لم تكن امي(لبوة الاسد)

البارت السادس والاربعون

،،لم تكن أمي(لبوة الأسد)،،
_البارت السادس والأربعون _
~~~~~~
أنا تلك الطفلة الي كبرت قبل ميعادها..
أنا تلك النسمة الي ظلمت وكسرت من قبل أمها..
أنا التي عاشت حياةً وضروفهاً كانت حتى اكبر من عمرها..
أنا التي كنت أخاف دوماً من شعور الفقدان والخسارة..
وعن اي خسارة تلك؟؟!!
خسارة الحبيب..
خسارة الاعزاز..
خسارة الوجود..
كلها الا خسارة الروح..
لاتقلق يا حبيبي لاني لو مت او احييت فأني سأظل واظل احبك واعشقك واتنفس انفاسك..
انته يا روحي لقد كنت لي كل شي كنت لي بادء الامر اخاً وبعدها أصبحت صديقاً واخيراً زوجاً وفياً محباً...
الكل حسدني عليك وانا ايظا احسد نفسي عليك انته قلبي ونبضي..
احبك وسأظل أحبك اليوم وغد وبعد غد الي اخر يوم في عمري..
#بقلمي _Zoza25 ~~~~
هدى _شكد الدنيا صغيرة وتافهه من تفاجأك بشغلات انته نفسك مجنت اصلا متوقعها او حاطها على بالك.. وين جنت البارحة طايره من الفرحة واخطط لحياتي الجديده ويه مهيمن والنونو وشنو راح اخيطلة وأجهزلة وشراح نسمي و وين صرت اليوم من سمعت كلمات هذا الدكتور احس الدنيا اسودت بعيني كل شي بثواني دقايق اختفى وصار بدالة ظلام..
ليش وشنو وشمعني بس اني يصير وياي هيج.. ليش بس اني اتعذب بحياتي لهل درجة.. ليش اني شفت وعشت كل هذا الظلم والعذاب..
زين بشنو غلطانة حته هيج كاعد اتعاقب معقولة لانو كارهه أمي الحقيقية وعايفتها من أشهر ما واصلة الها الله ديعاقبني هيج ويأخذ مني احلى الايام بعمري..؟
ماعرف شصارلي بهذني اللحضات احس نفسي طلعت عن الواقع ومبقت غير كل الأفكار السوده والسلبية متلبسة ذاكرتي بس بالرغم من كل شي ولا دمعة نزلت من عيني بقيت صامده وكأنوا شي عادي ومو مهم احتمال من الصدمة او كأنوا نفسي تعودت على هيج شغلات وصارت عدي عادي..
مخفت من الموت بكد مخفت على طفلي لا يصير عليه شي لو هوه هم يخسر حياته اختبار رب العالمين هل مره كلش صعب وأصعب من اي ضرف مريت بي عبالك جانت هاي المرحلة الاخيره من سابق عمري ومثل ميكولون بعد انتي وحظج لو اطلعين منها لو ترحين بيها..
لميت شتات نفسي طالعة من هاي العيادة والدكتور الي انسلبت منه الإنسانية متوجهةة للخارج لحد مصرت يم امي حياة..
حياة _بقلق..
شبيج يمه اشو لونج مخطوف شصار..؟
هدى _مادري من صدك مادري..
حياة _شنو الي متدري يا أمي شكلج الطبيب والله لو يقبلون جان طبيت وياج بس هذا الولد مقبل..
هدى _تعبانة اريد ارجع انام أمي..
حياة_زين مراح تكوليلي شطلع بيج..!!
هدى _اكلج بس مو هسه من نرجع فدوه..
حياة _شكلج حيل تعبان يمه تعالي استندي عليه حته نطلع..
هدى _وصلنه للسيارة ورجعنه عمو اسمعة يسألها عن وضعي وهيه تكله ان شاء الله ماكو شي بس تعب وضعف واني اغمض عيوني بقهر جانت الكلمات صعبة كلش عليه اجي اصارحهم بهل موضوع فتنة من يم بيت اهلي صارت عيوني على البيت..
حجيت بصعوبة.. عمو ممكن تنزلني يم بيت اهلي شوية ولو تعبتك وياي..
سيد يوسف_ سهلة عمو تدللين
حياة_شسوين عدهم يمه..؟
هدى _اسلم عليهم..
باوعتلي بأستغراب فاهمة اكو شي مو طبيعي من طريقة كلامي.. نزلنة عمو يم باب البيت وظل ينتضرنة لانو منتأخر كلش دكيت الباب مرتين متتالية دقيقة وفتحها النه سليم باوعت عليه وابتسمت..
وهوه كيف كبل ذب روحة بحضني.. شبكتة مبوسة خدودة وراها اجتني قمر سوت نفس الشي قمر اكبر من سليم بسنة وثنينهم مالهم اي أذية بالعكس روحهم طيبة مثل نقاوه قلبهم دخلت جوه سلمت على بابا الي فرح بجيتي للبيت شكد قبل جان يحاجيني اجي هنا بس مجنت ارضى..
