لم تكن امي(لبوة الاسد)

البارت السادس والعشرون

،، رواية لم تكن أمي،،
_البارت السادس والعشرون _
~~~~~
وما أنا إلا هوَ
وما هوَ إلا أنا
في اختلاف الصّوَر.
_محمود درويش
~~~
فاطمة_فجأه وجان احس بوجع مو طبيعي شل حركتي شل صرت ادفع بفارس حته يوكف بالشي الي ديسوي بس ماكو فاصل عن الدنيا ميدري بروحة شديسوي الألم ذبحني متت لحد مخلص وكام عني اني منتهيه باوعت الفرشة كلها دم وراسي افتر حيل.. 
بين الفاقده وبين الواعيه اسمع صوت فارس يكعد بيه ويضرب على خدي بديت ارجع لوعي واشوف روحي بحضن فارس شابكني قوي احسه على شوية ويبجي من الخوف والقلق عليه..
فارس _روحي بس جاوبيني شتحسين اخذج للمستشفى لو شسوي بس كوليلي يابة والله العظيم محسيت على روحي من اذيتج اصلا جنت حيل ضاغط على نفسي بس انتي جنتي هواي تتحركين شكد ماردت اهديج ماكو حبيبي والله اسف..
فاطمة _حطيت ايدي على شفايفة،،
خلص لا ضوج مابية شي ادري بيك مامتقصد تأذيني..
فارس _زين هسه شلون اخاف تبقين تنزفين ويصير بي شي والله اتخبل هسه..
فاطمة _ضحكت غصب عني بسبب شكلة..
كافي فدوه لعينك هسه اشوف روحي بس اهده واخذ نفس.. شلت روحي من حظنه جان لافني بالجرجف اول محاولت اكوم اجاني وجع مو طبيعي احس ضهري صاير نصين..
كمت اسب هدى بكلبي ادري مو كالت ماكو وجع وعادي شو ذبحني الوجع اني...
فارس _حبيبي خلي اساعدج لا تستحين مني اني وياج واحد وروح وحده أمني بيه..
فاطمة _بس وصلني للحمام واني اغسل..
فارس _اغسلج اني..
فاطمة _لا عفية والله استحي..
فارس _ضحك.. خوش تدللين
فاطمة _اخذني للحمام فتحلي المي كاسره وخلالي منشفة بالحمام..
فارس _اذا تحتاجين شي صيحيني بسرعة فهمتي.
فاطمة _فهمت..
غسلت بالمي الحار شلون مجان لانو الوجع جان ماخذ حيلي واكو دم شوية وبده يقل اخذت احتياطي خلصت سحبت المنشفة لفيت روحي بيها بس فتحت باب الحمام صار كبالي فارس وعلامات القلق مرسومة على وجهه..
بسرعة تقدم عليه وشالني حطني على الجرباية راد يبدلي مقبلت عاد هوه طلع بره واني لبست عسريع قبل ميرجع اجه وجايبلي حباية مسكن..
فارس _أمي خلتهن كالت اخاف تحتاجي اخذي منه بلكت تصيرين احسن..
فاطمة _اخذت من عدهن وفارس جاب المشط مشطلي شعري ولفه بالخاولي لانو مبلل بعدين سبحني بحضنة وتمدد..
فارس _ضايجة مني حبيبي..؟
فاطمة _شوية مو هواي
فارس _صدك والله..!!!
فاطمة _اشاقة وياك ادري بيك ممتقصد والدليل خوفك عليه بس حباب لا تفقد هيج مره لخ..
فارس _ماكدر اوعدج بس ان شاء الله خلي انام هسه تعبان كلش..
فاطمة _واني هم..
اخذتنة النومة لحد ثاني يوم الصبح كعدنه على صوت تلفونة يدك..
فارس _
هاا يمه..
الله يبارك بيج..
بعدني نايم..
ضروري يعني..
صار جاين..
فاطمة _جنت مفتحة نص عيني شفته ذب التلفون ونام عليه.. اخ يمعود كسرتني..
