لم تكن امي(لبوة الاسد)

البارت الخامس والاربعون

،،لم تكن أمي(لبوة الأسد)،،
_البارت الخامس والأربعون _
~~~~~
منو ايلمني كبل لا اضيع يم وجهك
اعاين على وجوه الناس محد بيهم يشبهك
~~~~~
هدى _حاطة ايدي على بطني والابتسامة شاكة حلكي ياربي معقولة راح اصير ام معقولة بداخلي اكو روح صغيره راح تنور حياتي عن قريب يا الله مجرد معرفت بحملي واني كلبي احسة راح يطلع من مكانة هلكد مفرحانة من هسه كلش حبيت هاي البذره الي بداخلي..
الله لا يحرم احد من هذا الشعور بالرغم مجنه فاتحين موضوع الطفل وعايفي شوكت ما يصير خلي يصير بس ماعرف شلون اللهفة ترست كلبي راح اجرب شعور الامومة متأكده راح يفرح مهيمن مثل فرحي ويمكن أكثر..
صارلنه سنتين وعمة اكلت كلبنه الصراحة ليش مدنسوي طفل واخاف بينه شي ومهيمن جان كل مره يكلها ماريد طفل بالوكت الحالي بعدنه صغار بس عمة جانت تنقهر وحقها يعني ولدها الكبار ثنينهم ماعدهم أطفال ماكو ام ماتتمنى اشوف احفادها..
بعدني كاعده بمكان الانتظار بين متكمل غدير اجت ام وبيدها طفل بعده توه رضيع كعدت بصفي باوعت عليه بحب شلون ناعم و ترف كزكزت عليه وبنفس الوكت حزت بكلبي معقولة هيج كائنات صغيرونة أمهاتهم متحبهم لو تذبهم شنو من كلب عدهم مادري..
غدير _خلصت هدى..
هدى _هاا اي شلونة وضعج تمام ان شاء الله..
غدير _اي الحمد لله كل شي زين وانتي شكالتلج الدكتورة خوما بيج شي..؟؟
هدى _ابتسمت..
طلعت حامل غدير تصدكين..
غدير _يااا صلوات الف الحمد لله شلون خبر يجنن هذا الف مبروك يعمري انتي ان شاء الله تكومين بالسلامة انتي والنونو والله فرحتلج اكثر من فرحتي لنفسي..
هدى _ههه يا عمري فدوه لكلبج..
غدير _اكيد كتبتلج الدكتورة مقويات ومن هل سوالف امشي نشتريهم ونطلع لهمام توه رمشلي معناها اجه..
هدى _تمام..
طلعنه اشترينة المطلوب منه وصعدنة ويه همام الي اول مكعدت غدير ظل يباوع عليه بحب وابتسامة خفيفة مرسومة على شفايفة..
همام _شلونها مريتي و بنيتي..؟
غدير _غضيت شفتي اله لانو هدى كاعده ويانة لينزل على الترابي..
زينين ابو بنتي شنو رأيك نخلي نضرك ليكدام ونتوكل للبيت..
همام _ضحك..
تدللين حبي... احم تدللين ام بنتي..
هدى _هههه عادي يابة اعتبرني مموجوده اخذ راحتك..
همام _هوه ناسيج غير تحجين تكولين حته نحس بيج ههه..
غدير _تدري اكو فرد جديد راح يجي للعائلة..
همام _اي غير بنتنة..
غدير _لاا غيرها هدى حامل..
همام _صددك على الخير يابه هدى هذا الحجي الزين..
هدى _احمر وجهي وخجلت من السالفة خصوصا اذا اول حمل عبالك مسوية شي عيب ولو هوه صدك عيب ههه..
جاوبتة بخجل.. خير الي يصبك همام..
همام _والله وكت هدى الزقجة تصير ام صعب استوعب هل صدمة ههههه..
غدير _ايي همام كافي تحجي هيج..
همام _اشاقة وياها شبيج والله حيره احجي وياج متقبلين احجي ويه هدى متقبلين ادري شدوس هسه..
غدير _دوس بانزين حياتي..
هدى _والله همام هوه وغدير سينما بحد ذاتهن تذكرت من جنت معجبة بهمام وعود احبة وماريد اخو صخام شهل ذكريات السوده..
