لم تكن امي(لبوة الاسد)

البارت الثامن

،، رواية لم تكن أمي،،
_البارت الثامن
.........................
كلّ الليالي السود
تسقط ..
في أغانينا ضحية
والضوء يشرب
ليل أحزاني و سجني !
فتعال ، ما زالت لقصتنا بقية ..
#محمود  درويش
.........................
هدى _اهتزت الصينيه  و وكعت كلها من ايدي بالكاع على صدمه الكلام الي داسمعه زواج؟ مهيمن؟
ااني ومهيمن الي طول عمري اشوفه اخ وصديق اليه لا ياربي شنو كاعد يصير..
صبيحة_ لج هاي شسويتي تدرين هذني المواعين ابيش جايبتهن ولج غاليات هذني خرب بعقلج وين باالج هاا لو من فرحتج بالزواج طيحتي الأول والتالي بنات آخر وك...
مهيمن _كاااافي خالتي هنه شنو قيمتهن هسه هذني وخبصتي الدنيا اجيبلج غيرهن عود بس لا تبجين على راسنه..
باوع على هدى وحجه،،
هدى خوما تأذيتي حاجيني بيج شي؟؟
هدى _باوعت عليه وبصعوبه حجيت لا مابيه شي..
مشيت من يمه بخطوات بطيئه لحد من الصدمه غوشت عيوني وصارت ظلمه الدنيا وماذكر شصار بعدين..
بعد فتره ماعرف شكد حسيت على ايد تضرب على خذي وملابسي ركطبه من المي الي ذابي عليه فكيت عيني بثكل شفت روحي بحضن أمي حياة
حياة _شصار عليج يا أمي وهيج هبط الضغط عدج وينج وين الضغط صدك جذب
هدى _لزمت راسي بتعب دقايق ورجعت استوعبت الي صار باوعت على امي بشك..
ماما انتي شلون وشعجب اجيتي بهذا الوكت علينه؟؟
حياة_والله يا ماما مهيمن دز عليه واسترخص من السيد اجي يمج من شافج فقدتي ويدري محد يهتم بيج هنا..
هدى _هزيت راسي نزلت دمعتي على خدي.. ماما اكيد عرفتي بالي صار قبل شويه موو؟؟
ردت،، اي حبيبتي دريت
رديت،، شوو تحجيها عادي شنو يعني شراح يصير بيه هسه..؟
ردت،، اي حبيبتي لانو هيه عادي وين تلكين مثل مهيمن بطيبته وشهامته وثكله ودائما من صغرج يدور على مصلحتج ويخاف عليج طلعيلي واحد من ولد عمج لو عمتج مثله..
رديت،، تمام صح حجيج بس هوه اخ جان اليه واذا على الزواج.. ماما تره اني صغيره والله ويني وين الزواج هاا تره كلامج مو مقنع ادري بي مهيمن خوش انسان بس شعليه اني وبعدين هوه مو جان خاطب جواهر ويحبها شو حول عليه
ردت،، منو كلج يحبها هيه عمتج جنان خطبتها اله تره وبعدين متفاهموا وكلمن راح بطريق وين الغلط بالموضوع..
رديت،، ماما مهيمن تعرفين شكد عمره واني شكد عمري تره فرق بينه ١٢ سنه بالضبط
ردت،،شبيك هدى ليش مكبرتها هواي بنات يزوجن اكبر منهن المهم هوه الاختيار الصح مو العمر وهل سوالف هسه اني مو فرق بيني وبين السيد ١٩ سنه بس الحمد لله مرتاحين..
رديت،، ماما فدوه الله يخليج ماريد ماريد حرام عليكم تغصبوني على شي ماريده واكلج مهيمن كل عمري اشوفه اخ وهوه جان هيج شلون تردين اتقبله زوج اليه
ردت،، كافي امي على كيفج وين نفسج خلاص مامقتنعه نعوف سالفه نكلهم الابنيه صغيره ومتريد هسه اصلا محد نطه كلمه..