فارس _تره مذاب كل ثكلي عليج هاا.. يلا كومي اهلج جاوبوا الريوك وينتضروج..
فاطمة _بسرعة طفرت صدك غير تكول من البداية هيج..
فارس _والله احسدهم هيج تحبيهم
فاطمة _تقدمت بستة من خده هوه انته وأهلي أغلى شي عدي ومعزتك من معزتهم لو شدكول حبي..
فارس _والله يا حبيبتي اني اكول توخرين من يمي لا انوب اقفل عليج وابن ابو وأمة الي يطلعج من الغرفة..
فاطمة _ههه لا رايحة..
بسرعة غسلت شفت روحي همزين ماكو دم، لبست فستان مغربي ابيض وكله تطريز اشتريتة لصباحية عرسي خليت مكياج وكام فارس لبس دشداشة بيضة كملنة وطلعنة سوية..
اول مطبينة لبيت اهلة صارت أمي كبالي ركضته لحضنها ابوس بيها وابجي مدري شبيه و هيه تريدني بس اسكت واني قافلة..
جنان _كافي يمة صدك جذب مو هيج موتي روحج بالبجي هياني يمج اني معفتج بس نص يوم..
فاطمة _اشتاقيتلكم حيل..
جنان _ميخالف يمه بس مو هيج فشلة ولج من ام زلمتج حته مسلمتي عليهم..
ام فارس _لا حبيبة حقها وبعده الجو جديد عليها شوية شوية ان شاء الله تتعود..
فاطمة _فشلت من خبالي المفروض اسلم أصخم اني بالعكس كضيتها بواجي بحضن أمي.. كمت سلمت على أمة وخواتة ال٣ كلهم موجودات جانوا حبابين وياي..
بقت أمي تسولف وياي وتعلمني شلون اصرف وياهم واتعلم عليهم ومابقة عازلة روحي وسألتني على ليلة البارحة سكتت استحي من امي شسوي وهيه فهمت سكوتي كل شي تمام..
جنان _يلا صار لازم اروح  اني بعد ماوصيج يمة ديري بالج على زوجج واهلة و بيضي وجهنه دوم..
فاطمة _زين ابقى بعد شوية ماما..
جنان _ولج شبلاج جنج طفلة تأخرت اصلا ابوج كلي وصلي الأمانة وتعالي لا تبقين هواي عيب..
فاطمة _يا أمانة؟
شفتها فتحت جنطتها وطلعت منها تخم ذهب كامل ومبين غالي حته أغلى من ذهب نيشاني..
جنان _هذا هدية عرسج يمة من عدنه اني وابوج تلبسي بالعافية ان شاء الله..
فاطمة _كلش حلو ماما بس مو جنه غالي..
جنان _تستاهلين الأغلى بعد غير وحيدتنه انتي..
فاطمة _وصلت امي للباب وطلع فارس تلكاها سلم عليها شكد حاول يبقيها تتريك ويانة مقبلت عاد عافها على راحتها..
فارس _هاا حبيبي ارتاحيتي شوية بشوفة امج..
فاطمة _كلش هم شوف اهلي شجابولي..
فارس _الف عافية الله يحفظهم الج روحي لبيتنه ظمي زين..
فاطمة _ليش؟
فارس _مابيها ليش يعني هيج شغلات متنحط بأي مكان خاف تضيع لو شو يصير المهم ضميها ويه بقية ذهبج وتعالي نتريك..
فاطمة _هزيت راسي بمعنى اي..
رحت بسرعة ضميته ورجعت جانوا مادين السفره كعدت يم فارس وكلهم يسولفون عادي شوية وكامت تجي ناس تبارك فضليت ابيتهم للعصر يلا رجعت لبيتي جنت تعبانة كلش ودايخة كمل سبحت وطلبت بالفراش..
وره فتره حسيت على لمسات تتحرك على طول جسمي فتحت عيوني جان فارس نايم بصفي..
فارس _ماراح تكعدين..
فاطمة _حركت راسي بمعنى لاا..
فارس _تره اشتاقيتلج ..