مشوار الطريق ورجعنة للبيت طبعا اول موصلنة همام كال للكل على خبر حملي جنت اتمنى يكون مهيمن اول واحد يعرف بهل خبر بس مجان موجود شفت الفرحة بعيون الكل وعمو عيونة دمعت بوكتها فعلا حسيت هاي الروح الكل جان منتضرها ومتمنيها..
لليل احنه كاعدين كلنه بالهول نتعلل جان يطب علينه مهيمن من بره شايل جنطة على ضهره نازل من الدوام المفروض باجر ينزل بس فاجأنة برجعتة اليوم سلم على الكل عادي وكعد يرتاح بينه واني ظلت عيني عليه ومبتسمة بحيث انتبهه عليه هلكد ممركزه بي واشرلي من بعيد بمعنى شكوو..
همام _ترره بعد ماكدر اتحمل اريد ااحجي خووية تره مرتك حامل وراح تصير اب عن قريب..
وطفر عليه حاضنة..
ابو محمد _ولا يكبر هل ولد لك دثكل شوية بعده أخوك توه كاعد خلي مرتة تكله مو انته على العموم مبروك بوية مهيمن..
هدى _يحجون ومهيمن ميجاوبهم ظل صافن وعيونة متشخصة بالتحديد عليه وراها وخر همام من حضنه وكدام الكل سحبني من ايدي وحضني قوي بايس راسي..
استحيت من الولد هاي اول مره يسوي هيج شكد جان كدام اهله فد ثكيل بس اليوم تغير كل شي..
شابكني ويردد بسرعة..
مهيمن _الف الحمد لله... الف الحمد لله
همام _يمعودين موو هيج تره كاعدين بنصكم احنه صدك جذب ههههه..
هدى _الكل ضحك على تصرف مهيمن العفوي وهوه هم حس على روحة وابتسم بهدوء الهم..
مهيمن _الله يبارك بيكم تسلمون..
ابو محمد _الله يسعدكم يابه ونشوف جهال جهالكم..
جنان _الله يتمم على خير ودووم تسمعونه هيج اخبار حلوه..
فاطمة _الف مبروك الكم خوية الله يديمها عليكم..
مهيمن _ان شاء الله..
اني اترخص اصعد أرتاح تدرون توني جاي من الدوام هدى صعديلي كوب الجاي فوك..
هدى _هزيت راسي اله بمعنى اي..
صعد واني لحكتة بكوب الجاي اول مفتت بسرعة اخذ مني كوب الجاي خلاه على الميز باوعلي وحجة بهدوء..
مهيمن _شلون هيج..
هدى _استغربت كلامة..
شنو هوه الشلون هيج شتقصد؟؟
مهيمن _اقصد انتي مو اخذتي مانع حمل متوقعت تصيرين حامل بهل فترة لانو نسبه المانع تصورت تأخر الحمل لفترة..
هدى _ابتسمت..
مو هوه اني ضربت ابره مانع بس وحده واول مصارت هذيج المشاكل وبعد ما ضربت البقية لهذا اكيد راح مفعولها ويه وكتها..
ضحك ورجع حضني وخر شالي من راسي فتح شعري شام بركبتي
مهيمن _اول شي مشتاقلج كلش وثاني شي احلى خبر بحياتي هذا متتصورين فرحتي بيكم شنوو هسه بودي اصيح بعلوو صوتي احببج شوفي كلبي شلون ديدك سريع من الفرحة ههه اصلا ماعرف شسوي والاحلى دافكر يجي ابنة من اطلع اشتري جبس ونساتل اله لازم اشتري لأمه هم لانو هيه هم بنتي..
هدى _بس مهيمن خايفة لا..
مهيمن _لاتكملين اعرف حدكولين شلون حدبرها طفل واني كل شي ماعرف وتوني اريد اكمل دراسة حقج تخافين بس صدكيني اني حكون وياج بكل شي وبكل خطوه راح اسندج..
هدى _يعني راح تقبل حتلو صار عدي طفل امتحن واكمل..
احتضن وجهي بين أيدي
مهيمن _طبعا اقبل واني يهمني اشوفج واصلة وماخذه شهاتج صح تركتي بس جانت ضروف بوكتها اما هسه ماكو شي يمنع تكملين وتحققين طموحج واني بضهـرج..
هدى _احبك مهيمن..