من شفت عائلتي أيقنت وادركت انو كلمة اليتيم مو بس على الفاقد ابوه وأمة تنكال لا والله اني اهلي موجودين أمي ابوية بس وجودهم وعدمة نفس الشي مالهم دور ولا سلطة ولا أثر بحياتي بشكد مواقف جنت اتمنى بيها وجود ابوية سند وضهر اليه يدافعلي ميقبل على اذيتي بس للاسف مصار هذا الشي بس ماجذب واكول مجان حنين علينه ويخاف علينه ودوم يحاول يبقينة بالطريق الصحيح..
درت وجهي ادور عليها بعيوني رحت الها لكيتها كاعده منعزلة بغرفتها والشيب والضعف ماخذها كلش بقيت صافنة عليها لحضات هيه الام ليش تسوي هيج وتكرهه أطفالها هيج تقربت منها وكعدت كدامها باوعتلي بنضرات مابيها اي مشاعر..
احلام _كاعد تشمتين بيه اكيد بسبب وضعي هدى..
هدى _ابتسمت..
ليش اتشمت عبالج اني بله كلب لو احساس حته اسوي هيج وبمنو بالموت لا يا احلام مو اني الي احقد على بشر بهل صوره..
احلام _ احلام موو ولا عبالك الي كبالج امج..
هدى _كتيلي أمي..؟؟
ليش هيه الام هيته ياهيه الي اجت وصارت الجنة تحت اقدامها تعرفين شنو معنى كلمة ام..
الام هيه الي تضحي..
الي تربي..
الي تسهرر..
الي اتخاف..
الي تحب وتنطي كل شي من حنانها لاطفالها..
كوليلي انتي اي وحده من هذني قدمتيها اليه الله عليج!؟
إني اكلج شنو قدمتي اليه..
ضرب..
اهانة..
أذية..
طعن بالشرف..
كره مو طبيعي..
حقد لأبعد الحدود..
وين الام بالموضوع وينها اني جنت من اتمرض لو بابا يبقى على راسي لو محد واظل طول الليل اتكلب وحدي.. اني جنت اروح وارجع من المدرسة وامشي بالشارع وحدي حته بأول يوم اليه بالمدرسة جنت وحدي.. من عدي شي صعب لو مفاهمتة محد جان يساعدني لو يدرسني وهم لو بابا لو همام ومهيمن يقروني..
اذكر مره اجيتج وعدي امتحان ردت منج بس سؤال واحد تعلميني عليه انتي شسويتي بوكتها اخذتي كتابي وشمرتي بوجهي.. تدرين جم مره نمت واني الدمعة على خذي لو اصلا مجنت كادره انام بسبب وجع جسمي من وره ضربج انتي وصبيحة اليه.. زين تدرين كم مره بقيت بله اكل واباوع عليكم من تاكلون واني ممنوع عليه الاكل..
كوليلي اخاف اني عدوتج مو بنتج كوليلي انتي عدج كلب بين اضلاعج لو لا شسويتلج حته احصل كل هذا الكرة والحقد منج لو تحسبين عدد المرات الي كسرتي بيها خاطري جان مفكرتي بيوم تجين تكولين ليش ما اصيحج ماما..
كرهتيني لسبب تافهه ساعة تكرهين البنات ساعة اسمي على اسم حبيبه زوجج شهل أعذار تره اني بنتج من لحمج ودمج..
احلام _اني ماكرهج..
هدى _صحيح صحيح وكل هذني مجرد تعبرين بيها عن حبج النه تدرين اني كلش مشوقة اجرب شلون تكدر الام تكرهه ضناها لو تذبه على غيرها اريد اشوف معقولة اكدر اسوي هيج..
احلام _انتي حامل مو..
هدى _ايي بس والله بعده الطفل ابطني ورحي صارت بي لدرجة اني قررت انطي روحي وحياتي ولا اتنازل عن حياته لانو هذا قطعة من كلبي حتلو مراح اعيش وياه بس وجوده بداخلي يكبر هذا يكفيني..
احلام _شقصدج..
هدى _مو شي مهم بالنسبة الج..
احلام _ انتي حقدوه كلش لانو ماكو بنية هيج تحقد على امها...
هدى _احتمال هيج بس تدرين انتي مو أمي وبعمرج مصرتي ولا راح تصيرين امي ويمكن صدك اني حقوده بس اكيد اكتسبت هاي الصفة منج ومن عيشتي هناا..
احلام _مو بس انتي متأذية اني هم عانيت وتأذيت بعمرج تره..
هدى _اي ادري وبعدها عكستي اذيتج بيه اني رايحة وفرحي راح تخلصين مني للتالي..
احلام _هدى..
هدى _رجعت التفتت الها منتضره ردها...
احلام _لا تخلين الحقد والكره يعمي كلبج لانو بيومها راح تخسرين كل شي عدج وتظلين وحيده محد الج..
هدى _مجاوبتها عفتها وطلعت بسرعة بره شافتني أمي حياة الي جانت كاعده ويه بابا تسولف بعدها سلمت وطلعنه للبيت حسيت بتعب قوي يمكن لانو انقهرت وحركت بروحي من الداخل بس وصلنه حته محجيت ويه احد بسرعة صعدت للغرفة وتمددت..