فاطمة _داريد احجي ملحكت قاطعني ببوسة عميقة وصار يتقرب مني صح توجعت بس مو مثل وجع البارحة خلص واخذني لحضة..
فارس _شلون بيه مداشبع منج روحي واخاف ااذيج خرب..
فاطمة _ابتسمت.. على ساس مقصر هسه انته
فارس _خليني ساكت لا احجي شي ميعجبج..
فاطمة _ممم  زين ليش بعدني اتوجع مو يكولون ماكو وجع..
فارس _والله يا حبيبتي مره بعد مره والوجع يختفي واذا تردين اشرحلج اكثر اني حاضر..
فاطمة _لا شكرا ماريد..
مرت الايام بالبداية جانوا يجون ناس بس مو كلش هواي يعني ثلاث ايام وبعد خلصوا وفارس هم رجع يفتح المكتبة وللصدك مجان عاجبة يطلع الشغلة هسه بس اني اصريت عليه على شنو باقي العرس وخلص..
حياتي هادئه وياهم صح اسمي عازلة بس غدانة وعشانة يصير يمهم مرات اني اطبخ الي اعرفة جنت اريد اصير منهم وبيهم شكد ما اكدر أمة لفارس عايفتني على راحتي متكول لاا وخوات فارس وره يومين رجعن لبيوتهن بس بقت هند واخو فارس الصغير..
لاحظت عليهم محد اله دخل بأحد ونتجمع بس بفتره الاكل وبعدين كلمن بغرفتة.. يطلعون منها على كد يسون كم شغلة بالبيت ويرجعون بغرفهم..
جنت مرات احس بالملل لانو فارس من الصبح ومرات لليل يلا يعزل واني ابقة وحدي اروح يم اهلة كلمن حاير بروحة غريب أمرهم بس بعد كلمن وطبيعته المهم زينين وياية همه..
هدى _مهيمن من بعد كلام مازن ظل كالب الخلقة وينافخ لعد لو يدري بالشغلات الي سواها وياي مازن شراح يسوي مهيمن من يصير عصبي ميتفاهم شكد حاولت اهدي واكله عوفة يولي ميعرف شيحجي ظل مطنكر..
عود كيفت بالليل راح نطلع بس الظاهر اتكنسلت الطلعة لليل واكفه بالمطبخ داعزل بي لانو المطبخ بالليل عليه طب مهيمن باوعت عليه وحجة..
مهيمن _شو بعدج ممبدلة..؟
هدى _ليش ابدل..
مهيمن _مو اتفقنة نطلع لعد..
هدى _هاا مو شفتك ساكت كلت يمكن بطلت على الطلعة وهيج..
مهيمن _لا مبطلت اصلا ضايج امشي نطلع ونغير جو..
هدى _ركضت بسرعة بدلت ونزلت لكيتة ينتضرني بالسيارة محجة شي جان ساكت واني هم ظليت ساكته وكف يم محل حلويات واسكيمو..
مهيمن _يلا نزلي..
هدى _نزلت كعدنه وطلبنة كيك وكنافة وياها كهوه حلوه المكان هادئ حيل والجو حلوو صاير لحضات من الراحة لطيفة..
مهيمن _عجبج المكان..
هدى _اي والله كلش هم..
مهيمن _هذا مفتح جديد وكلت نجربة سويه..
هدى _ابتسمت..
مهيمن _هدى يمكن عاجبج نسافر ونغير جو حالج حال بقية البنات بس حاليا ماكدر اطلع خارج العراق لانو منتسب خلي اذا صار عدي فراغ اخذج لاربيل وهم فد يوم اخذج زيارة للأمام علي (عليه السلام) ونبقى كم يوم ابيتنه الي هناك
هدى _والله ميحتاج اصلا ماريد لا اسافر ولا شي مرتاحة هيج بس اذا صار عدك وكت خلي نروح نزور صار هواي مرايحة من يوم العقد..
مهيمن _تدللين..
هدى _بقينة كاعدين شوية ونسولف بشغلات عادية وراها افترينة بالسيارة يلا رجعنة للبيت..