رديت،، صدك تحجين  فدوه خوما تجذبين عليه
ردت،، انزول عليج اني أجذب تالي عمري داكلك هذا الي صار
رديت،، مو قصدي والله بس الموضوع صدمني وخفت يجبروني عليه
ردت،، لا يمه على شنو نجبرج ولو كلبي مقابل عليج مو مهيمن الي يرفض بس  يمكن بعدين تصيرين قسمته
بقت ماما تحجي وتمدح بمهيمن بس اني جان كل فكري وتفكيري بهمام احس روحي احبه او ممكن بس إعجاب شلون افكر بالزواج من اخو واني عقلي يم غير شخص..
حته الله ميقبلها تحسرت ياريت لو همام هوه الي خاطبني جان كبل وافقت عليه حته اخلص من جحيم وعذاب حياتي يم أحلام وعمتي صبيحة ومن تحرشات مازن وعينه القذره عليه ومنو يكول كل مره راح انقذ روحي منه..؟؟
يمكن كل حياتي تتغير واعيش احلى حياة وياه ويم فاطمة.. شسوي هسه اني احس بهمام من اهتمامه بيه هم يبادلني الشعور بس اذا صدك يبادلني شعجب قبل بأخوه يتقدملي اووف ياربي شلون سالفه هاي..
فكرت هواي بعدين وصلت انو احاجي همام ماعدي غير هذا الحل بلكت ارتاح..
٠٠٠٠٠
فاطمة_كاعده اتراسل ويه فارس مثل العاده جنت داقره كيمية ومكاعد افهم الموضوع ومره من جنهه نسولف كلي هوه جان كلش شاطر بالكيمية  فهوه اقترح عليه ادزله اسم الموضوع والسؤال وهوه يدزه شلون ينحل على شكل فديو صوره وصوت..
لهذا صرت ادزله السؤال وانتضر يدزلي صوته كلمه اقره وعشر كلمات اصفن بصوته الي كله جديه واني كمت اتحجج حته يشرحلي ويدز صوته..
وهوه خطيه ميكول لا بالرغم يرجع تعبان من المكتبه وفتره صاروا طلاب يجوه للبيت يدرسهم خصوصي بس كلهن ميتعدون ال٤ طلاب من المنطقه وشويه ساعدته هاي الشغله بالمصاريف..
مازال حزنه على والده بكل مره يحجيلي لو موقف اله ويه ابوه لو طلعه الهم سويه لو سالفه حاولت اخفف عنه بالي اكدر عليه بس لحد هاي اللحضه منطقت بالكلمة الي هوه يتمنى يسمعها مني..
اليوم جان يحجي بثكل احسه ويجاوب على كد السؤال سألته بحيره..
شبيك فارس صاير شي احسك ضايج؟؟
رد،، اي ضايج بس مو شي مهم لا تفكرين بيها..
رديت،، لا والله مادام حجيت هيج معناها صدك اكو شي مهم احجي بداعتي فدوه فدوه
رد،، لا تحجين هيج بمياعه ولج تسمطين ابويه بكبره جم مره كتلج مجوزين
رديت،، ههه دحجي عاد
رد،،تحسر.. فاطمه مليت من وضعنه هذا واني اتختل حته اخابرج لو اعرف اخبارج وفوكاها ماريد تبقين تحجين وياي بدون علم اهلج بله على ساعه واحد دخل عليج وسمعج تحجين وياي..
مخايف على نفسي اني لانو اظل زلمه بس انتي بنية وسمعه الابنية مثل الكزاز اذا تنكسر ماتصلح بعدين..
رديت بغباء،، يعني قصدك راح تعوفني؟؟
رد،، حبيبي انتوا شنو اكو بعقلج!!
رديت،،شنوو
رد،، لجج احبج احبج يابنت الناس اكلج اريدج واحبج تكولين اعوفج شبيج فاطمة صدك هيج تفكرين بيه
رديت،، يا ابن الناس مو اول مره ادخل بعلاقه اني شعرفني شيحجون وشيصير بعدين..
رد،، هههه لج اذا على حجيج هذا كل البنات لازم يسون اكثر من علاقه حته يعرفن شيحجن موو
رديت،، هسه راح تلزمها عليه خلي نرجع للموضوع هسه شتريد تسوي انته..
رد،، لج بابا رايدج حلالي وام بيتي واطفالي رايدج تبقين كدامي بكل ايامي واكضي بقية عمري وياج بس انتي..