حطيت ايدي على مكان الوجع وظليت اخذ النفس شوية شوية لحد مهديت وبديت استسلم للنعاس نمت نومة كلش عميقة عبالك منايمة من قبل لليل كعدت على صوت أمي تكعدني ومن مجاوبتها هيه صعدتلي تباولي بقلق..
حياة _ها ماما لهسه نايمة ظل بالي عليج..
هدى _اي نعسانة شو مو اني سامعة الحامل تنام هواية..
حياة _اي صحيح يمه جبتلج الاكل لانو اليوم ظالة على الريوك مايصير يلا اكلي كل الي بالصينية حته تحجيلي هواي شغلات كلبي ممرتاح الها..
هدى _تعبانة والله بس انطيني وكت ارتاح واسولفلج كل شي..
حياة _هاهية على راحتج ماما من جنتي نايمة دك عليه مهيمن راد يحجي وياج بس كتله نايمة من تكعد هيه تحاجيك..
هدى _اي..
حياة _انطيج جهازي تخابرين..
هدى _خليها بعدين..
حياة _بكيفج اني نازلة أكلي عود ماوصيج بعد..
هدى _هزيت راسي الها من دون ما احجي..
يومين واني كضيتها بالفراش بس انام صار عدي خمول بالجسم بحيث اكعد من النوم تعبانة ونعسانة وحته اكلي مو شي لانو معدتي من الحمل مجانت تتقبل كل الاكل لحد اليوم الثالث واني كالعاده غافية او بالاصح شبهه غافية حسيت على باب الغرفة انفتح وره شوية حسيت على ايد صارت تمسد على شعري وتبوسة عرفته من حركته وعطره..
مهيمن _هدى هدوشتي كومي يعمري اني اجيت..
هدى _فتحت عيوني بهدوء بقيت بمكاني وهوه هم استغرب لانو كل مره اكوم اتلكاه واشبكة بس هل مره كل شي اختلف..
مهيمن _شنو هدى مريضة شبيج كلبي خالة كلتلي رحتوا للطيب شكلج..؟
هدى _احبك..
مهيمن _ابتسم بأستغراب..
واني بعد احبج بس حاجيني بيج شي تحسين بوجع..
هدى _مهيمن أسألك سؤال..
مهيمن _سألي..
هدى _لو خيروك بيني وبين ابنك منو تختار بينه؟
مهيمن _وشنو مناسبة هذا السؤال هسه..
هدى _جاوبني يعني احتمال احد بينه يمو....
قاطعني..
مهيمن _شبيك هدى شنو هذا الحجي بعد احجيها من الاخير شكوو بيكم شي انتي والطفل هااا...؟؟؟
هدى _رفعت ايدي حاوطت وجهه بين ايدية..
أمانة الله وذمة بركبتك اذا متت لو صار عليه شي الطفل خلي امي حياة تربى الله يخل...
مهيمن _انتفض بعصبية..
كااافي شبيج اليوم شنو لزووم هذا الخرط لا لا انتي مستحيل تحجين هيج بله سبب احجيلي بسرعة قبل ما انفجر بهل دقيقة..
هدى _اني عدي..
مهيمن _شنوو عدج متنطقين عاااد..
هدى _عدي ضعف بالقلب..
حجيتها وغطيت وجهي بحزن على حالي وحالة لحضات من الصمت سادت المكان رفعت وجهي اله شفته صافن عليه وعلى نفس الوكفة بعده حته ولا رمش احس بصوت انفاسة السريعة توصل لحد اذني حط ايده على راسه فاركة بقوه ورجع حجة..
مهيمن _متأكده..؟
هدى _هزيت راسي مأكده كلامي..
مهيمن _كومي لبسي بسرعة..
هدى _مهيمن بس...
مهيمن _ولاا حرف بسرعة هدى دقيقتين اريدج جوه..
هدى _كمل كلامة وطلع بره لبست اي شي صار كدامي ونزلت مستسلمة لطلبة شريد اسوي قابل..
من نزلت جان ديخابر مدري منو بس شافني سده واترخص من امي حياة وهيه الثانية جان قلقها ميقل درجة عن قلق مهيمن..
بسرعة مشه اول مصعدت بالسيارة لا هوه حجة ولا اني الي حجيت وره مشوار الطريق وصلنه كدام مجمع مال أطباء خصوصي نزل واني نزلت امشي وراه صعدنه للطابق الثاني حاجة السكرتيره ورجع يمي اشرلي على المقعد حته اكعد عليه ربع ساعة وجان تصيح بأسمي حته ندخل على الطبيب..
جان هذا الطبيب يختلف جذرياً عن هذاك الي رحتلة هذا يبتسم بترحيب للمريض وكلامة كله هادئ وسلس طلب مني اشرحلة وضعي وشنو احس بالضبط سويت مثل مطلب وهم كتبلي على أشعة وايكو وتخطيط قلب سويناهن هنا بنفس العيادة لليل يلا طلعت كل النتائج مال تحاليل ورجعنة للطبيب بس جان عده مريض كعدنه ننتضر شوية اباع على مهيمن بعده حته بملابس الدوام مبدل ومبين بوجهة التعب..