جانوا الكل نايمين او كاعدين بغرفهم صعدت قبل مهيمن للغرفة طبيت سبحت وبدلت ملابس البيت رجعت للغرفة جان مهيمن متمدد وخال ايده على عيونة عبالك تعبان لو شي شاغل باله..
حسيت روحي عطشانة باوعت الثلاجة مالتنه مابيها ماي خلصان ومهيمن نايم عفته مكتلة نازلة جوه.. لبست حجابي وفوك ملابسي الروب دخلت للمطبخ صبيتلي مي وبعدين اخذ كم بطل مي اصعده للغرفة..
وكفت يم جام المطبخ حسيت اكو احد بره وعبالك الباب مفتوحة مو قفلناها احنه من رجعنه شنو السالفة تحركت باوعت منا منا لمحت خيال شخص واكف ركزت بي اكثر حسيته همام..
شنو معقولة هذا هوه وشديسوي بره بهذا الوكت مدري شنو الي دفعني انو اروح يمه فتحت الباب وحاولت اطلع صوت حته ينتبهه لوجودي وميفز مني هوه هم حس بأحد صار يمه التف عليه عاكت حاجبة..
همام_هاي انتي هدى شمطلعج بهل ساعة..!!
هدى _نزلت اشرب مي وانتبهت عليك بره شدسوي؟
همام _وانتي شعليج..
هدى _تفاجأت من طريقة حجية وياي هذا شبي همام صدك عود..
همام _اي تره ميخصكم وين اروح اجي اطب اطلع كرهتوني بنفسي هلكد متدخلون..
هدى _بس بس يعني مكلت شي اني بس داطمن عليك..
همام _ديلا اذا خلصتي الله وياج..
هدى _بقيت مصفوطة كدامة حزت بكلبي اسلوبة وياي دنكت راسي راجعة للبيت سمعته حجه..
همام _اشاقة وياج لا تبجين يمعوده مجوزين انتي اقل كلمة وباجية..
هدى _باوعت عليه شنو هذا هم شقة عود..
همام _محجيت شي غلط ماحب احد يدخل بيه وبعدين من حجيت هيج لانو حاسبج حسبة أخيتي فاطمة ودائما اشاقة وياكم شنو الجديد عليج..
هدى _مادري الظاهر اني نسيت..
همام _تدرين مصارتلي فرصة اكعد وياج بعد زواجكم انتي ومهيمن شلونج اهنا ان شاء الله مرتاحة ومهيمن اكيد ممقصر وياج لانو كلنه دنشوف هل شي لو شدكولين؟
هدى _لا مرتاحة الحمد لله..
همام _عساها دوم يلا اذا طبي اريد اقفل البيبان وانام..
هدى _اي.. اكول همام تذكرت شغله..
همام _خير شنو هيه؟
هدى _انته مو كتلي راح تخطب عن قريب شو لهسه مخطبت وحته مسمعتك سولفت بهل سالفة بعد..
همام _ابتسمت بحزن،،
كل شي بالقسمة والنصيب واثاريها الابنية مو من قسمتي..
هدى _هااا..
همام _امشي طبي عاد شكد تحجين صايره..
هدى _ماشي تصبح على خير..
همام _وانتي من اهل الخير..
هدى _طبيت قبلة اخذت المي وصعدت لغرفتي ذبيت الحجاب والروب تمددت وضهري على جهه مهيمن شوية وحسيت بي سحبني  ودارني عليه..حجة وهوه مغمض
مهيمن _لا تنطيني ضهرج ..
هدى _ادري مو نايم انته شكعدك..
مهيمن _احس بيج من تصيرين قريبة مني وين جنتي؟
هدى _اا جوه اشرب مي..
مهيمن _خوش نامي يلا..
هدى _ابد ممتعوده انام هيج عبالك متقيده بس لانو جنت نعسانة غفيت بسرعة.. كعدت ثاني يوم وحدي بالغرفة غسلت ونزلت جوه جانوا ديشربون جاي بالصالة صبحت عليهم ورحت جبتلي اني هم كوب واكلته ويه الكعك..ستوني كاعده وياهم حجت لبنى وياي..
