههه شبيج يا أمي اقل شي وتبجين صدك من كال عليج ضياء ام دميعه
رديت من بين دموعي،، شكرا ماما لانو دائما تذكريني اصلا ماعرف شسوي من دونج اني والله
ردت،، اشش شنو هذا الحجي غير امج اني وهسه تاخذين هذني الأغراض وتضميهن بكنتورج وتحضرين روحج للمدرسه حالج حال خواتج
هزيت راسي بفرح،، اخذتهن منها ورجعنه للبيت فرحانه بغراضي كبل طبيت ضميتهن حته امي مشوفهن كل شويه افتح الكنتور اباع عليهم واضحك كلش فرحانه بيهن لو بيدي اشبك الملابس وانام ههه..
ثاني يوم مثل روتيني اليومي اشتغل وانظف البيت من فوك ليجوه وبعدين اشوف شسوي اكل او بالاصح عمتي تحجي واني اطبق كلامها للعصر يلا افض البيت دخلت سبحت ستوني طالعه شفت امي بالغرفه ولازمه جياسه مال ملابسي الجديده كبل فتت ردت أخذها من ايدها مقبلت..
كامت تباع عليه بأستهزاء
احلام _عود ضامتهن عليه؟
رديت،، من ماما حياة هذني تره
ردت،، هاا وفرحانه بيهن موو تضمين الملابس حته ماشوفهن خوش..
رديت،، شعليج جيبيهن..
ردت اسحبهن مخلتني راحت ادور مدري شنو واني صافنه عليها شراح تسوي جابت المكص وكامت تكصكص بالملابس وتسويهم الف وصله تخبلت كمت اعيط..
لااا لااا هاااي لييش  ماما لاااا تسوين هيج عووفيهن شبيج انتي شبيييج..عليج الله ماما عووفيهن شبييج مسمعيييين.. كمت ابجي واضرب على وجهي اريد بس تعوفهن ماكو حته الدفاتر الجديده والاقلام كامت تشكهن وتكسر بيهم حسيتها ابد مو صاحية من سوت هيج..
مهتمت لا لدموعي ولا لصياحي بالعكس جانت تفرح من تشوفي محروك كلبي هيج اخير شي لزمت جنطه المدرسه وتريد تشكها تخبلت كمت بدون ماحس دفعتها بكل قوتي جان توكع بالكاع وينضرب راسها قوي بالحايط..
ماشوفج غير اسودنت عليه وراحت طلعت الحزام مال بابا واجت عليه بلعت ريكي بخوف..
لااا فدوه ماما موو هيج هاج اخذيها شكيها بس لا تضربيني والله يأذي..
احلام _اليوم اطلع بيج كتله ابوج اليه ودفعتج هاي اليه يا ××..
اما بابا صاير متعوب كلش يطلع من الصبح ويرجع لليل منلحك حته نشوفه كلش يتعب بس شنو يحصل رأسا يطير مابيها فلوسه اي بركة ماعرف ليش لهذا اني من اشوفه هيج مينطيني كلبي ازيد همه...
مره جنت كاعده بغرفتي اصمم دخل عليه مازن واصلا الباب جانت مفتوحه اني بس شفته طفرت حطيت الشال على راسي..
حجيت،، هاي ليش فتت هيج خرعتني!!
مازن _شمدريني راح تخترعين هيجي شو صايره تلبسين حجاب مني؟؟
رديت،، اي كبرت بعد مايصير..
رد،، هاا اي هيه مال كبرتي صدك كبرتي بحيث اول مشفتج معرفتج خرب بيج هههه
رديت،، ممم
رد،،  اكلج هاي شكاعد ترسمين..
رديت،، داصمم شوف رسمي شكد حلوو..
اجه كعد بصفي وميل راسه للرسمه
رد،، اي والله حلوو مين كاعد اجيبين هاي الإبداعات والجمال اخ
داجاوبه حسيت بي مد ايده عليه ولمسني من وره كبل كمت من مكاني خايفه،،
ه.. هاي.. ش.. شبيك مازن
رد،، شبيج انتي كمتي هيج شمسوي قابل اني مو جنه قبل نلعب سويه وعادي شبيج هسه بس طخيتج اخترعتي!
رديت بتردد،، بس احنه مجنه نلعب هيجي شنو تقشمرني بكلامك عود؟؟
رد بأستهزاء،، ليش هسه شمسوي اني قابل بس لا مصدكه بكلامهم مال انتي لمحسن؟؟
تره زعطوط هذا الله وكيلج كل شي متحصلين منه ههه
رديت بصدمه،، شنو هذا الحجي منو كلك عليه وشعليه بمحسن اني؟؟
رد،، امج سمعتها تحجي ويه عمتج جنان وتكلها هيج ولو هوه زعطوط بس امج الظاهر ملت منج بحيث تكلها هدى الج شوكت ميعجبج تعالي اخذيها ههه ادري شنو طماطه انتي وتبيعج هيج؟؟
وهذا الخبل محسن فرحان بنفسه وهوه بطول اصبع رجلي الصغير والله يا الله
ضليت صافنه على سوالف امي هيج مرخصتني وتنطيني لهذا وذاك نزلت دمعتي،،
تقدم عليه راح يحضني رجعت ليوره..