متوتر ويهز برجلة كلساع يريد يدخن بس ميكدر بسبب قوانين المكان حجيت وياه.. مهيمن ليش جبتنة هنا مو كتلك وضعي شنو شلزومها وانته تعبان وتوك نازل..
مهيمن _اشش معليج بيه..
هدى _سكتت وره فترة رجعنه دخلنه للطبيب وقدمنة اله العلاجات والتحاليل قراهن بتأني ماخذ وقتة مهيمن متحمل الانتظار اكثر واردف بسؤال..
مهيمن _هاا دكتور شطلع عدك..؟؟
الدكتور_اخ مهيمن زوجتك عدها خفقان و ضعف بالقلب وهذا سبب الإرهاق الي يصيبها زائد ضيف عليها انو المرض مو جديد لا من فترة صاير عدها بس يمكن الأخت ممنتبهه لهل شي..
مهيمن _فرك وجهه بتعب..
زين هسه شلون شنو الحل بهيج حالة خوما بي اعراض جانبية..
الدكتور _ماكو مرض مابي اعراض جانبية ومرض القلب حساس بعض الشي بس ان شاء الله ماكو شي الأهم تبتعد عن التوتر والشد العصبي وراح اكتبلها على علاج تاخذه بأنتظام حته يساعدها على ممارسة حياتها بشكل طبيعي..
مهيمن _بس دكتور زوجتي حامل هذا الشي يأثر على صحتها..
الدكتور _ماكدر انطيك جواب مضبوط على سؤالك لانو حالة عن حالة تختلف الأفضل تراجع دكتورتها الخاصة بس يا اخوية لو منتبهين على مرضها قبل متسون طفل لانو هيج وضعها مهدد بالخطر ماريد اخوفك وارجع واكلك حالة عن حالة تختلف بس الأخت اول شي صغيره بالعمر ذات بنية ضعيفة وثانياً عدها قلب ومن فترة يعني مو تكول توه بادي والحمل يحتاجلة جهد وخصوصاً بوقت الولاده..
مهيمن _مو دكتور احنه اصلا مجنه ندري لو ندري شي اكيد ماخليها تصير حامل..
على عموم ماقصرت بس اريد توصفلي دكتوره نسائية مضبوطة ماريد اروح على ياهي الجانت..
الدكتور _ان شاء الله..
هدى _نطاه اسم دكتورة بمستشفى ال... أخذها متشكر منه خابر اخذ موعد اليوم ماكو مجال فصار الحجز على باجر والوكت اصلا تأخر عاد رجعنة للبيت دخلت عليهم جانوا ملتمين كلهم بالاستقبال سلمت عليهم اني وصعدت فوك مابية حيل اكعد واجامل مدعية الراحة والسعادة بدلت وتمددت على السرير ومهيمن اخذ ملابسة وراح يسبح..
مهيمن _هدى كومي تعشي..
هدى _فريت على صوتة الظاهر جنت غافية باوعت اكو صينية اكل بصفي..
مهيمن _لاصفنين أكلي وجهج ذبلان من قلة الاكل..
هدى _حطيت الصينية على جهه لزمته من ايده..
مهيمن ليش متباع بوجهي وحته عينك متحطها بعيني انته محمل روحك المسؤلية بشي مالك دخل بي هذا قدري ونصيبي ليش تعاقب روحك..
مهيمن _اكلي تره انتي و الطفل تحتاجون تغذية..
هدى _لزمت وجهه وخليت عيني بعينة..
كافي حبيبي أسدي ادري بيك مقهور عليه بس والله اني راضية بالشي الي كاتبة الي رب العالمين حتلو جان مو...
مهيمن _اشش لا تنطقين هاي الكلمة على لسانج نهائياً مامسموحلج تعوفيني اني اموت من دونج اضيع من دون حضنج روحي تطلع اذا راحت روحج دنيا انتي مابيها مالهاا طعم بالنسبة اليه تعبت هواية حته احصلج وامتلك كلبج مو بهل سهولة هسه تعوفيني..
المشكلة إذا صار عليكم شي انتي او الطفلة مستحيل اكدر اسامح نفسي اني خليتج تتحملين مسؤليات اكبر من عمرج ونفسج بدال ما هسه تدرسين وتكونين مستقبلج انتي مزوجة رجال وعيال وهسه حمل والضرب طلعتي مريضة واني ويني عنج..
هدى _احس بأيده ترجف وعيونه متروسة خوف سحبت راسة على صدري وحضنته بكل مابية من قوة احساس الذنب تملكة بس على شي ماله دخل بي..
حجيت.. تره حتلو عرفنه من وكت بسالفة مرضي مستحيل جنت راح اقبل اتنازل عن قطعة من روحي وكلبي..