لبنى _اكولج هدى شو البارحة شفتج واكفة بالحديقة ويه همام وحدكم خو ماكو شي لانو الوكت جان متأخر وهيج..
هدى _ثواني والانظار كلها صارت عليه حسسوني مسوية فد مكسوره..باوعت على مهيمن اشوف بنضراتة تسألني صح هل حجي لو لا
جنان _صدك كلام لبنى؟
هدى _هاا..
محمد _شنوو هاا سؤالها واضح شعدج ويه حماج بالحديقة بوكت متأخر وحدكم وينه عنج رجلج..
مهيمن _بحده،، محمد
محمد _شكو حجيت شي غلط تره مرتك غلطانة بتصرفها..
مهيمن _حتلو غلطانه آمنت بالله بس محد اله حق يحاسبها غيري خوش..
لبنى _اني من حجيت لانو اعرف بيها صغيره ومتعرف تصرف بس لهسه معرفنة شعدها ويه همام بالليل؟
هدى _ماكو شي والله بس سولفت وياه شوية..
لبنى _والسوالف متطلع بس بنص الليل موو..
جنان _هدى شوية انتبهي على تصرفاتج تره ماعدتي نفسج الابنية الصغيره الي تلعب ويه ولد عمتها وكل شي يجي ابالها تسوي هسه صرتي مزوجة ومسؤولة من رجال..
هدى _والله مو قصدي..
ام محمد _مصار شي بوية هدى واكيد الولد حسبة اخوتها وشوية شوية تتعلمين علينه وعلى الجو الجديد خوش يابة..
هدى _هزيت راسي بمعنى اي.. بس انهضمت من كلامهم حسيتهم يلمحون على شي عفتهم وكعدت بالمطبخ حطيت ايدي على خدي شوية وصار فوكاي مهيمن..
مهيمن _تعالي وراي للغرفة بساع..
هدى _خفت منه حسيته صار عصبي ادري قابل شمسوية جريمة خوما جريمة اوف صعدت وراه بسرعة فتت لكيته واكف يم الشباك من فتت انتبهه عليه..
مهيمن _كعدي..
هدى _اشرلي بوجهه على السرير رحته كعدت وهوه اجه كبالي وحجه..
مهيمن _ليش جذبتي عليه؟؟
هدى _رفعت راسي اله متفاجئة كل ظني يحجي على غير سالفة..جذبت بشنو جذبت!!
مهيمن _البارحة كتلج وين جنتي بالليل كتيلي اشرب مي وانتي بالأساس طالعة يم أخوية..
هدى _شنوو تشك بيه..
مهيمن _لججج ششك بيج ثوولة انتي قابل ماعرف اخوية شنو مااعرف مرتي شنوو اني ممانعج من شي صح الطريقة جانت خطأ بس انو توكفين تحجين ويه أخوية وترجعين اسألج يابة وين جنتي تجذبين عليه لييش  اني كل شي الا الجذب هدى..
هدى _ممو يعني حسيت مو ضروري تعرف عادي يعني..
مهيمن _الله عليج انتي تعرفين الي يجذب معناها عده شي لو ضام شي؟؟ تعرفين لو لاا جاوبيني..
هدى _مادري..
مهيمن _مسحت على وجهي.. منك الصبر ربي..منك الصبر
هدى _خلص فهمت مراح اعيدها بعد.. وين رايح مهيمن؟ مجاوبني خله وطلع يمكن راح يم صاحبة تحسرت من يوم الي فاطمة ازوجت وصرت كلش امل وحدي وماعندي.
شي التهي بي غير التصميم وهم مرات امل..
كمل اليوم عادي بس عمتي وجهه ثكيل عليه معرف حسيتهم مكبرين السالفة حيل الوكت تأخر ومهيمن مرجع ظل بالي عليه وفوكاها ماعدي جهاز حته اطمن عليه واستحي اطلب من عمه اخابره..