مهيمن _ههه واني أكثر تعالي شوية احجيلج شغلة..
هدى _هاا لاا عيني خليها الك..
مهيمن _اني بهيج مواقف افضل الأفعال على الكلام لانو انتن النسوان متجن الا هيج..
هدى _داطفر بس بسرعة اخذني بين احضانة ورحنة سوية لعالمنة الخاص عالم مابي غير أسد عاشق ولبوة هايمة بأسدها..
ثاني يوم الصبح الولد يطلعون وحته عمو يطلع مرات مهيمن خابر على عمه كلها متسوي غده راح يجيب من بره مندي خابرت اهلي بشرتهم بخبر حملي وهذاك البيت ماعرف عنه اي شي ولا عدي نص خبر عنه ماجذب واكول مامقهوره ليش اني حياتي هيج لا ام بيها حظ ولا خوات وحته ابوية ملتهي عني بين فتره وفتره يخابر يطمن عليه يعني مرات صدك احس ماعدي بهل دنيا غير مهيمن يمكن الله دزه نعمة اليه ولا اضيع واصير مكفخة بهذاك البيت..
جنت كاعده بالهول  امسح الأخشاب اجت كعدت كبالي غدير ضايجة..
غدير _شوكت تخلص هاي السنة الدراسية مو والله طلعت روحي واني منا حامل كوه جارعة روحي خرب..
هدى _ههه هانت مظل شي تره..
غدير _لج تعبت وصايره كلش ثكيلة وهم كل شوية والكة روحي نايمة على الملازم شلون حنجح الله اعلم..
هدى _والله تهون وتصير سوالف بعدين..
غدير _الله كريم..
هدى _ستوني داكوم اروح للطبخ جان يطبون من بره محمد وبنية وياه بقيت ارمش كدامهم منو شنو ماعرف..
محمد _حتظلين صافنة بوجهنه هيج وخري خلي نكعد..
يمه وينج تعالي جيت اني..
جنان _ياا عززه سويتها صدك واجيت هسه ابوك بس يشوفك يحجي عليه شلون بيك..
محمد _يمه شبيج جايج خطار اني وجنتج الجديده هيج تحجين وبعدين اني ممطول على كد اعرفج على مرتي ورايح لتخافين منبقة..
جنان _مادري والله شكلك..
ام صگر _مرحباً عمة..
جنان _هاا هلا بيج تفضلي ليش واكفة..
ام صگر_مشكوره..
هدى _اني وغدير وحده صافنة بوجهه الخ صافنين عليهم الصراحة هيه حلوه طول وجسم وعيونها خضر ولبس كشخة ومتروسة ذهب بس شكلها جامد شوية ونزلت فاطمة من فوك وهم اخذتلها نصيب من الصدمة بقت تباع بالوجوه لحد مصاحها محمد..
محمد _شبيكم ياهوه الي يجي ويصفن علينه مشايفين تعالي فاطمة سلمي على مرت اخوج..
فاطمة _هاا هلوو بيج حبي نورتينة..
ام صگر_يا هلا بس فدوه اني مابوس مو ضوجين..
فاطمة _لا عادي..
هدى _رحنه جبنه الضيافة قدمناها الهم وكعدنه ثلاثتنة وحده بصف الخ..
جنان _تفضلي يمه...
ام صگر_ لا عمة السموحة بس ماكدر اكل كيك لانو سعراتة الحرارية هواي واني ملتزمة بدايت ماكدر اخربة..
جنان _هاا منو هذا دايت شنو تحجين مدري شلون...
محمد _رجيم يوم..
جنان _غمه اي والله هاي الجانت ناقصة..
ام صگر_نعم وياي..
جنان _لا حبيبة..
شو تعال اكعد بصفي ادري انته شبيك مهيلك على النسوان مين جايب هاي الجامده وبعدين مو على ساس تزوجت علمود الخلفة شو ماكو لهسه شي شسالفه  اخوتك كلهم حيصير عدهم أطفال الا انته الجبير عود مدكلي ليش وهذنيج شعجب ساكتات..
محمد _مديصير الجاهل يمه وبعدين خلي اتونس شوية لاحك على الطفل وهذنيج والله شكلج جواهر رجعت لبيت أهلها هجرتها ولبنى بقت بالبيت واني وأم صگر بغير شقة ماريد يتعاركون..