رديت،، هاا بابا اكلك فارس يعني صدك راح تطلبني من اهلي؟؟
رد،، لعد قابل جذب وكاعد العب دعابل وياج ليش احسج لهسه ممصدكه بيه
رديت،، لا مو شغله ممصدكه بيك بس اخاف اخطى خطوه واندم عليها اخاف حييل والله وحته انته ستوك كلتها الابنيه سمعتها مثل الكزاز..
جر نفس وحجه،، ياريت يجي اليوم الي  يلمنه بيت واحد بس تصيرين صف سادس اعدادي راح اطلبج من اهلج وهم تمر فتره على وفاه ابوي ادعيلي فاطمة تصيرين حلالي وقسمتي
ابتسمت حجيت بهمس،، أن شاء الله..
بعدنه دنحجي سمعت صوت اهلي عالي جوه سديته منه ونزلت جوه وفرحت بكلامهم الي كاعد يدور
محمد _لك أسد هاي سوايه تسويها تروح تخطب هاي الصغيره شوفلك بنيه بعمرك واخذها تره انته مربي هدى ولو مزوج من وكت جان بنتك بعمرها
مهيمن _وانته شعليك اني حر منو اخطب ومنو لا
محمد _تره اخوك الجبير انه مو صاحبك احجي عدل وياي
مهيمن _واني داحجي هيج ماصور تجاوزت عليك اني حرر بنفسي ومو صغير اعرف اقرر
محمد _زين يا حبيبي مو امها كالت لمحسن هيه من الصغر شلون هسه تاخذ الابنيه الي محسوبه لاخوك هاا
مهيمن _انته شبيك ماشي وره خرط النسوان ومنو احلام الي لا تحل ولا تربط.. باوع على محسن
محسن خوما عينك على هدى طبعا اذا كلت اي افكس عينك لانو بكل الاحوال متصير الك هوه انته بكد الفصمه وينك وين هاي السوالف
محسن _يابه كاعد تسمع شكاعد يحجي عليه اخوي شبي شاد وياي مادري
جنان _محجه شي غلط شوف روحك شلون صاير مهتلف وينك وين اخوتك ينرفع بيهم الراس وانته كاضيلي وكتك على هذا البلي لا دراسه ولا بيك نفع بغير شي..
محسن _وانتي مصدكين تحجين عليه خو
ابو محمد _هاي شبيكم صدك تحجون احنه وين وانتوا وين تسولفون..
جنان _زين اكلك أسد يمه مو صدك جبير انته على هدى خطيه ليش اضيع مستقبلها ويه واحد أكبر منها ومتربيه وياه وهاي لازم تكعد تعلمها وتفهمها راح اتعبك
مهيمن _اي عادي اربيها على أيدي
همام _صدك أسد متأكد من قرارك اخاف صدك تنظلم وياك تره كل عمرها بس ١٣سنه  وانته نهايه ال٢٠
مهيمن _قراري نهائي تره مو قابل للنقاش او التغير
محمد _ليش هوه غير نفهم شنو سر هذا القرار  العظيم المفاجئ..
مهيمن _يعني اله اكلك احبها  أفهمها اني احبها لبنت خالي ضياء ورايدها مره اليه وياريت تسدون النقاش وياي لانو مابي نتيجه وابوي قابل وهوه طلبها اليه من خالي بعد شكو هاي الخبصه وتظلمها ما تظلمها قابل شمسوي مدكولولي؟؟
جنان _لعد واني محد يشاورني بالموضوع لو بس انته وابوك عيني
ابو محمد _جنان رحمه لابيج لا تبدين هنوبه انتي كبرتوا السالفه من ولا شي
همام _هاهيه يابه الله يقدم الي بي خير شبيها هدى حبابه وفقيره بالعكس نيالهه اذا قبلت بي للاسد ههه
فاطمة_هههه اي والله لك أسد هيج من البدايه وقرر على هدوش الله ولكم احلى خبر اسمعه اليوم راح اركص بجفيه وهلا هلا هههه
همام_وحده الي هم وياج بداعت العزاز فطم ههه
جنان _يااا تسودنتوا انتوا
همام_اي غير فرحانين يوم الالي  كوولوا اميين
فاطمة _امييين يابه امين
مهيمن _هز ايده لا ربحنه شلون ثنين بالتفاهه محد يلحكهم
لبنى _وهسه شكو هاي الخبصه كلها علمود جاهله شبيكم انتوا
فاطمة _وانتي شعليج مأثرين عليج ومندري
لبنى _اي غير جزء من العائله اني ومرت الابن الجبير بهذا البيت شوف خويه أسد اني من رأيي يعني لو..