سكتت لحضات واردفت بضحكة.. يمعود شكد شلعت كلبك وتعبتك من وراية مجزعت مني..
مهيمن _لوتنجبين مو احسن.. يمكن الجاي صعب بس يصير سهل اذا مضعفتي واستسلمتي لخاطري وخاطر طفلنة اتمسكي بالحياة لا تعوفينة..
الامل موجود بكل مكان وبكل ساعة ولحضة بس نصف العلاج والنجاه يعتمد على نفسية واراده المريض وانتي شفتي كلام الدكتور من حجة جان مطمن وكله امل..
هدى _ههه لعد لو شايف كلام الدكتور الي رحتلة يمكن جان تخبلت بنفس الدقيقه..
مهيمن _خلي يولي طايح الحظ شلون صار دكتور هذا من يحجي هيج غبي..
هدى _مهيمن تنيمني بحضنك نعست..
مهيمن _بله متسألين حضني وكلبي وروحي بس الج..
هدى _حطيت راسي على صدره استمع على دكات كلبة المضطربة ويه ايده الي تمشي على شعري بخفة ماسحة كل دمعة تنزل من عيني غمضت واني ماعرف مستقبلي ونهايتي شوكت وان كانت قريبة او بعيده..
ثاني يوم رحنه للدكتوره النسائية الي وصفها النه الدكتور وهم سوتلي كومة فحوصات..
الدكتورة _نسبة دمج ٧ وهاي وحدها من دون مرض القلب شغلة مو زينة يرادلج بطلين دم راح اكتبهم الج..
ماريد اخوفكم لو الومكم انو سويتوا طفل قبل متتعالج الام لانو الكلام حاليا ميفيد اول شي راح اكتبلها علاج يقوي بنية الجسم ويرفع نسبة الدم عدها بالإضافة للأغذية المحدده ضروري تلزم بيها حته تقوي روحها وان شاء الله اول مطب بشهرها تجيني حته نحدد موعد العملية مستحيل تكدر تولد طبيعي لانو الجهد الي يحتاجة راح يأذيها للنهاية العملية مو اقل منه بس نكدر نكول اهون..
مهيمن _دكتورة سوي اي شي وكتبيلها اي علاج حتلو غالي المهم ما اخسر مرتي طلبي اي شي واني حاضر المهم تطلع منها هيه والطفلة بسلامة..
الدكتورة _الله يحفظك الها بس هوه هذا العلاج احسن شي كتبتها واسفة يعني ماكدر انطيك نتيجة مضمونة بس ان شاء الله بالولادة اكون مشرفة عليها بنفسي والي اكدر عليه ماقصر بي..
مهيمن _رحمة الله والديج..
الدكتورة _سمعتك تكول طفلة بس زوجتك حامل بولد اخ مهيمن..
هدى _بأستغراب..
شلون حامل بولد قبل شهر سويت سونار وكلتلي بية بنيه دكتورة..
الدكتورة _احتمال عدها خلل بالجهاز او مجان واضح كلش بس هسه واضح واكيده ولد حيجيكم..
هدى _بقينة واحد يباع على الثاني ممصدكين شلون صار هيج طلعنه من يمها ورحنه للسيارة تلمست بطني وابتسمت..
سبحان الله يمكن بيها اراده عند رب العالمين انو أحمل بولد حته بعدين يسندك و..
مهيمن _قصدج يسندنة سوية هدى سوية..
هدى _مجاوبتة اكتفيت بالسكوت..
رجعنه للبيت ومهيمن بلغ اهلة بكل شي وحته بسالفة جنس الجنين الكل سكت حسيتهم ميردون يضعفون كدامي مادري.. لحد محجة عمو
ابو محمد _الله يكومج بالسلامة عمو ان شاء الله تطلعين منها وتحطين ابنج بحضنج تكبري وتكحلين عينج بشوفتة كل يوم لا تنقهرون تره الله ارحم الراحمين بعباده ويوم الي نعترض على أمره هذا اكبر غلط..
هدى _ابتسمت..
لا عمو راضية الف الحمد لله على كل حال..
مهيمن _ادعيلنة حجي..
ابو محمد _بله متوصي هاي بنيتي وانته ابني..
جنان _يمه بعد كعدي وسكتي بغرفتج منا لحد متولدين بسلامة لاتعبين نفسج بشي اهم شي صحتج..
فاطمة _اي هدى ارتاحي كلش زين حته ميتعب كلبج واني راح ادللج بالأكل كلش زينة حته يطلع ابن اخوية دبدوب ههه..
هدى _شكرا راح اتعبكم واشغل بالكم عليه هواي ..
حسيت على ايد عانقت ايدي جان مهيمن..
مهيمن _انتي بس ابقى زينة واحنه كل شي منريد منج.. كومي امشي وياي
هدى _وين..
مهيمن _نطلع بالحديقة نكعد بالمرجوحة مو تحبيها انتي..
هدى _ابتسمت..
اي صح..
مهيمن _ديلا لعد امشي نطلع..