جنان _الله يصخم وجهك ان شاء الله مثل مصخمت وجهي كدام اخوية وعمك وبعدين شبيك هلكد دايخ عليها شو كلها على بعضها وحده توصوص..
محمد_تعجبني يمه هسه شكو عليكم..
جنان _دمشي روح لبيتكم لايجي ابوك ويفشلك كدام مرتك..
محمد _رايح رايح..
ام صگر_فرصة سعيده عمة..
جنان _اي شوية شدي حيلج وجيبيلنه صگر كافي مياعة..
محمد _احم احم ههه هاا يمه وكت شقة..
جنان _مداشاقة صدك لو سموج ام صگر طلعتي خوش صاگره الولد..
هدى _بس طلعوا خربنة ضحك عليهم وعمة كلبت وجهه معاجبها الوضع بقت تحجي على محمد لحد مكالت بس والي فهمناه بعدين محمد هاجر جواهر وطالب من لبنى تعوفة بس هذيج مجلبه بي فبقت بالشقة هيج..
جانت الطرمة وصخة همام غاسل سيارتة بيها الصبح وصايره طيانة رادت غدير تغسلها بس مقبلت خطية هيه منا صايره ثكيله وبالكوه اجر النفس كتلها اني اغسلها فتحت المي وبديت اغسل بيها من الحركة وجانت الشمس شوية قوية ذبيت حجابي علكتة بالشباك مال المطبخ وكملت..
واني ماخذني الواهس انشف بالمي وصافنة ماحس غير انفتحت باب الشارع و طبوا مهيمن وهمام ومحسن جان مهيمن اول واحد  صرت كدامة بسرعة مشة يمي ضم راسي بصدره..
مهيمن _ويين صاافنين ياابة امشوا طلعوا بره خلي اطب وراها طبوا انتوا..
همام _هههه عيني محد باوع هوه لحكنه قابل نعرف منو بحضنك..
مهيمن _ديلا فضوني وانته محسن الاحسن تغمض..
هدى _همست..
شبيك مهيمن مو لهل درجة كدامهم تحجي هيج..
مهيمن _انتي سكتي حياتي حسابج بعدين..
هسه اغمض افتح اريد الكاج مختفية من كدامي يلا بسااع..
هدى _وخرني من حضنه بسرعة ركضت صعدت فوك اسمعة يسب ويلعن من وراية يكول..
مهيمن _بت الاوادم موو حامل على كيفج هيه هيج..
هدى _اندارية عليه نطيتة بوسة بالهوى اضحك عليه وعلى شكلة شلون يعضلي شفته متحلفلي وصلت للغرفة الهث من الركض شوية وانفتحت الباب دخل مهيمن..
مهيمن _دخلي اشوف هاي ياهية الي تضحك وتبوسني بالهوى ونازعة حجابها بالطرمة..
هدى _ههه لا مهيمن اشاقة وياك..
بس وين يفيد ويه مهيمن الحجي وعاقبني على طريقتة الخاصة بحيث حته كدام البنات استحي اذب الشال..
٠٠٠
غدير _مرت الايام والاشهر وحملي يوم بعد يوم يصعب ويثكل التعب مو طبيعي تحسين روحج اشثكلج خلصت السنة الدراسة وبالكوات كوات جنت اقره ونجحت من الثالث للرابع طبعا طلع بية بنوتة وجهزتلها كل شي تحتاجة من وكت حته اخلص حطيت كاروكها بصف السرير مالتنة وهمام يمشي وراية ويكلي راح تاخذج مني هل زعطوطة وأريد تعويضات تره يخرب ضحك..
دخلت بشهري لو دخلت بأنذار وكل شوية تجيني لوية اكول راح اجيب وننخبص نروح للمستشفى وتطلع مجرد تقلصات ونرجع للبيت..
كعدت اليوم الصبح هم اوجاع تروح وتجي كلت هاي اكيد مثل كل مره تقلصات مدري شنو لليل واني هاي الاوجاع تجي وتروح لحد مادانام نص الليل فزيت على وجع مو طبيعي وضرب على ضهري هم واحس رجلية رطبات اخترعت بسرعة هزيت همام من ايده اكعده..
همام ولك همام الحكلي جني راح اجيب يمعود همام مو احجي ويااك..
همام _هاا حبيبي شبيج..