مهيمن _ رفع ايده وحطها على صدره وحجه،، مشكووره متقصرين أخيتي ورأيج احتفضي بي لنفسج مو بحاجته
همام_والله يعني اذا تردين رأيي اني روحي وره اخويه محمد لغرفتكم احسن منريد نتعبج ويانه
فاطمة _كوه لازمه روحي ماضحك واني اشوف شلون همام ومهيمن شروها على الحبل ههههه حيل يتشابهون همام ومهيمن حته اطباعهم حلوه يختلفون عن محمد ومحسن..
امي معترضت على زواجه أسد لانو مقرر وخلص وهيه مادام كرايب متحجي عدها القريب ولا الغريب اما اني فرحتي مانطيها لاحد والله ههه..
بس شنو هاي طلع مهيمن حاط عينه على هدى وحابها من جوه الجوه ومندري..
اجه على بالي كلام فارس اليوم انو يطلبني من أهلي سرحت بخيالي ياربي معقولة يتحقق كلامه واصير من نصيبه واعيش احلى قصة حب مثل البنات واعيش سعيده..
٠٠٠
همام_ماعرف ليش هاي الخجولة شغلت بالي وعقلي من وراها صرت المحل اخاف اعوفه لا تجي واني ماموجود عيونها الكبار ولونهن الجوزي الفاتح بيها لمعه مشايف مثلهن قبل وكل مره أكول يول لا تحسدها للبت..
صار اكثر من اسبوع على جيه الحجيه للمحل وبعد اختفت مالها اثر ضجت من روحي هسه لو منطيها طلبها مو احسن من هذا الي داسوي بروحي..
مرتضى كالعاده لازملي جهازه ومكنك عليه مالي واهسه حييل بقيت على كعدتي حسبه توديني وحسبه اجيبني لحد موعيت على صوت ناعم يسلم صوتها!! اي والله هذا صوتها...
كبل رفعت راسي شفتها هيه وهاي العيون الحلوه شلون تباع بخجل بويه كلبي رهيف اني على كيفج عليه ... هاي شنو شبيك همام شو استخفيت صدك جذب اثكل
يول شفتها جايه ويه بنيه بكصتها يمكن اختها ماعرف حجيت،، احم تفضلي أخيتي شكلتي قبل شويه مسمعتج؟
مريم _بس جيت على طلب والدتي اذا تذكر من ردنه ال..
همام _اي صح تذكرتكم وطلبكم جاهز من فتره بس شعجب مجيتوا اخذتوا يعني اقصد جان رجع انباع لغيركم
ردت بهدوء،، اي مو الوالده مابيها تطلع كل يوم
رديت،، هاا مابيها غير العافية وهذا طلبكم تفضلي..
ردت،، تسلم
نبأ_عفية مريم شوفي احذيتهم شلون حلوه خلي ناخذ واحد للدوام مو امي كالت اذا عجبكم اشتروا
مريم_تمام بس نصي صوتج فضحتينه شنو مشايفه..
همام_يعني اسمها مريم شكد حلو اسمها بس شكد خجوله بحيث راسها مترفعه وتباع عليه خرب شنو تباع عليه قابل شصير منها اني لا اليوم اني من الفرحه صرت اسحب خارجي..
باوعت عليهن يكلبن بالاحذيه وكل وحده اخذت واحد تقيسه واني مدري شكو هلكد مركز بيهن انثولت من شفتها تقيس بالحذاء و طلعت رجلها بيضه  هيه جانت لابسه حذاء مقفل وهسه كاعد تقيس واحد مفتوح..
نعلت الشيطان بداخلي شبيه رجعت اراهق والله عيب عليه اكلت الابنيه بعيوني الي يشوفني هيج يكول مشايف كومه قبل لحد ما مال منهن..