هدى _حط ايده على جتفي ساندني عليه تمشينه للحديقة بهدوء كعد وخله راسي على رجلة نمت عليها حجيت بضحكة.. هاي شعجب نيمتني هيج متخاف احد من اهلك يشوفنة..
مهيمن _لا محد يهمني ومحد يباع عليج بنضره محلوه يعرفون مرجعج الي واتوقع تعرفين اقصد منو..
هدى _اممم..
مهيمن _هدى شتتمنين..
هدى _هواي شغلات اتمنى احققهم..
مهيمن _مثل شنو..؟
هدى _اول شي اكمل دراسة ثاني شي اعتمد على نفسي بشكل كلي وأريد أنجح بمجال التصميم ويصير عدي اسمي الخاص بيه وهم اكبر واني بين طفلي وزوجي..
مهيمن _زين تدرين اني امنيتي شنو..؟
هدى _لاا..
مهيمن _امنيتي هيه اشوفج محققة كل هذني الأحلام واني متأكد بيوم راح يصيرن واقع..
هدى _اخاف مالحك..
مهيمن _تلحكين وزيادة هم وداعتج رب العالمين مياخذج مني لانو يعرف بيه اني وابنة منكدر من دونج..
هدى _انته وامي حياة وهذا الطفل الي بين احشائي احب الأشخاص على كلبي اني والله عايشة بس لخاطركم وله بنية شافت كل هذا الضيم والاذية هم يصير بعد الها واهس بالحياة..
مهيمن _ انتي مـالتي وكُولش نَحس بـأشيائي خليج وياي وبية وعليه بعدين اني فرحان لانو بس اني احب الناس بكلبج عدا خالتي وابني اني اناني ورايدج بس اليه لهذا لا تسويها وترحين عني..
هدى _كل شي بيد الله..
مهيمن _وبيدنه هم كليبي..
سكت لحضات ورجع حجه.. تعالي اراويج شغله كلش قديمة بالحديقة..
هدى _شنو هيه وينها..؟؟
مهيمن _تعاي شوفي هاي الشجره كلش قديمة يمكن عمرها حته قبل ما اجي اني للدنيا فالحاصل من بديت احبج وخطبتج وانتي ما شاء الله تشوفين ابليس ومتشوفيني جنتي واني جنت اكول ميخالف هيه تحبني بس تكابر فبيوم الحنة مالتج من شفتج بهذاك الشكل استغفر الله كمت اكول لو مجاي اشرفلي من هاي الطركاعة أنوب من بستج اشتعلت اكثر بدال ما انطفي شسويتي بيه بيومها ااخ انوب واعدج ما اتقرب منج بالعرس شلون ورطة هاي..
هدى _ضحكت بصوت..
بله اني شعليه غير انته الي اختاريتني وتعرف بيه مو عاقلة..
مهيمن _شكو عليج انتي بيومها نمتي كبالي وتتحركين منا ومنا واني بس اباع ههه والله موقف المهم فبنفس اليوم بقيت بره بالحديقة افتر بيها حته نمت اذكر على المرجوحة مابية ارجع للغرفة وأشوف ملابسج بالغرفة كبالي والله سالفة فأخير شي تعبت من الوكفة انتجيت على الشجره وبشكل لا إرادي حفرت اسمج عليها وحفرت جوه اسمج كلمة لبوة لانو من صدك لبوة انتي ولا على بالج واني متخبل من وراج..
هدى _اووي شكد حلو يعني هذا الحفر ولو ممبين كلش عمره من يوم حنتي خلي احط اسمك هل مره اني حته على الاقل تصير الذكرى بيها لمسة من ايدي..
مهيمن _حفيريها بهاي الحديده..
هدى _هاي سويت وطوخت اسمي هم..
مهيمن _عاشت ايدج..
هدى _مهيمن..
مهيمن _عيونة..
هدى _اريد اروح لبغداد اجهز ملابس النونو مناك..
مهيمن _بغداد؟ عليمن يابه ليش هنا ماكو ملابس وبعدين تره مو زين عليج التعب والطريق..
هدى _فدوه مهيمن لا تبقي شي بكلبي اريد اروح مادام بعدني بيه حيل وهم اريد اروح للزوراء وللمول كلش نفسي هل شي ومن زمان..
مهيمن _حياتي اخاف عليج والله..
هدى _لا والله بالعكس راح افرح واتونس هيج لا تردلي طلب لخاطري..
مهيمن _طبعاً انتي تضربين على الوتر الحساس واني ما اتحمل هيج..
هدى _رمشت بعيوني اله..
مراح تبقيها بنفسي موو
مهيمن _ههه هدى ستري علينه مو حهجم عليج بالحديقة وبنص أهلي..
هدى _ههه تمام بس كلي وافقت لو لا..
مهيمن _اوافق بشرط تسمعين كلامي وتاكلين زين ومتعبين نفسج والأهم تلتزمين بالأدوية الي كتبتها الج الدكتورة..
هدى _غالي والطلب رخيص صاار..
مهيمن _خوش ان شاء الله بهل يومين ارتب وضعي حته نطلع..
هدى _ابتسمت..
انطب جوه بديت احس بالتعب مهيمن..