طلعت من غرفتي مليت كاعد بيها وحدي بس نزلت شفت مهيمن كاعد ويه اهلة شنو هاي لعد ليش مصعد واني عبالي بعده بره عفتة شسويلة رجعت للغرفة وطلعت مسلسل وكعدت اتفرج عليه وره نص ساعه تقريبا صعد للغرفة..
مهيمن _توقعتج نايمة..
هدى _لاا كاعده..
مهيمن _حضريلي جنطتي راح التحق باجر..
هدى _بسرعة باوعت عليه.. تلتحق؟ ليش شو مصارلك هواي من نزلت تره..
مهيمن _خابروني علمود اجي عدنه إنذار..
هدى _هاا وشكد تظل؟
مهيمن _حاليا ممبين بس على الاكثر مطول..
هدى _لعد واني شنو ليش تظل هلكد..
مهيمن _شعدي باقي على الاقل اهناك التهي بالشغل ماحب كعدت البيت..
هدى _كمت حضرت اله الجنطه على الساكت بس احس صار فراغ كلش جبير داخلي ماريده يروح اضوج وحدي هسه لو مرجعني للدوام جان التهيت ومصار عدي هلكد وكت فراغ كملت غراضة وكل شي يحتاجة خليته اله باوعت عليه يكلب بالتلفون.
شوية وذبه سد عيونة اني ظليت كاعده منمت لزمت القلم وصرت ارسم لحضات هدوء ورجعت اسمع الصوت الي كل مره بالليل اسمعة..
استغفر الله ادري بيها جني هاي الغرفة لو شنو.. ذبيت الي بأيدي وادنيت يم مهيمن حجيت بصوت ناصي..
مهيمن كاعد لو لا..
مهيمن _هاا..
هدى _عفية الغرفة بيها أصوات شو..
مهيمن _مداسمع شي اني..
هدى _اني داسمع واكثر من مره هم سمعت..
مهيمن _متوهمه..
هدى _اووف شلون يعني والله اخاف..
مهيمن _تعالي نامي بحضني وفضيها..
هدى _ماريد هوه انته اصلا صاير ثكيل وياي ومتحاجيني..
مهيمن _بكيفج..
هدى _اشو هذا نطاني ضهره ونام.. صرت احاول اشغل عقلي ومافكر بالصوت بس مشكلة رجعت سمعت عاد تدنيت على كيفي ونمت قريب منه
جان ضهره عليه صرت امشي اصبعي عليه بحركات اكتب اسمي ومره اسمه.. حسيت بي مثل الي تشنج.. فزيت  من إندار عليه بسرعة وحجه..
مهيمن _لا تسوين شي انتي مو كده واحنه متفقين
هدى _كلبت وجهي تره مقصدي انته مدري شبيك..
مهيمن _نامي وخلي انام عاد..
هدى _سكتت ونمت بعد فتره..
مرت الايام مهيمن التحق وحياتي هادئة لا جديد بيها مرات تصير مشاحنات بيني اني ولبنى بس احاول شكد ماكدر اتجنبها فطومة بين فتره وفتره تجينة على فرغات زوجها وجانت مرتاحة ومتشكي من شي..
مرت شهرين على زواجي ومهيمن وفه بوعده لدرجة اصبعي صار ميطخة صرت افتقده كلش واشتاق لحبة الي جان واضح من تصرفاتة كل مره من ينام اظل صافنة بوجهه شكد جنت اتمنى احضنه بس اتردد لانو اني الي طلبت منه البعد..
هوه صح ممقصر بشي وياي بس مبتعد عني واني صرت اضوج ماعرف مشاعري حب لو تعويد يعني لانو عودني على الاهتمام وهسه افتقدت هل شي.. اخاف تكون مشاعري مو حقيقيه مثل مشاعري تجاه همام فتره واختفت مجنت اعرف شريد بالضبط..
طبعاً طول هل فتره بس ثلاث مرات نزل من الواجب وراح ويكضيها اكثر شي بره البيت أمي حياة عزمتني عدها وخطية حايره شمسوية من اكلات بقيت عدها يوم كامل ورجعني مهيمن للبيت سألتني عن علاقتنا كتلها زينة وبس..