طلعت بره المحل و اخذت جكارتي ادخن كتله لمرتضى يطب يحاسبهن شويه وطلعن سويه كل وحده بيدها علاكتها بقيت اباع وراهن بدن يصيرن بعيدات مدري شصابني رأسا حجيت..
مرررتضى دير بالك على المحل شويه وراجع..
مرتضى _ولك وووين يمعود
همام _مهتميت اله ولا شنو حجه ركضت مشيت وراهن على كيفي لحد ما وصلن لبيت فتحن الباب وطبن جان البيت متواضع وقريب على السوك...
هذا بيت مريم وهنا عايشه هيه صار عدي فضول اعرفها اكثر احس روحي راحت وياها اليوم هاي ليش صار هيج وشمعنه هيه بالذات غريب هذا الشعور شلون يدخل حياتنه من دون سابق إنذار
رجعت للمحل واشوف مرتضى يحجي عليه لانو عفته وصاير مدري شبيه يسألني واني ماجاوبه شكله قابل هوه اني ماعرف شنو الي صار بيه..
باليوم الثاني قررت افوت من يم بيتهم بالروحه بلكت اشوفها شي بالرغم هاي تصرفاتي الي داسوي  مانطي مبرر الها المهم عدي المحها..
وصلت يم بيتهم شفت الساعه بال٩ونص الصبح بقيت واكف عسى ولعل تطلع بس ماكو شفت وكفتي بله فايده كملت طريقي واني ساعه اسب بروحي لانو اسوي سوالف مالها معنى وساعه اكول قابل شمسوي هسه..
يوم يومين اروح وارجع من نفس طريق بيتها باليوم الثالث جان عدنه طلبيه فطلعت للمحل من وكت وهم كالعاده من جهه بيتها افوت بس هل مره حالفني الحظ وشفتها واكفه اباب بيتها وشايله كتب بيدها..
راح عيوني على طولها وبساطتها وجمالها المميز بنضري هيج اشوفها شويه واجت سياره خط طالبات صعدت وياهم وراحت يعني طالبه هيه بس لو معهد لو جامعة هيج حزرت من لبسها..
خررب نسيت المحل هسه اكيد وصلت البضاعه شكول عليج مريم طيرتي ابو العقل...
همزين لحكت على الشباب وكملنه البضاعه حسيت على تلفوني يهتز فتحته شفته رسائل كومه من بنيه صارلها فتره ادزلي مع انو احظرها بس ترجع من غير حساب وغير اسم وغير طريقه بس اعرفها هيه نفسها بكل مره..
ادري شنو هل لزكه ماكو كرامه ولا احساس مو دنكول نعل منريد دكافي عاد بله انتي بنيه ومريم بنيه لا والله حرام اقارنج بيها هذيج نسمه وانتي مغثه...
٠٠٠
هدى_مرت ايام العطله الجمعه والسبت واني هادئه حيل بعدني مجاوزت سالفه الخطبه احسني..
ونضرات بابا الغريبه اليه وبعده لهسه كلامه ثكيل وياي واحلام تحجي برأس بابا حته يجبرني اقبل تكله مال وفلوس ورتبه وسيارة عده منو تحصلها
لو منافخ عمتي صبيحة اسمعها تحجي..
صبيحة_هسه متقبل بالولد وتقلل علينه المصرف مو زين كلبها وهوه رتبته وهيبته مو هينه والله لو عدي بنيه ما خليها تصير الا اله وهناا الأخت تتبطر على الولد..
هدى _محد يفهم صعوبه هذا الموضوع عليه من شخص تعتبري صديق وأخ على ساعه يصير اقرب بعد من هذني كلهن وفوكاها تفكيري الزاد اخير فتره بهمام..
اجه يوم الأحد بدلت الصبح وطلعت للمدرسه وهم بس دخلت ورحت لصفي البنات يباعن عليه  يتغامزن  لو يتبسبسن بينهن مادري شكوو واني منا مطايقه روحي عفتهن وطلعت للساحه كعدت وحدي على جهه..
شويه وحسيت على احد صار قريب مني باوعت هاي سما بنيه ويانه بالصف شاطره واجتماعيه ويه الكل باوعت عليه لحضات بعدين حجت..