مهيمن _اي اي يلا كومي أخذني الواهس بالحجي..
هدى _فعلا بعد يومين انطلقنة لبغداد وحدنه الطريق جان زين متأخرنه لحد موصلنه حجزنة بفندق ارتاحينة بي وثاني يوم طلعنه للمول وبالتحديد قسم حديثي الولاده والأطفال جنت فرحانة كلش واني اجهزء أصغر تفاصيل يخص طفلي بحيث حتى تعبي ومرضى نسيته واني افتر بين المحلات لحد ما مهيمن كلي كافي خل نرجع وباجر نكمل..
سمعت كلامة ماريد ااذي بيه بقينة ابغداد تقريباً اربع ايام بأخير ليلة اخذني مهيمن للكاظم زرنة وتركنه بي امنياتنه بعض منها حزينة وبعض منها السعيده والصبح رجعنة لبابل بسلامة..
خلصت اجازه مهيمن وبالف يا علي يلا اقتنع انو يروح للدوام وميخاف عليه راح بعد ما وصى كل اهلة عليه وكل شوية يخابر عليه وبوكت العلاج هم يدك عليه يشوفني أخذته لو لا وحته بوكت الوجبات صار يتصل حته يطمن انو اكلت.. حسيت نفسي كلش داتعبه واقلقه عليه بس شبيدي قابل..
كل ما أتقدم بالاشهر صار التعب يبين عليه واذبل شوية شوية ومهيمن متخبل لانو الضعف واضح عليه كلش بحيث راجع اكثر من طبيب اختصاص علمود حالتي ينطي نفس الجواب هذا الشي عادي ومتوقع كلش..
وصلت اليوم بنهاية شهري ال٨ واني بطني صغيرونة وهم الضعف جان اله دور بهل شي جنت فوك نايمة وهمه جوه مليت من الغرفة نزلت على كيفي بالدرج قريب ما دا اوصل سمعت أصواتهم يسولفون بالاستقبال ذكروا اسمي بحديثهم..
همام _يابه اني البارحة حلمت بهدى حلم قلقني وخفت احجي كدام مهيمن لا يتعب بالزايد..
ابو محمد _خير ان شاء الله شحلمت..؟؟
همام _حلمت هدى اسم الله بس توفت بالولاده..
جنان _اسم الله هذا شلون حلم استغفر الله لو محاجي احسن..
ابو محمد _ان شاء الله خير اني كل يوم دانطي صدقة بأسمها للفقره الله يحفظها..
همام _والله مادري يابه بس والله من اشوفها شلون ضعفانه وتعبانه اكول شلون راح تجيب خطية الله يسهل عليها..
ابو محمد _خلي ثقتك برب العالمين وهوه يسهلها عليها..
جنان _هاي صوت سيارة مهيمن اكيد رجع سدوا الموضوع لتحجون بي بعد..
همام _هوه هم هيج..
هدى _نزلت كعدت على الدرج خليت ثنين ايدي على خدودي صافنة بكلامهم لحد ما اجه مهيمن..
مهيمن _شوو كاعده على الدرج شبيج حياتي تعبانة تحسين بوجع اخذج للمستشفى..
هدى _اهده مابية بس عجبني اكعد هنا لاتخاف حبيبي..
مهيمن _جر نفس براحة..
الحمد لله عبالي بيج شي ومحد داري بيج.. هدوشة خالتي باجر تجي وتريد تاخذج تزورين بكربلاء تكول ناذره أخذها هناك قبل الولاده وصارلها ساعة تنك على راسي واني ماكدر اخليج ترحين والله اظل على اعصابي
هدى _هوه الطريق كله نص ساعه وبعدين حباب لا تبقه هيج متوتر وقلق تره المكتوب هوه الي حيصير سواء اذا طلعتني لو حبستني بالبيت صدكني بالنهاية النتيجة وحده..
مهيمن _ادري بس ماكدر مو بيدي..
هدى _ديلا خلي نطلع الصبح للزيارة شو عجبني كلش اروح
مهيمن _لو محاجي احسلي راح تبقين تلحين وتلحين مو..
هدى _ههه اي بالضبط اخذني انته احسن ماروح ويه امي وعمو..
مهيمن _مو هيه تايهه..
هدى _حنروح موو..؟
مهيمن _افكر..
هدى _اي نروح اني اكلك وباجر هم..
مهيمن _رفع حاجبة..
واذا كتلج لا مترحين
هدى _متسويها لانو ماهون عليك..
مهيمن _ههه ولج اني كلت اخذ صغيره حته اربيها على أيدي تاليها انتي كاعد تمشيني على كيفج والله دنيا..
هدى _احبك غير..
مهيمن _اووف على كلمة احبك شكد تطلع حلوه من هل شفايف..
هدى _حط ايده على بطني متنهد..
مهيمن _شبيك يا بابا هيج مستعجل تجي مو هيج تعبت امك واذيتها..
هدى راح اخذكم بس والله هاي أخير مره بعد لو شمسوين مامشي وره حجيكم..
هدى _هيه اخير مره حياتي هاهيه..