غدير _ولك هماااام وجعع قووي كوووم..
همام _حبيبي هاي تقلصات مثل كل مره لا تخافين كل شي ماكو..
غدير _هماااام دخييلك كووم مداتحمل اكثرر..
همام _هسه متوازية اجيبين بنص الليل حبي اجليها شوية للفجر على الاقل..
غدير _يحجي هوه ونايم واني الوجع لعب بيه طوبة اخير شي صرخت بألم من اجتني لوية قوية..
لكممم يممه راح ااجيب همااام حموووت كووم عاااد..
بسرعة طفرر من الجرباية مخترع..
همام _ها ها حبيبي شبيج تعيطين هيج ولج صدك حجيبين..
غدير _حموووت اريد اامي اااخ..
شفته ركض بره صاح عمة والبنات كلهم بخمس دقايق التموا فوك راسي وحده تلبسني وحده اطلع جنطة الطفلة وهمام حضر السيارة واني كلها بجهه و الوجع الي داحس بي بجهه ثانية بسرعة نزولني جوه صعدوني بالسيارة واني على نفس العياط والوجع..
همام _لكم سكتوها عااد مو انفضحنة فوكاها بنص الليل وماكو احد..
جنان _يمه قابل بيدها هوه غير وجع الطلوكة هيج..
همام _يووم مداعرف اسوق رحمه للأموات شوفيلج صوره حل..
غدير _لييش تحجي عليه تعال جرررب الووجع عود بعدين ااحجي اااخ يمه..
فاطمة _تحملي غدير انتي قوية مظل شي..
غدير _لحد موصلنه للمستشفى ودخلوني غرفة الولاده اني منتهيه والله وجع كااافر ياخذ كل الحيل والله بالساعة يمكن يلا نورت بنتي وحبيبتي دنيتي اسمع صوتها تبجي بس مابيه طاقة أخذها لحضني واحاجيهم شوية شوية وصارت عيوني تثكل
نمت فترة من الزمن كعدت بتعب حسيت على شخص باس راسي باوعت همام هذا ابتسملي بحب مغلف بالفرح..
همام _الف الحمد لله على سلامتج غديري وسلامة صغيرونتة هم..
جنان _كرت عينكم يمه بالطفلة تتربى بعزكم يارب..
فاطمة _الله يحفظها الكم اخوية ومرت اخوية الحلوه..
همام _ضحك..
تسلمون
غدير _حجيت بتعب..
شلونها؟؟
همام _كلش زينة لا تخافين وضعكم ثنينكم تمام بس والله هاي الطفلة مبينة من هسه وكحةة بحيث عندت عندت تاليها مقبلت تطلع الا بنص الليل..
غدير _ضحكت..
ابوها منوو..!؟
همام _هاا هيج صرنه..
غدير _بهل أثناء دخلت الممرضة من بره وكدامها عربانة خاصة للأطفال
الممرضة_اذا كعدت الام خلي ترضعها لانو جوعانة الطفلة..
جنان _اي خالة جيبيها هسه ترضعها امها..
غدير _سندت نفسي حطوها بين ايدية دمعت عيني شكد ناعمة وترفة يا الله احلى زرق هذا ساعدتني الممرضة وعلمتني شلون ارضعها بعد كم محاولة يله اخذت صدري شعور يجنن بحيث اقشعر جسمي على احساسة وره فترة صغيره نامت بحضني ضليت صافنة عليها ومبتسمة..
همام _والله عيني وجان يجي الي ياخذ مكاني..
غدير _هاا..
همام _صارلي ساعة واكف يمج وانتي ولا معبرتني..
غدير _ههه سويتها صدك عود وتغار من بنتك اني الي اعرفة الرجال يغار من ابنة مو بنتة..
همام_والله اني اغار من جميع الأجناس ولد بنية جبير صغير حته من امج اغار انوب تردين من غدير الصغيره ما اغار..
غدير _عكت حاجبي مستغربة..
غدير الصغيره منوو..؟؟
همام _اسم بنتة غدير الصغيره بينة وبالجنسية بس غدير..
غدير _يعني سميت الطفلة على اسمي؟ معقولة همام زين ليش شعجب..؟؟
لزم ايدي باسها بحب وحجة بعيون تلمع..