حجه،، هسه شكو بجيتي قابل صدك عود اخذج اني اذا تردين هههه ويمكن قبل عرسنه شدكولين ياحلوه
رديت،، هااي شبييك انته روح منك لأمي لمحسن ولي من خلقتي واطلع بره لا والله اكول لبابا عليك شكد صاير متستحي..
رد،، هينه هدى اذا مو اليوم باجر واذا مو باجر عكبه عادي شورانه..
.. بس طلع رحت وراه وقفلت الباب وضليت ابجي على حظي شبيهم ذوله وياي شمسويتلها هسه اني وتذبني على الزعطوط محسن مدري شصار بيه مجدر التفكير تخبلت..
لا لهنا وبس شنو لعبه اني وتلعب بيه كمت طلعت ركض لغرفه بابا جان متمدد ركضت ذييت روحي بحضنه وابجي..
ضياء _اسم الله شبيج بابا شصاير؟؟
رديت ببكاء،، بابا صدك انتوا راح تنطوني لعمتي جنان وكايلين اني لمحسن!!
عكد حاجبة،، ميلج بعد هذا الحجي بابا..
رديت،، من ماما
رد بغضب،، لا إله إلا الله..
حجيت بتوسل،، بابا فدوه لا تنطوني لمحسن
حجه بغضب،، لج شتحجين شنو هذا حته انطيج اله اوكفيلي لحضه..
لج احلام احلام ويينج..
احلام_هاا شكو..
جرها من شعرها،، لج كلبة شنو تخابرين اختي وتنطيها بتي شنوو وووين كاعدين احنه هااا
ردت،، ايي وخر ايدك لعد شنو مكعدها كبالي لا نفع ولا منفعه بس مصاريف زايده خلي نخلص منها حته احبل بلكت اجيب ولد لخ
رد بصياح،، لججج شكاعد تخربطين انتي شبيج تسودنتي هاي بنتي قطعه من كلبي انطيها هيج شبيه ماعدي لكمه اوكلها وثانيا سالفه الجهال كطنه وشيليها من اذنج بزونه وكل سنه تردين تخلفين طفل وتطلع بنيه وتذبيها على خواتي..
ردت،، معليك انته ماريد بناتك اريد ولد وهسه شكوو هلكد خايف على بنتج اول تالي مكانها يم الرجال لو مينطيك كلبك لانو تذكرك بحبيبت كلبك يالعاشك
.. ماحسينه غير هجم عليها بابا دك ضرب ملخها تملخ
،، لج ميلج هذا الخررط حقيره الله غاضب عليه من خلاج تصيرين مرتي..
ردت،، اي كول جذب اختك كلتلي خاف عبالك تنكر وادري بيك من زمان تحبها لهسه وفوكاها مسمي بنتك على اسم حبيبتك خوش والله...
وادري بيك مثل ابويه هسه تزوج عليه إذا ماجيبلك بعد ولد...
،، لج سكتي سكتي ظل يضرب بيها واني غصيت بالبجي كله من ورايه لو محاجيه احسلي اخير شي طبت عمتي تفاكك بيهم بس بابا طردها من البيت وكلها تروح لبيت أهلها وعمتي كامت تحجي عليه..
وهوه ظل مغلس عليها ظلت تحجي وحدها لحد ما طلعت وعافته..شافني على وكفتي تنهد وصاحني اجي يمه..
حجه،، لا تخافين بابا هاي امج عرمه ومو مال واحد يسكتلها..
حجيت بتردد،، بابا صدك كلامها لأمي من..
قاطعني
رد،، اي بابا صح بس السالفه من زمان علاقتي بيها استمرت ٨ سنوات بس مصارت القسمه وكل واحد راح  بطريقه بس جنت واعدها اسمي اول طفله اليه بأسمها وهيه تسمي اول ولد الها ضياء و هيج سميتج بأسمها هذا كل ما بالموضوع
رديت،، يعني هسه امي هيه تكرهني لانو اسمي على اسم هذيج المره
رد،، لا بابا ماكو ام تكره أطفالها بس هيه بعقلها عبالها اني مثل ابوها راح ازوج عليها اذا ماجابتلي الولد هيه متعرف انتوا البنات احلى شي صار عدي..
ركضت اطلع من الغرفه شفت عمتي صبيحة  لزمتني من ايدي ورجعتني للغرفه وهجمت عليه امي دك ضرب بالحزام عبالك تضرب حيوان مو بشر لا والله حته الحيوان يمكن تنقهر عليه من يتأوه جوه ايديها بس هيه لا بالعكس كل ما اصرخ تفرح اكثر وتزيد بالضرب..
والاحلى عمتي كاعده كبالنه لازمه جكارتها وتبتسم ادري شنو من بشر انتوا.. واخواني يخافون يتقربون لانو تكتلهم همه هم..
امي كطعت الحزام على ضهري بحيث الكاع صارت كلها دم اخير شي ضربتني بالحديده مال حزام شااغت روحي متت تخبلت كبل ركضت للباب وطلعت شارده بروحي بس اريد اخلص من الألم..
مادري شلون وصلت لباب الشارع فتحتها اركض بالشارع بله حجاب وحافيه وملابسي مشككه اسمعهم ورايه يصيحوني بس اني مصدكت اشرد منهم مستحيل ارجع الى يشوف شكلي يكول مخبله بقيت اركض ماعرف وين لحد مطلعت سياره بوجهي كلت هاهيه هاي نهايتي..
يتبع......