مهيمن _سكتي وامشي صعدي حضري الي تحتاجي علمود باجر..
هدى _صار..
سويت مثل مكلي بعد مكملت شفت مهيمن غافي ابتسمت على شكلة طفيت الاضوية ورحت يمه فتحت ايده ونمت بحضنه وهوه حس عليه وسحبني اكثر عليه بحيث بطني طخت بي ههه احسه من حضنته مثل الخايف لا اعوفة مثل ما اني هم ماريد اعوفة..
ثاني يوم طلعنة لكربلاء وامي حياة ويانة وصلنه للأمام هوه راح لجهه الرياجيل واحنه من جهه النسوان امشي وامي كايدتني ولا عافت ايدي وتمشيني على كيفها وصلنه لضريح الأمام العباس (عليه السلام) أمي حاجت وحده من هذني الي يشتغلن بالأمام حته تسويلي مكان أكدر أزور عاد هيه خطية مقصرت سوتلي مكان من جهه الزاوية وامي وكفت من الجهه الخ حته محد يدفع بيه..
بس وصلت للشباك واني اتأمل المكان ورهبتة سرت رجفه بجسمي ونزلت دموعي بسرعة اول مره ابجي هيج واطلع حزني وخوفي وقهري من مصيري الضايع..
كمشت الشباك ودعيت هناك من كل كلبي ودموعي مستمره بالنزول.. يا أبا الفضل اني يتيمتك اني ضعيفتك تعبت هواي بدنيتي وتأذيت وخايفة اخسر حياتي وانحرم من شوفة طفلي دخيلك يا أبا الفضل لا تردني خايبة انخيك بستر زينب اذا جنت غلطانة بحق أمي احلام وعاقة الها اخذ عمري وعاقبني انحرم من طفلي يا الله انته ادري بحالتي وكل شي عشته وشفته لا تخلي الظلم يستمر للنهاية انصفني يا الله سلمتك و وكلت أمري الك على أمل جبير انك ما ترد عبدك المسكين..
حياة _اشش يا أمي كافي راح يوكف كلبج من البجي يلا يا ماما تعالي نكعد حته ترتاحين والله بس يشوفج مهيمن هيج ياكل راسي..
هدى _مابية شي ماما بالعكس ارتاحيت..
حياة _هاج شربي مي واقري الزيارة بين ما صلي يمه..
هدى _سويت مثل مكلتلي كملت وبقت عيوني على مناره الأمام ودموعي تتوسلة يرحمني ويرحم بحالي لحد مكملت أمي وطلعنه لمهيمن الي عرف من تعابير وجهي جنت دابجي حط ايده على راسي..
مهيمن _الله يتقبل الزيارة عمري..
هدى _الله يتقبل منا ومنكم صالح الأعمال..
مهيمن _تتغدون لو نرجع بالبيت ناكل..
حياة _لا خلي نرجع احس..
مهيمن _على راحتكم..
هدى _رجعنه للبيت واني بده يبين بيه التعب بحيث ذبيت روحي بالنوم من الضهر لليل على فرد نومة كعدت مسطوره نزلت جوه لكيت مهيمن كاعد بالاستقبال رحت كعدت بصفة حطيت راسي على جتفه..
مهيمن _صح النوم كلبي ارتاحيتي زين..؟
هدى _اممم.. مهيمن
مهيمن _كولي..
هدى _مشتهية جبس ونوتيلا ونمبر وان..
باس راسي بحب
مهيمن _وبعد..؟
هدى _بس هيج..
شفتة وخرني من يمه وكام طلع مطول عشر دقايق ورجع جايبلي كلهم وزياده هم
مهيمن _لاشبعين روحج كلش تره وراج عشة..
هدى _ماشي..
توني اكل حسيت على لوية صارت ابطني عفت الاكل ورحت للحمام حسيت على شوية مي وكع عليه خفت وبلعت بريكي مستحيل اجيب هسه واني اصلا بعدني مطابة بالتاسع غلست ورجعت كعدت يمهم جانوا توهم حاطين العشة..
كلهم كعدوا أكلوا بس اني مكدرت من وره بطني كلساع تجيني لوية وتوجعني عفت الاكل وكمت.. صاح مهيمن..
مهيمن _وين بعدج مماكلة..؟؟؟
هدى _مالي نفس حصعد بغرفتي..
ابو محمد _بأبتسامة..
شنو هاي اول تالي بنيتي متحجي واسولف ويانه وتظل هيج ساكتة..
هدى _مو اريد تاخذون عني انطباع حلو قبل ماموت..
مهيمن _ااانجبي شنوو هل حجيي هااا..
هدى _اشاقة شبيك..
مجاوبني خله وطلع من البيت واني هم صعدت لغرفتي لزمت ملابس الطفل بين أيدي وبجيت ضجت من نفسي لانو قهرت مهيمن بس ماعرف شبيه ابشع شعور داحس بي كل مديقترب موعد ولادتي والكل خايف عليه يا الله ساعدني والله تعبت طاقتي خلصت من هذا العذاب..
يتبع