بيوم جنه كاعدين اني وعمة وحدنة ولبنى عد أهلها والولد بره جنت العب بتلفونها هيه صارت تنطي الي من تشوفني كاعده وساكته طبعا هيه ساعاتها براحاتها من تقره براسها لبنى تصير ثكيلة وياي بس من ماعدها شي تصرف عادي الله يهديها..
بهل أثناء طب من بره محمد سلم وكعد وره شوية حجة..
محمد _اكول يمه اني اريد ازوج..
جنان _شنوو صدك تحجي عود..؟؟
محمد _ليش اكو شقه بهيج موضوع..
جنان _لعد ومرتك شنو متارسة عينك..
محمد _اني مكلت هيج بس يا يمة اني زلمة وعدي احتياجاتي كبرت وأريدلي ولد يشيل اسمي شنو السالفة..
جنان _لعد مو دترحون للطبيب، فحوصات وعلاجات ماكو نتيجة؟
محمد _نسبة لبنى ضعيفة يمه شسوي خوما انتضرها طول العمر لو انتضر تصير فد معجزه ويصير عدي جاهل منها تهي بهي..
جنان _هاا وهيه شنو رأيها قابلة؟
محمد _قبلت او لا هذا الموجود..
جنان _جني احسك تريد تزوج وهيه متدري بيك..
محمد _باعي يوم  هيه اول تالي تعرف وتكلبها مناحة سوالف النسوان وتعرفها فخلي المناحة تصير وحده وره زوجي على الاقل اتونسلي بكم يوم قبل النكد مالتها..
جنان _والله مادري بكيفك شيعجبك سوي بس منو الي رايدها انته..
هدى _والله تفاجأت شلون عمة رأساً قبلت ومعترضت ولو هيه عدها محمد غير لانو ابنها الجبير وكل شي يريده تكله تم من سألته منو رايد سكت وراها حجه..
محمد _بعدين اكلج يمه من يجي وكته هسه دارتب شقة حته أحول بيها اني ونسواني منا لمن اخلص يصير خير..
هدى _عود ليش ميحجي منو هيه شنو سر هوه اوي خلي يولي وره يومين جانت فاطمة جايتنة على العشة واني مكيفة بيها لانو الملل صاير فول عدي..
فاطمة _تدرين اشتاقيت لغرفتي والكم اتمنى ابات فد يوم بس فارس ميقبل كاتلني يكلي لعد واني منو ينومني لو وين اروح وانتي مو بالبيت مخبلني..
هدى _ هسه مو زين حته ميباع على غيرج...
فاطمة _لا زين اهم شي هاي.. زين اكلج مهيمن أخوية شلون من يلتحق ويبقة هناك فتره طويلة
هدى _والله مادري..
فاطمة _يعني ميكلج مشتاقتلج وحجي الحبايب وكذا..
هدى _صفنت عليها.. تدرين انتي ماعدي تلفون حته يبقه يسولف وياي على راحته هوه بس يسأل عليه وشلونكم ويروح..
فاطمة _مغلوب على أمره أخوية المسكين حته ميلحك يشوفج زين هههه هوه شلونة شوكت ينزل..؟
هدى _ماعرف صار يومين ممخابر ماعدي اخباره..
فاطمة _الله على بروده اعصابج هاي اني اذا اصير بارده ويه فارس يضوج ومرات يزعل اكوم احير شلون ارضى..
هدى _شلون يعني هاي بعد كل واحد شكل خوما كلنة نفسي الشي..
فاطمة _هم صدك..
هدى _فرشنة السفره وبدينة بالاكل دك تلفون عمو عافة مشالة كال كدامنة نعمة ميصير..
بس ظل يدك اكثر من مره مادري ليش لزمني كلبي وخفت من هذا الاتصال حسيت اكو شي مو زين من وراه .. اخير شي ضاج عمو وفتحة وصار يحجي وياريته محجة..
ابو محمد _خيركم يابة خبصتوا الدنيا بالاتصالات؟؟
طفرر من مكانة.. شنوو لا اله الا الله
يتبع... 💔