همام_حته اسمج وذكرج وين ماروح ميفارقني ويصيحوني ابو غدير وين اكو احلى من هيج أسم بله..
غدير _سحبت ايده بستها..
احبك ياروحي وعمري وسندي انته لو تعرف كمية الفرحة الي صارت بداخلي بعد كلامك هذا الله يحفظكم اليه انته وبنتنة وماشوف بيكم مكروه..
همام_ و يحفظج اليه شمعة داري وعشقي ام غديري..
سد عين التحبهآ وگلهآ آحبچ حيل
تلگه عيونهآ من الچلمه تتكحل
٠٠٠٠٠
هدى _نورت حياتنة غدير الصغيره وضافت النه جو جديد بالبيت اول حفيده النه واكيد تختلف ههه بعد الولاده راحت غدير لبيت أهلها اتوقع تظل للاربعين وهم حته تتعلم على الطفلة لانو متكدر وحدها..
اني دخلت بالشهر بالشهر الرابع وبدت بطني تبرز شوية مو هواي مهيمن مثل ما كال وصدك ميفارقني وبكل شي صار يساعدني ويلبي طلباته من دون ميرجع اليه هل مره واذا جوعان ميكومني اصبله هوه يروح يصب لنفسه وحته بتعزيل غرفتنة صار يساعدني من غير مفد يوم يرجع للبيت اذا مو بأيده علاكة جبيره مال حلوات و الفواكة..
طبعا فحصت وطلع بية هم بنوتة بس شنو هل مره عمة ضاجت انو تريد ولد ليش كلنه بنات عاد قابل هسه الشغلة بأيدي شسويلها..
فاطمة سجلها مهيمن بمعهد مال دورات خصوصي للسادس تروح وتجي كل يوم وهم شوية تطلع من البيت تخطلط بالناس حته بلكي عسا ولعل تنسى سوية ومتبقة زارعة روحها بغرفتها...
بعد ما عبرت الشهر الرابع بدت تصير عدي اعراض صحية قلقتني شي غريب نفسي يضيق على ساعة كلبي اذا اتعب لو اصير عصبية كلش يأذيني بشكل مو طبيعي خفقان قوي ومرات صدري احسة ثكيل من غير اقل جهد بسرعة اتعب لو اخرب..
مجنت اكول لاحد على هذني الأعراض لانو بالبداية جنت اشوفهم عادي مو فد شي بس من تطورت الحالة كمت اخاف لو الطفل بي شي قررت اروح للطبيب واستفسر عن وضعي بيومها جنت عد أمي حياة ومهيمن ملتحق بالدوام كتلها لماما اريد اروح للطبيب اجيك وضعي وهيه هم مكالت لاا بدلنه واخذنة عمو السيد عيادة صحية جان أقرب شي علينه..
اخذت رقم على دكتور عام وره فترة من الانتظار وصلني السره دخلت وحدي وبديت اشرح اله الأعراض الي احس بيها خلصت جان يحولني على دكتور قلبية بنفس العيادة وهم نفس الشي حجيتلة وضعي والأعراض الي عدي كتبلي على ايكو وتخطيط قلب..
كملت اخذت النتيجة ورجعت للدكتور قدمت اله التحليل أخذه مني وقراه بدون اهتمام وملل.. اكو دكتور الي تحسي يهتم بوضع المريض ويحجي وياه بأسلوب راقي حته يطمن المريض وينطي حافز إيجابي واكو الي يسود كل الدنيا بوجهج من كلمة وحده..
واجاني جواب الطبيب عن حالتي..
الطبيب.. هسه الي فهمتة انتي حامل وطلع عدي بالتحاليل عدج خفقان وضعف بالقلب من الدرجات المتقدمة والي داشوفة وضعج سيء ..
هدى _حجيت بصدمة وخوف..
يعني شنو دكتور..؟
الطبيب_المعنى المن جايتني هسه وانتي وضعج ماله علاج وهم حامل يعني ما اخفي عليج الي مثل حالتج بالولادة تموتين وتخسرين حياتج لو جاية من البداية جان اسقطة الجنين بس هسه منكدر نسوي شي..
هدى _يعني حموت..؟؟
ينطيك گلبك ننتهيّ
وبَس بألأحلآم تشوفنيّ
💔💔💔💔💔💔
يتبع في البارت القادم.....
#باجر نهاية