سما _تدرين هدى متوقعتها منج وهيج تسوين بجميلة مو جانت صديقتج المقربه ليش هيج سويتي؟
هدى _رفعت حاجبي شنو قصدج شمسويه وشبيها جميلة هنوب
سما _ليش متعرفين روحج شمسويه المدرسه كلها تحجي بيج على انو اخوج وجمليه واحد يحب الخ وهيه حامل منه ومتفقين يزوجون بس انتي مترديها لهذا دافعتها ومخليتيها تسقط الطفل..
هدى _شنوووو لججج شتحجين سمااا ياا جميلة ياا طفل يا اخ مين جايبه هذا الحجي انتي..؟؟
سما _هدى انتي وين عايشه صار كم يوم البنات يحجن عليج وجميلة هيه الي سولفت هيج النه وتبجي..
ليش هيج هدى مو خطيه راح طفلها شنو ذنبة اذا انتي متحبين أمة..
هدى _ت... تره والله عقلي مكاعد يجمع.. سما جذابه هاي والله العظيم جذابه لج انتي مو تدرين اخويه صغير عمره بس ٧ سنوات ولج ميلي بعد اخ جبير ويحبها هاا
سما _والله مادري همه هيج ديحجون وجيت كتلج عليه زين والسالفه الخ هم جذب؟
هدى _عززه
يا سالفة بعد!!!!
سما _والله حبي الظاهر انتي نايمة ورجليج بالشمس.. يكولون انتي وابن ست خولة على علاقه حب وكذا وطلعات ومره رايحة لبيتهم انتي على ساس بحجه تقريج الست وهيه شايفتج..
هدى _لطمت على خدي..يمه شنووو هذا الحجي بعد هوه وينه ابنها لا أعرفه ولا شايفته شبيكم تخبلتوا عليه اليوم..
سما _ولج احنه شعلينه هيه جميلة كالت..
هدى _عفتها اعصابي محتركه ركضت ادور على الغضب جميلة شفته ضاربتلها ركن كدام باب المدرسه ونازعه حجابها جريتها من ايدها وحجيت وياها..
لج انتي شنو من بشر شنو من مله شنو هذا الحجي والتأليف الي مطلعته عليه حقيره شعليج بيه شمسويتلج وتشوهين سمعتي بالمدرسه هااا..
جميلة _اول شي ياحلوه نزلي ايدج مني وثاني شي اني حذرتج لو لا كتلج أريده لابن عمتج واذا مساعدتيني اندمج لو لا؟؟
هدى _الله ياخذج يا كلبه ام الزلم والله لو تموتين ماسوي الي تحجين عليه..
جميلة_هاا يعني بعدج مصره على كلامج  وعود كلت نتساعد بينه ونصالح احنه صديقات وانتي عرفتي بأسراري بس خوش يا هدى
هدى _كلامج هذا ميخوفني تمام لانو اني ممسويه شي غلط.. عفتها ورحت اتمشى وغصب عني دموعي صارت تنزل عشره عشره الحقيره خلت الكل يحجي عليه ويشكك بأخلاقي ماتحملت رحت لغرفة المرشده التربويه وحجيتلها كل شي صار.. بالاول كلش انصدمت بس بعدين طمنتني
المرشده _لا تبجين ماما خلاص صارت يمي الشغله واني اعرفج كلش زين حبابه وفقيره ماعدج هيج سوالف وهذيج اصلا طالعه عليها سمعه من زمان بس بعد كلامج هذا مينسكت عليها راح اسوي المطلوب وياها..
هدى _تشكرت منها طلعت وحته مدخلت الدروس ما اتحمل نضراتهم اليه بس خلص الدوام طلعت للبيت لا باوعت على احد ولا حجيت ويه احد دمرتني الحقيره الله لا ينطيها..
طبيت بغرفتي كبل حته بدون ماسلم على بابا التعب صار هل مره تعب روح بداخلي وراسي من البجي صار شكبره كبل نمت مفزيت غير على طبكت  باب غرفتي رفعت راسي هاي ماما حياة فرحت كمت داسلم عليها بس كبل دفعتني عنها وضربتني راجدي!!!!
يتبع.....